Ba. D bakali bayi baluulwa mucikolo. Kaambo ncibaali
kuluulwa akataa basimbi cakali cakuti bakali baalumi bakubusu, bazyandamene
akubota, alimwi bakali buyo myaka misyoonto atalaa basicikolo mbibaali
kuyiisya. Nkaambo kakuti bakali kuyandisya myootokala, ncecaapa kuti baluulwe
akataa basankwa. Umwi mwaka, kwakaba kuluula mootokala mupya acikolo ooyo ba D
ngobakaula: mootokala wiitwa kuti Ford Mustang, ngomootokala akataa yeeyo
iikwela akutiyaana kapati. Basicikolo bakatyompwa kuti liya ba D, mumwezi wa
Mukubwe kaangala, nokwakali bantu banjaanji bakali kuyandisya kuula mootokala
wamusyobo ooyo pele balo bauzya myootokala bakatola buyo myezi misyoonto kuti
baulete mootokala ooyo ba D ngobakali kuyanda mucintoolo cabo.
Mpoonya wakasika! Ma, kulibotela! Mootokala usubila kuti
pyu, alimwi uupukutidwe akumwekamweka, myeengwe yoonse kiilibonya mbuyaabikkidwe kutondezya busongo
bwakubambwa alimwi wakabambidwe muciwa capepela loko liya wabalika; wakali
muncini uujata mulimo mupati alimwi uubalika ncobeni. Nizyakamana ziiyo
mucikolo, basankwa abasimbi bakaboola kuzyoo bunganina amootokala ooyo,
kabaswiilila ba D nkobaluula ciimo ca moota ooyo: mbwiimvwika njini, mbuupepela
acibaka aanyonede mugwagwa, akuti utola kaindi kasyoonto kubalika kusikila
mpuuyinda bamaile bali mwaanda muwoola lyomwe. Ciinda kubota cakali cakuti, ba
D bakalikuyandisya kutondezya mootokala uuyandwa ooyu kubana aaba munzila
yakubeenzya mumoota muziindi eelyo nokwaanyina cakucita mucikolo.
Cimwi nceibaluka kuzwa kucikolo cipati mbuzuba oobo Ime
neekatanta mumootokala waba D. Ime ndakali umwi wabaabo bakacaalizya kutanta
mootokala ooyo, nkaambo ndakali mucikolo aciindi ba D nibaanyina cakucita.
Mpoonya bumwi buzuba nibaamanizya kutwiisya, twakalundukila kumoota wabo,
akumwantukila mukati, mpoonya twakagama mugwagwa mulamfu uulandabede uutozya
kuzwa mu dolopo. Mpoonya, bakaimika moota, batondeka kudolopo, ba D
bakamwetamweta kabati;
“Walibambila?”
“Ndalibambila!”
Bakavwilimya mungwimba ba D “akulyatisya cakubalisya”
mootokala. Mukulaba kwaliso twakapepela katuselemuka mumugwagwa bamaile bali
115 mu woola naa 185 makkilomita mu woola lyomwe- aawo mulawo wakazumizyide
buyo kubalisya moota kwa bamaile bali 55 naa 88 makkilomita mu woola lyomwe!
Kubikkila ataala kukondelezya kwa kutyola mulawo ooku, ba D bakandilembela
kagwalo kakulilekelela nkaambo ndakamuka mamiti ali kkumi kuciiyo caali
kutobela!
Mpoonya ntenda yakacitika. Mwezi omwe katutana jala cikolo
kuti tulyookezye mainza, umwi muntu wakaubba mootokala waba D. Basicikolo
boonse baakalala, kwiinda ba D lwabo beni. Mootokala waba D ooyo ngubaali
kuyandisya boobu, ooyo ngubaalindila akuyobweda mali (alimwi ngubaacili
kubbadela mali manjaanji) lino tiiwakaciliko pe! Bamasilikani bakalemba
cakuzyibya bantu, ankamu zikwabilila myootokala azyalo zyakalemba zinjaanji,
akubbataika zizyibyo mudolopo lyoonse. Pele basilikani tiibakakonzya
kuubbukizya mootokala ooyo nkuwaabede pe. Wakayabaila cakufwamba mbweenya mbuli
kukkomana kwaba D. Bamwi bakayeeya kuti ndiza mootokala wakatolwa “kucintoolo
nkobagonkoola zibeela zya myootokala” akukwamaunwa kuti zibeela zyawo
zikauzyigwe kumasi.
Cikolo nicaajalwa, taakwe mootokala Mustang wakajanidwe pe.
Liya cikolo nicaajulwa alimwi, toonse twakali kulangila
kuti hena ba D bakaula mootokala mupya.
Nee, bakacili kweenzya cimbayambaya nceenya ncibaajisi kale kabatana ula
Mustang alimwi bakaleetede kapati mumoyo nkaambo kakusweekelwa mootokala.
Mvwiki zili cisambomwe katujulide mwaka mupya wacikolo, ba D
bakatambula luwaile. Basilikani bakaujana mootokala wabo! Makani mabyaabi akali
akuti wakali mulubaya akataa zimbayambaya mudolopo lilikulaale bamaile myaanda
yobile. Eelyo babelesi nibakausanyangula mootokala ooyo, caando cawo
cakatondezya kuti wakalibbidwe, nkabela bakaita bamasilikani. Abalo Ba D
bakatiyaanina kulubaya lwazimbayambaya kuyoolanga.
Ncintu cuusisya caabajuzya meso! Mucibaka camoota uubambidwe
kabotu, kwakali cilwi cazibulobulo zigwalangene. Kumwi kubbazu cimbonimboni
cakali tyokede, nkabela kumwi ticaaciliko. Mpulungwido yakunembo aimwi
yakubbazu zyakali pwaikide. Kwakali myeengwe yakuvwalaulwa mumbali, caamba kuti
tikwaabikidwe maanu kufumbwa mpuwaayinda nkusyaanikizya buyo akugunta. Liya ba
D nibaalundukila kuyoolanga kwakali njini tibaakonzya nokuba kulanga mukati
oomo pe. Kwaali zidinto zyakuguntwa akukwamauka eezyo zyaasiminide acijazyo
akupa kuti citakonzyeki kujulika.
Kwakaba kukalala kupati acikolo buzuba bwaatobela eelyo
nitwaamvwa kuti ba D bakabbadela mali kuti babweze cilwi cazibulobulo zyakali
mootokala wabo kutaanguna! Kubbadela cintu cabo! Kubbadela bantu bakwamauna
myootokala madola $200 kuti bajosye cintu caba D ticaali cintu cilangika kuloma
kulindiswe. Pele ba D bakaunununa mootokala. Nkabela bakacita cintu ciboneka
kuti tacikwe maanu kuli bamwi besu: bakatola cootokala eeci kuti
cikabambululwe!
Ba D bakali kuyanda kubambulula mootokala wabo! Kaambo
ncibatakaula buyo mootokala mupya ticaali cintu camaanu kuli bamwi besu, pele
balo beni ba D bakalizyi ncibaalikucita. Bakali kuuyanda mootokala ooyo, alimwi ooyo wini ngomootokala
ngubaali kuyandisya. Mulimo wakubambulula wakatalika. Bakoolola zidinto
zyakuguntwa nzibaakonzya, akuzwisya ncibataakonzya koolola akubikka zibeela
zipya. Mukati kamootokala ooyu wakapwayawidwe boobu, aawo aakali cuuno caweenzya
mootokala kwaabikkwa cuuno cipya azimwi zyuuno zyakabikkwa milembo mipya.
Mpoonya bwakasika buzuba cintoolo cibambulula myootokala
nicaaita ba D kuti bazyootole mootokala wabo. Nguulya mpuwaaimvwi! Kulibotela
nobantu! Mootokala usubila kuti pyu, alimwi waapukutwa kusikila wamwekamweka,
myeengwe yoonse kiilibonya
mbuyaabikkidwe kutondezya busongo bwakubambwa alimwi wakabambidwe munzila
yakuti kuupepela loko liya wabalika. Mpawo bakanyamuna civwunisyo cakunembo lya Mootokala. Ncibakabona cakali kukonzya
kweeta misyozyi nokuba kumwaalumi mupati. Tiicakaninga konzyeka kweenzya
mootokala uulibotela ooyu pe. Antela akale.
Ba D bakatola mootokala kuti ukabambululwe alimwi kuli
uubamba mincini. Kwakali kuyandika njini mpya, azimwi zinjaanji. Wakali mulimo
uutola myezi, nkaambo kakulindila zibeela zipya zyakubikka mucibaka cazyeezyo
zityokookede. Mpoonya bwakasika buzuba bumwi lisyuuka maluba, ba D bakeenzya
mootokala wabo Mustang kuya kucikolo. Wakali mubotu! Musyobo mupya wakalambikwa
amootokala wakali kumwekamweka mu zuba
lyacifumofumo. Zibulo zikwabilila kunembo lya mootokala zyakali pukutidwe
cakuti zyakali mbuli cimbonimboni akutondezya masyu aabana bakabungene munsaa
mootokala ooyu. Wakali mootokala uujata mulimo mupati alimwi uubambidwe kuti
kuubalika ncobeni. Cinyandya ncakuti ba D bakali kuuyanda mootokala ooyu kwiinda mbubaali kuuyanda
kusaanguna. Nokuba kuti wakatola mali manjaanji, ciindi cilamfu, kuti ujokele
mumaanza aabo, akununwa kuzwa kulubaya lwa zimbayambaya, kuubambuludwe kusikila
mbuwaabede kubekabeka ciindi cakusaanguna, lino ooyu mootokala wakaba uuyandwa
kapati kuli mbabo kwiinda kaindi!
Katulangilizya masalamuzi aacitika mumeso eesu mumyaka
yacikolo yobile, ncaandipa kuyeeya kapati mumizeezo yabwana bwangu. Kuleka
kuteelela mbwanga muntu wabikkila boobu maanu kumootokala, Ime nsyeekamvwisya kuti nkaambo nzi ba D ncobaabikkila
ciindi amali manji boobp amootokala ooyo.
Nkaambo nzi ncibataa talikila amootokala mupya? Kuti koyelede kupa mali manji
boobu aakuti ubambulule mootokala, ino tokonzyi biyo kuula mupya?
Mbweekali kuyaa bukomena, Ime ndakatalika kuteelela twaambo
ba D ncibakacitila boobu kuti banunune akubambulula mootokala. Tiiwakali
mootokala buyo mbuli imwi pe: wakali mootokala wabo. Inzya, wakalibbidwe kuzwa
kuli mbabo pele wakacili mootokala wabo. Ncenciceeci balo ncibaali kuyanda kuti
babbadele $200 kuti baununune kuzwa kulukwakwa lwa zimbayambaya. Bakali
kuuyanda mootokala ooyo, alimwi
tiicakali kukonzya kuba cintu ceelene kuucincanya aumwi.
Ncenciceeci kucigama awaloYahuwah ncaakatucitila aswebo.
Liya Adamu a Eva nibaabisya, Walo naakatalika alimwi kubamba bantu bapya! Walo
naakabamwaya, a Lucifer antoomwe abangele bakwe kuti baleke kupona. Walo
naakamwaya muzeezo wabo uuli mubangele batawide. Walo ngo Mulengi nokuba booboo!
Nguni waali kunga wamulesya? Taakwe waali kunga wazyiba!
Pele Walo
naakalizyi.
Nicakaba cintu cuubauba ku Mulengi kutalika bupya kulenga
bantu bapya. Ncintu cuuba kwaamba boobo kwiinda kufutula cintu cinyonyoodwe.
Pele Walo wakasala nzila ya lufutuko.
Yahuwah waakanza kufutula bantu balaa cinyonyoono amuulo
mupati kuli Nguwe. Mwanaakwe, ooyo wakali Omwe a Taata mumilimo, mumakanze,
amuluyando awalo wakazumina makanze aadula boobu. Aaba bobile bakanjila
mucizuminano. Mukowa wabantu balaa cinyonyoono tiwakeelede kusulaikwa nokuba
kubikkwa ambali akubamba mupya pe. Pele, bakeelede kunununwa, nkabela
kabanunudwe, bakeelede kujosyegwa kuti bamvwane a Mulengi alimwi.
Luyando lwabulemu lwakayandaula nzila oomo muntu mwaakali
kukonzya kunununwa. Mulawo wa. . .[Yahuwah] ooyo wakatyolwa, wakali kuyanda
cisubulo cabuumi bwa similandu. Mumulengalenga oonse taakwe naba omwe wakali
kukonzya kuzuzika cisubulo eeci ciyandika ku mulawo ooyo pe, mucibaka camuntu
ulaa milandu. Nkaambo mulawo wabulemu uli setekene mbuli . . . [Yahuwah] awalo
Lwakwe, alike weelene aanguwe . . . [Yahuwah] nguwaali kukonzya kunununa mubisyi kuzwa kukutyola mulawo ooku. Taakwe
pele . . . [Mwanaakwe] nguwaali kukonzya kunununa mukowa wabantu kuzwa kukutukwa
kwamulawo akubaleta mulumvwano alimwi a Julu. . . .[Mwana] nguwakali kuyoobweza
mulandu ansoni zyacinyonyoono- eeco cinyonyoono cisofweede loko cakuti . . .
caandaanya [Eloah] Taata Usetekene aMwana Wakwe. . . .[Mufutuli] naakanjila
mukati mwini ka manyongwe kutegwa anunune mukowa wabantu uunyongene.
Eeci cakali cintu cidula kapati kucicita! Mulawo wabulemu,
Mulawo wa Luyando, wakali londokede aboobo tiiwakali kukonzya kucincigwa.
Ciyandika kucita mukubamba mulawo ooyo cakali cuubauba kuteelela:
Koteelela kutegwa Upone
Kuti Wanyansya Ulafwa
Kutegwa mukowa wabantu uminununwe kuzwa mucibi mubaanjila,
bakeelede kutaanguna kunununwa. Kunununa caamba “kuula; kupa muulo kuti
cijokele cintu; kwaangulula nokuba kuvwuna kuzwa kubuzike naa kuzwa kukwaangwa,
nokuba kuzwa kuli coonse ceelede kucitwa . . ., kwiinda mukubbadela muulo
weelede . . . kujokolosya kuula cintu cauzigwa; kuba mwini wacintu alimwi . . .
kwiinda mukubbadela mweelwe wacintu eeco . . .kuvwuna; kupilusya.” Muulo
wakunununa wakeelede kubbadelwa wakali lufu, nkaambo “ Inzya, kweelana a Mulawo, bunji bwazintu
zisalazyigwa abulowa, alimwi ccita kuti bulowa bwatilwa, kunyina pe uukonzya
kulekelelwa” zinyonyoono. (BaHebulayo 9:22, KJV)
Mwana
wa Yahuwah wakali ngo Mwanaa mbelele mupati wa Yah ooyo uugwisya zinyonyoono
zya nyika. (Amulange Johani 1:29.) Mwanaa Singuzuzyoonse ngo Mufutuli wa mukowa wa Bantu, nkaambo
walo wakabbadela muulo wakunununa mukowa uuwide kuzwa kulufu. Mufutuli
wakaliteelede kabotu kuti lufu Lwakwe
lwakali ngo muulo wakunununa. Mangolezya katana abwa eelyo walo naakatalisya
mulalilo akulya Mulalilo
Ucaalaizya, “Walo
wakabweza nkomeki, akulumba, akubapa, kaamba kuti, ‘Kamunywa oomu, nyoonse
nywebo. Nkaambo oobu mbobulowa Bwangu bwa cizuminano cipya, oobo butililwa
banji kuti balekelelwe zinyonoono.’” (Mateyo 26:27, 28, NKJV)
Mufutuli
wakali kwaamba kuti lufu nkoona. Liya Lazalosi naakafwa, Walo wakazyibya
basikwiiya Bakwe ncaakali kuyanda kucita kuti amubusye kuzwa kulufu, liya
naakati: “Mulongwe wesu Lazalosi uloona, pele Ime ndaunka kuti ndikamubusye.”
(Johani 11:11, NKJV) Kuli Uupa-Buumi, lufu luli buyo mbuli ŋonzi- nkulyookezya
kuzwa kumilimo. Nkaambo kakuti muulo wakunununa wakabbadelwa, oolo lufu,
kumwana wa Yah, luli buyo mbuli ŋonzi.
Pele
teesyi ndolufu oolu ndwaakafwa Mesiya. Mufutuli wakafwa “lufu lwabili” oolo
boonse bakaka caabilo Cakwe calufutuko ndobeelede kufwa. Ncenciceeci, kucisa
nkwaakamvwide mumoyo naakali aciciingano kwakali kupati cakuti Walo taakamvwide
akucisa kwakugagailwa. Lufu lwabili nkuzandwidwa limwi akwaandaana a Yahuwah,
ooyo uupa buumi boonse. Ncenciceeci cakamupa kuti walo alile liya naakati, “Eli
Wangu! Eli Wangu! Wandisiila nzi Mebo?” (Amulange Mateyo 27:46.) Aciciingano, Mufutuli wakabweza kulema
kwacinyonyoono cili coonse cakacitwa amuntu uli oonse wakaponede ayooyo
uucizyoopona.
Walo,Ooyo
uunyina cinyonyoono, wakabweza mulandu wabasimilandu kutegwa, balo kwiinda muli
Nguwe, bakakonzye kujokezyegwa mulumvwano a Yahuwah. Kubuka Kwakwe kuzwa kubafu
bwakali bumboni bwakuti Walo wakapona buumi butakwe cinyonyoono nkaambo mulawo
wabulemu waamba kuti boonse bateelela bayoopona. Ncisyomyo kuli basyoma mu
Mufutuli wabo boonse kuti abalo, bayoopona mbweenya mbuli Nguwe alimwi, nokuba
kuti “boona” muli Nguwe.
Pele
mulimo walufutuko tuumanide pe. Muulo wakunununa wakabbadelwa, pele teesyi
cilikke eeci pe. Citobela nkubambulula bantu. Ba D bakanununa mootokala wabo
kwiinda mukubbadela bakwamauna zimbayambaya mali $200, pele ooyo mootokala
tiiwakali kweenzyeka pe. Kabatana kondwa kweenzya mootokala alimwi, wakeelede
kubambululwa cakabotukabotu akubikkila maanu. Kutaanguna ba D tiibakalanga
mukati mwaali njini. Mubili wamootokala nguwaali mulimo wakutaanguna
kubambulula.
Eeci
cilakonzyana amaumi esu tobantu. Kanjikanji Mufutuli utalikila atala mulimo
wakubambulula muntu. Kunamatila zibi, nokuba nkunywa zikola, misamu iikola,
zipekupeku, nyimbo amabbuku ajisi twaano twakulengelezya, nokuba cili
coonse eeco cuungilila mizeezo yamuntu,
ceelede kutaanguna kusalazigwa kutegwa mizeezo ilondoke akulibambila cibeela
citobela mukubambululwa ooku. Cibeela citobela mulimo uutalibonyi kuliso lili
lyoonse lyabuntu.
Ncintu
citakonzyeki kumizeezo iigola kuteelela mulimo wakunununa. Maseseke aamulimo
ooyu alainda luzyibo noluba buti lwabuntu; pele ooyo uuzyila kulufu kuya
kubuumi ulabona kuti ooyu mulimo wabulemu ncobeni. Matalikilo aakunununa
tulakonzya kwaazyiba lino kwiinda motwiinda omwe omwe wesu. Pele zyoonse
zicitika zisikila kumisela iteeli yoonse.
Cintu
cibeleka kapati mukubambulula mukowa wabantu Muya Usalala. Mufutuli
wakakonzyanisya Moza ku muwo: tuukonzyi kubonwa; taakwe uzyi nkuuzyila nokuba
nkuugama, pele ulamvwugwa alimwi mulimo nguucita ulabonwa.
Nokuba
kuti muwo tuuboneki, mulimo nguucita ulabonwa akumvwugwa. Aboobo mulimo wa Moza
kumuya wamuntu ulabonwa mulincacita muntu ooyo walo wamvwa nguzu zya Moza
zifutula. Liya Moza wa . . . [Yahuwah] nuulela mukati kamoyo wamuntu, ulacinca
buumi bwa muntu ooyo. Mizeezo yacinyonyoono ilazwisyigwa, zibi nzyacitide
uleempwa; luyando, kulitolaansi, aluumuno mucibaka ca bukali, luunyaunya
akucubilana. Kukkomana kutola cibaka cabuusu, alimwi busyu butondezya mumuni
wajulu. Taakwe ulibona janza likwabula mukuli, nokuba uubona mumuni uuseluka
kuzwa munkuta zyakujulu. Cileleko cilasika eliya muntu nalyaaba lwakwe kuli . .
. [Yahuwah]. Nkabela nguzu zitaboneki kumeso aabuntu zilakonzya kulengulula
muntu mupya mucinkonzya ca . . . [Yahuwah].
Mulengi
wakalizyi kasimpe keni. Kunununa kakwiina kubambulula taluli lufutuko
lwini. Kutegwa mukowa wabantu bawide ukkomane alimwi kuba antoomwe a Sikabumba,
moyo wini uuli mukati kamuntu weelede kusalazigwa cibi coonse. Mizeezo ayalo
yeelede kulengululwa kutegwa cinkonzya ca Taata cikonzye kuyakululwa mukati ka
muya wamuntu.
Eeci
tacili cintu ncanga umwi wamucitilwa muntu ooyo lwakwe pe.
Cikonzya
biyo kucitwa mulusyomo lwa Mwana wa Yah,
nkaambo kwiinda muluzyalo Lwakwe alikke boonse mobafutulwa. Eeci nce cisyomyo
cipedwe kuli boonse basyoma:
“Moyo
mupya awalo Ime njookupa, alimwi muya mupya Ime njoobikka mukati kanduwe:
alimwi Ime njoogwisya moyo wabbwe kuzwa mumubili wako, alimwi Ime njookupa moyo
wanyama. Alimwi Ime njoobikka muya Wangu mukati kanduwe, akukweenzya mumilazyo
Yangu, alimwi webo uyoobamba mbeta Zyangu akuzicita. . . . alimwi muyooba bantu
Bangu, alimwi Ime njooba . . . [Eloah] wenu. Alimwi Ime njoomuvwuna kuzwa kubusofwaazi
bwenu.” (Ezekiya 36:26-29, KJV)
Nzila
ya lufutuko ijatikizya zinji kwiinda muulo wakabbadelelwa muuya wamuntu.
Iletelezya kujokezya cinkonzya cabulemu coonse cakumaninina mumuya wamuntu.
Muya wamuntu uununudwe akubambululwa boobu ulaletwa mukweendela antoomwe a
Bulemu kwiinda kuti naatakawa, nkaambo lino Mufutuli mbwaakabweza ciwa camubili
wabuntu, unooli musazinyina amukowa wabantu lyoonse.
Aboobo lino taakwe kutukwa kuli baabo bali mu
Mwana, nkaambo mulawo wa Muya wabuumi mu Mufutuli watusungununa kuzwa
kucinyonyoono alufu. Ninzi ncotunga twaamba azintu eezi? Kuti Yahuwah kali kuli
ndiswe, nguni uukonzya kutukazya iswe? Walo watakalesya Mwanaakwe pele
wakamusungwida ndiswe toonse, mbuti lino mbwanga Walo taatupa zintu zyoonse
kwiinda muli Nguwe. Yahuwah nguusalazya. Nguni ooyo uututamikizya? Nguni unga
watuzandula kuzwa kuluyando lwa Mufutuli? Hena mapenzi, kupengana, nzala,
matanda, ntenda nokuba cceba? Nee peepe! Muzintu zyoonse eezi tulainda kuba
bakomi kwiinda muli Nguwe walo wakatuyanda. Nkaambo Ime ndizyi kuti, nokuba
lufu, naa buumi, nobaba bangele, nokuba baleli, naa nguzu, nokuba zintu ziliko,
naa zintu ziciboola, nokuba bulamfu, naa bufwaafwi, nokuba cilengwe cili
coonse, tacikonzyi kutwaandaanya kuzwa ku luyando lwa Yahuwah
luli mu Mwanaakwe Mufutuli wesu. (Amulange Baloma 8.)
Yahuwah
“mumazuba acaalizya aano watwaambila
kwiinda mu Mwanaakwe, . . . walo ngo bulemu Bwakwe alimwi ncecinkonzya Cakwe
cini, akujatilila zintu zyoonse zya nguzu Zyakwe, . . .wakainda kubota kwiinda
bangele , kwiinda mukukona Walo wakajana zina liinda kubota kwiinda mazina aabo.” (BaHebulayo 1:2-4, NKJV)
Izina
lya Simuzyalwaalikke Mwanaa Yahuwah lilaandeene alimwi lizwide ncoliiminina.
Eeci Paulu walo taakacaamba bwini naakati Mwana kwiinda mukukona
wakajana zina liinda kubota kwiinda aabangele.
Kukona
cintu caamba “kutambula ciimo cayooyo wakupa cikono. [Nkokuti] Mwana ukona
ciimo ca bausyi . . . . Nkaambo Mufutuli Mwana wa Yahuwah, Walo wakakona
zina lilaatala amazina oonse.
Misela
minji kakutana sika kuzyalwa kwa Mufutuli, Yahuwah wakakulwaizya Muusa kuti:
Kolanga
, Ime njootumina Mungele kumbele lyako kuti akubambe munzila yako akukuleta
kucibaka eeco Ime nceekakubambila. Komuteelela Walo alimwi koswiilila jwi
Lyakwe . . . nkaambo zina Lyangu lili muli Nguwe.” (Kulonga 23:20-21,
NKJV)
Izina
lya Taata uteeli, Yahuwah, lili muzina lya Mwana. Mungele Gabbuliyeli
wakatumwa mubulemu kuti azikwaambile Maliya zina lya Mwana kuti nguni.
Nkabela
Mutumwa [Mungele] wakeza kuli nguwe akumwaambila kuti, “Luumuno lube aanduwe
webo oozwide luzyalo, Simalelo wesu ulaa nduwe alimwi webo ulilelekedwe akataa
bamakaintu boonse.!”
Pele
walo naakamubona wakanyongana kapati mukwaanzyigwa boobo alimwi wakayandisya
kuti azyibe caambwa, “Kwaamba nzi kayi kwaanzya ooku?”
Aboobo
Mutumwa wakamwaambila kuti: “Utayoowi Maliya, nkaambo Yahuwah wakufwida
luzyalo. Alimwi bona! Uyoomita akuzyala mwana musankwa, ngoyakuulika zina
lyakuti Yahushua. Ooyu nooli mupati alimwi uyootegwa Mwana wa Mupati kampatila,
alimwi Simalelo Yahuwah uyoomupa Walo cuuno cabwami cawisi Davida. (Amulange
Luka 1:26-32, Aramaic English New Testament.)
Mbulli
zina lya Taata Lyakwe mwini, lyabulemu, cintu ciyandika kapati cili muzina lya
Mwana cijanika muli ncoliiminina.
Cibotu
ciiminina zina lya Mufutuli ciyubununa nguzu zya lufutuko nkwaabila babisyi.
Izina lya Yahushua lyaamba kuti:
- Yahuwah Kovwuna! (ooku nkoongolweda lugwasyo kuli Yooyo uukonzya
kugwasya.) - Yahuwah Ulavwuna! (aaka nkaambo kakkomanya.)
- Yahuwah Uvwuna! (cintu cicitika ndeenya lino.)
- Lufutuko lwa Yahuwah (kaambo kasanganya kuti nguni alimwi Mufutuli
ucita nzi.)
Nzila
yakufutula muntu mubisyi tiiyakabambwa muntu kabisyide kale. Teesyi nzila
yakeetwa muntu kawide kale pe. Pele
nzila yalufutuko yakayubuna maseseke aakasisidwe kuzwa kumisela yakainda. Aaya
maseseke akali akuti, kuti naa cinyonyoono kukabe nocitalika, Taata kwiina
ncatayoociti kuti avwune zilengwe Zyakwe. Kutegwa avwune mukowa wabantu, wakali
kuyandika kutondezya kuliimya Taata; eeco ncintu cizinga myoyo yabantu baunyu.
Nzila yakunununa tiyakasyomya kuti boonse inga bavwunwa pe. Pele yakapa ciindi
cibotu kubabisyi boonse, alimwi
tiiyakabasinikizya kuti batambule lufutuko ndobakaabilwa.
Yahuwah
wakasungula Mwanaakwe kutegwa ape bantu ciindi cakulisalila! Kubotesya
luyando oolu! Kakwiina cisyomyo cakuti nokuba muntu omwe inga uyoozumina cipego
eeci citakwe muulo, Taata aMwana bakanjila mucizuminano cakufutula mukowa ulaa
cinyonyoono kufumbwa muulo kuli Lwabo beni ngobanga babbadela.
Izina
lini lya Mufutuli ncikulwaizyo cikonzya kusyomwa akutambulwa mucipego caabilwa
eeci. Cikulwaizya lusyomo: Yahuwah ulavwuna boonse baboola kuli Nguwe kwiinda
mu Mwanaakwe, cakumaninina.
Caamba
nzi ciiminina zina lya Mufutuli cilisalazyidwe mu Milimo 4:12: “Taakwe lufutuko
muzina limbi pe: nkaambo taakwe zina limbi ansi lyajulu lipedwe kubantu, eelyo
ndyotukonzya kuvwunwa muli ndilyo!” Basikwiiya bakalizyi kabotu kuyandikisya
kwa zina lya Mufutuli:
Muli
Nguwe boonse bashinshimi bapa bumboni kuti, kwiinda muzina Lyakwe, kufumbwa
uusyoma muli Nguwe uyootambula kulekelelwa zinyonyoono. (Milimo 10:43, NKJV)
Aboobo . . . [Yahuwah] wakamusumpula akumupa
cuuno caatala azina liinda mazina oonse, kutegwa muzina lya . . . [Yahushua]
boonse bafwugamike magondo aabo, aabo bali kujulu, munyika alimwi abaabo bali mubulongo
alimwi kuti boonse beelede kuzumina caantangalala kuti [Yahushua Uunanikidwe
ngo Simalelo], kutegwa alemekwe . . .Taata [Yahuwah]. (Bafilipi 2:9-11, NKJV).
Ncobeni,
ooyu ngomulawo Wakwe: wakuti tusyome muzina lya Mwanaakwe . . .[Yahushua] akuti
katuyandana, mbubonya Walo mbwaakatulailila. (1 Johane, 3:23, NKJV)
Mbokuli
kuyandikisya mu Zina lisetekene, kwakali kusoleka kwa Saatani kuti asise Zina
eelyo boonse ndyobeelede kuvwunwa muli ndilyo.
Izina
lya “Jeesu” lizyila mukusoleka kulembbulula zina mumilaka minjaanji yiindene.
Talizwi cigaminina ku CiHebulayo pe nokuba kuci Alamu ca Mucizuminano Cipya pe.
“Yahushua”
ndizina lyaali kubelesyegwa abamwi bakalembwa mu Cizuminano Cakale. Zina
lizyibidwe kapati ndileelyo lya Joshuwa, mwanaa Nuni, ooyo wakasolweda bana ba
Isilayeli kuya Munyika ya Cisyomyo. Zina lya
“Joshuwa” alyalo talili kulembululwa kwazina lya “Yahushua” pele lili
munsaa ndilyo kwiinda lya “Jeesu”! Mukusanyangula zina lya Mufutuli, cintu
ceelede kutaanguna kwiibalukwa ncakuti CiHebulayo ticaajisi bbala “J”. Aboobo
eeli bbala ndyamisela misyoonto yakainda amwalo mu Cikuwa.
Kutalika
kubelesya bbala lya “J” mu Cikuwa, (eeco caalengelezya mazinaa Joshua a Jesus)
kwaatalikila mumusela wakkumi aciloba. Ibbuku litaanzi kulembwa mu Cikuwa lyalo
lyakaandaanya akataa bbala I alya J lyakalembwa mu 1634. Lyakali bbala
licaalizya kusanganyigwa mumulongo wamabala aali 26 aaCikuwa. Musyule lyawaawo,
ibbala lya “I” lyakali kwaambwa kuti “Y”.
Ibbala
lya hallelujah lilatondezya kabotu mbulyaacinculuka bbala eeli. Liya Noah
Webster naakalemba bbuku lipandulula mabala mumusela wakkumi afuka, wakalomya
kubandauka bbala eeli kuti HALLELUIAH, nokuba kuti mumazubaayo kwakatalikidwe
kale kubelesya bbala lya J mubbala eeli. Eeli bbala lyaamba kuti “Kutembaulwa
kube kuli Yah” nokuba kuti “Amumutembaule inywe Yah.” Webster wakalemba
kupandulula bbala eeli kwakwe kuti:
“Eeli
bbala talilembedwe kabotu mukubelesya j, kutobelenya mulaka wa
CiGelemani ayimwi milaka yamukati kanyika, mwalo oomo bbala lya j
molimwvika mbuli bbala lya y. Pele kwaamba bbala eeli kubelesya bbala
lya j mu Cikuwa cimwaya bubotu bwalyo. Akwalo kubelesya bbala lya j mubbala
Jehovah, Jordan, Joseph, cakapindula bwiitwa bbala lini lya Yehovah, Yordan,Yoseph. Ooku kupindula nkotutobela lino, pele mubbala lya Halleluiah takweelede kulekelwa kuba
oomo.
Kusandululwa
kwabbala Yahushua kuya kuli lya Jeesu kulakonzya kubonwa liya
muntu kuti walanga CiGiliki mbocisandulula zina lya Joshua. Alimwi,
Joshua ndizina lyomwe alya Yahushua mu CiHebulayo. Liya Cizuminano Cakale
nicaasandululwa kuya mu CiGiliki mumusela wabili awatatu katana zyalwa
Mufutuli, basanduluzi ba CiGiliki baakatazyigwa bwakulembulua zina lya
Joshua/Yahushua. Eeli zina lyakalaa kumvwika kobile kwalo kwakazyila mu
CiGiliki: Y a Sh.
Mukusoleka
kusandulula Zina mbolilembwa bwini, kalicikonzya kubalwa aba Giliki, eeli zina
lyakabandaukwa munzila ziindene:
Iησοι Ιησουν
Ιησου Ιησουϛ
Kubelesya mabala
aaCikuwa, lilembwa kuti IESOUS (ee-ay-soos). Cintu caayungizya kucinca zina eeli
kaali kaambo kakuti liya mabala aa CiHebulayo “ua” naakalembululwa kuya mu
CiGiliki, lyakali kumanina mubbala lya busimbi. Eeci caaleta kunyongana kuba Giliki, nkaambo cakali kwaambwa kuti
eeli ndizina lya mukaintu mu CiGiliki.! Mazina manji aa CiGiliki
aabasankwa amanina mubbala S, mbuli butondezyedwe ansaawa:
Achilles
Leonidus
Icarus
Erebus
Hermes
Aeneas
Lӕrtes
Apollos
Proteus
Aristedes
Ulysses
Midas
Minos
Odysseus
Ooku kucincigwa
kwazina ncecaapa bakomba mituni kuti abalo bataminine zina lya Iesous kuti lyakali kukonzyana alya leza wabo, Zeus,
alimwi ncobeni muntu inga wamvwa kukonzyana akataa zina lya Zeus alya ee-ay-soos.
Zeus wakali leza mupati akataa baleza ba CiGiliki alimwi zina lyakwe lyakali
kusanganyigwa kumazina akumazina aazyooko mukulemekezya nguwe. Kumanizya zina
kuti sus, seus, sous yakali nzila imwi yakwaamba zina
lyakwe. Mulundu usetekene Parnassus, amulombwana Odysseus mazina aabo akali
kumanina mumusyobo ooyu. Bana ba Zeus bobile abalo mazina aabo akali kumanina
munzila yakulemekezya bawisi. Aabo bakali ba Dionysus a Perseus.
Eelyo ci Giliki
nicaasandululwa kuya muci Latini, izina eeli lyakaindila kupyopyongana kusikila
lyaba Iesus. Muci Latini, mazina aamusankwa omwe amanina mubbala “us”.
(Eeci cilabonwa mumazina aabasankwa aci Latini: Claudius, Augustus, Aurelius,
Marcus, aamwi.) Izina lyaci Latini lya Jesus lyakabelesyegwa mu Bbaibbele
lyakasimbwa mu 1560. Nokuba kuti lyakali kulembwa boobu Iefus, eeli
ndezina mbolilembwa muci Latini lya Iesus. Mu Cikuwa cansiku, ibbala lya s
kuti kalili akataa mabala aamwi lyakali kulembwa mumusyobo wabbala lya f lyamazubaano
kalitakwe keengwe akati.
21 Nkabela
Petulo aboobo naakamubona wakati kuli Iesus, O Simalelo, ninzi ooyu munti
ncayelede kucita?
22 Iesus wakati
kuli nguwe, Kuti Ime nkeyanda kuti akacaale kusikila Ime ndikaboole, ninzi eeco
kuli nduwe? Webo kotobela ndime.
Imwi milaka ayalo
ibandauka zina eeli mbuli ci Latini kuti Jesu (yay-zoo) naa kuti Jesus
(hay-soos). Cikatazya akusofwaazya Zina lisetekene ooku ncakuti, taakwe nokuba
muli lyomwe lya mazina aaya molinga lyajanwa zina lya Taata nkaambo zina
lya Yahuwah lyeelede kuba muli lya Mwanaakwe. Kutegwa umwi abaa lusyomo
lwakwiita zina lya Mufutuli, weelede kuzyiba zina eelyo. Eelyo zina ngu
Yahushua, kutali Jesus.
Yahushua wakabona
ncilyaali kuyandikila zina lyakwe mumulimo Wakwe wakufutula bantu basweekede.
Walo wakati: “Ime ndakaboola muzina Lya Taata, pele inywe tiimwakanditambula
Ime: kuti umwi waboola muzina lyakwe mwini, walo ooyo inywe mulamutambula.”
(Johane 5:43, KJV)
Mucishinshimi ca
Izaya walo mwaambilizya kuboola kwa Mesiya, wakati: “Amulange, nakalindu
uyoomita, akuzyala mwana, kumwiita zina Lyakwe kuti Immanueli.” (Izaya 7:14,
KJV) “Immanuel” ndizina lyaamba cigaminina kuti Yahuwah ulaandiswe.
Ncenciceeci zina lya Yahushua, izina lyabulemu lya Mwana, ncoliiminina kumwana
wa Adamu uli oonse.
Yahushua
nguumanide kukonzyana aciimo ca Taata wakwe. Nkaambo kakuti wakaboola anyika,
boonse balakonzya kuzyiba kuti Yahuwah ulizyi akweetela nkaambo kamasunko akuusa
kwesu. Mubisyi uli oonse ulakonzya kuzyiba kuti Sikabumba mulongwe wababisyi.
Kwiinda munzila ya lufutuko mpati, Yahuwah singuzuzyoonse, uuzyi zyoonse,,
alimwi uuli koonse ulayubununa kuti ngo Eloah wa Luyando.
Kutamikizya Yahuwah kwa Saatani kulaumuzyigwa
kwiinda mucipego ca Mwanaakwe Simuzyalwaalikke waafwida mukowa wabantu. Kwiinda
mu Mwana, boonse balabona luyando lwa Taata alimwi mumisela iteeli banunudwe
bayootembaula Yahuwah nkaambo ka Cipego Cakwe Citeeli:
Immanuel,
“Yahuwah ulaandiswe.”
Yahushua wakali
Yahuwah wakayubununwa muciwa cabuntu.
Kumatalikilo
Ijwi wakali-ko, alimwi Ijwi wakali a
Yahuwah, alimwi Ijwi wakali Eloah.
Ooyu kumatalikilo wakali aa
Yahuwah. Zintu zyoonse zyakaba kwiinda mulinguwe,
alimwi kunyina cintu nociba
comwe cakaba kakunyina nguwe.
Mulinguwe kwakali buumi, alimwi buumi
bwakali mumuni wabantu.
Alimwi mumuni ulamunika mumudima,
pele mudima
tiiwauzunda pe mumuni.
(Amulange Johane 1:1-5.)
Majwi
aalibotela aasikwiiya muyandwa Johane, ayubununa ciimo , mulimo abutumwa bwa
Mufutuli wabantu. Eezi zitondezya kuti Yahushua wakaliko kamvwene aTaata uteeli
mumulimo wa Kulenga.
Kusanyangula
Mazina aabulemu nkusanyangula mabala. Mabala Johane ngaakasala mucibalo oomu
alakondelezya. Kujatikizya Mwana kuti, Nguni alimwi Mulimo Wakwe nguli, kuli
ndiswe akuli Taata Wakwe, Johane wakamupandulula kuti “ndi Jwi.”
Mabala
alayandika kutegwa kutuminwe mulomo. Kuti kakwiina mabala, tacikonzyeki
kutumina mulomo kwamasimpe kulondokede kunga kwacitika. Kuvwuluma,
kumwetamweta, kwaanga nkusa, akutondeka inga kwakonzya buyo kwaamba cimwi cintu
asyoonto. Pele kuti kaambo kaambwe mubwini, kuyandika mabala.
Mabala
atondezya mizeezo. Ncenciceeci Johane ncaakati Yahushua “ndi Jwi.” Kuzwa
kumisela yansiku iteeli, Yahushua wakali omwe a Taata Wakwe. Walo wakali
mucinkonzya cini ca Yahuwah; cinkonzya ca bupati Bwakwe, Bwami Bwakwe, Bulemu
Bwakwe, Bubotu Bwakwe. Yahushua ncaakaboolela anyika, wakali kutondezya
ciimo ca Taata. Mwana wakaboolela kuzyootondezya ciimo ambwalimvwa Yahuwah.
Mbuli bwakaamba Izaya mushinshimi, Walo wakaboola kuti abe, mubwini, “Yahuwah
ulaandiswe.” (Izaya 7:14; Mateyo 1:22, 23)
Mukukkala
akati kesu, . . .[Yahushua] wakayubununa . . .[Yahuwah] kubantu akubangele.
Walo wakali Jwi . . . [Lyokwa Yahuwah] muzeezo uumvwika. Mukupailila basikwiiya
Bakwe Walo wakati, “Ime ndabaambila Zina Lyako”– “waluzyalo alweengelelo,
uukkazika moyo, uuzwide bubotu akasimpe”– “Kutegwa Webo luyando ndookandiyanda
Ime lube mulimbabo, andime mulimbabo.”
Pele
eeci Ciyubunuzyo ticaapegwa bana Bakwe baanyika balikke pe. Nyika yesu ndibbuku
lya ciiyo kumulengalenga oonse . . .makanze aa Yahuwah aaluzyalo, maseseke
aakunununa, nciiyo eeco ,”bangele ncobayandisya kubona,” alimwi ciyooba cintu
ncobasanyangula mumisela iteeli. Banunundwe abaabo batawide bayoojana
muciciingano . . .ciiyo cazilengwe alwiimbo lwabo. Kuyooboneka kuti bulemu
bubekabeka mubusyu bwa . . .[Yahushua] mbulemu bwa luyando lulyaaba. Ku
Kkauvali kuyooboneka kuti mulawo wakutaliyanda ngomulawo wabuumi anyika
akujulu; alimwi kuti luyando “lutaliyandi” luzyila mumoyo wa . . .[Taata];
alimwi kuti muli Yooyo mubombe, ulitolaansi kulalibonya ciimo Cakwe ooyo
uukkala mu mumuni uutakonzyi kusikwa munsimunsi. . . .
Taata
ulayubununwa mu Mwana. Kuti twalanga Yahushua, mizeezo yamumoyo ambwalimvwa Lwakwe
Taata Yahuwah ilatondezyegwa kuti nduyando lusalala ankumbu, kukkazyika moyo,
luzyalo, kubomba moyo, aluse kuli boonse. Kuti Taata Lwakwe naakaboola kuzwa Kujulu akukkala buumi
bwaanyika, kasiside bulemu Bwakwe akubweza ciwa cabuntu kutegwa boonse bakonzye
kumulanga Walo, eezyo zilembedwe zyaamba buumi bwa Mufutuli nizyataacinca
akaniini pe. Muli coonse ncaakacita Mwana, muciiyo cili coonse ncaakayiisya
Walo, mujwi lili lyoonse lya luzyalo akulekelela ndyaakaamba nokuba kucita,
tulabona akumvwa mbwanga Taata waacita awalo. Mubuumi bwakwe boonse, Mwana,
uyubununa mbwaakali kunga Taata waba kuti Walo naakali muntu.
Yahushua ngu
simuzyalwaalikke Mwana wa . . .[Yahuwah uupona]. Walo kuli Taata ndi jwi
lyaamba muzeezo Wakwe, –muzeezo Wakwe uumvika. . . .[Mwana] ndejwi lya. .
.[Taata]. . . . [Yahushua] wakati kuli Filipo, “Ooyo wandibona awalo wamubona
Taata.” Majwi Aakwe akali kwiinduluka kwaamba caakaamba . . .[majwi aa
Yahuwah]. . . .[Mwana] ulakonzyana a . . .[Taata Wakwe], kumweka kwa bulemu
Bwakwe, nceciwa Cakwe. Mubube bwakwe . . .[Yahuwah] wakaliyubununa mu
Mwanaakwe. . . . [Yahushua], nkokumwekela anze kwabulemu bwa Taata, “alimwi
ncecinkonzya cakwe cini” (BaHebulayo 1:3), wakajanwa anyika kuti ukonzya
mwaalumi.
Eeci ciyubunuzyo
cidula cakayubunwidwa ciimo ca Taata waluyando kumizeezo iisiya mbi
mucinyonyoono. Kababisyide bantu, tiibacili kukonzya kuswiilila nokuba
kuteelela ciimo ca Yahuwah ca luyando lutaliyandi luteeli. Ciimo cabulemu
cakali kulangwa mubuyoofu. Mufutuli wakaboolela kuzyooyubununa luyando lwa
Taata.
Kufumbwa cintu
cibotu, cizyila buyo kuli Taata alimwi cilayubunnunwa mu Mwanaakwe.
Luzyalo: “Kuyandisya kucita zibotu kuli bamwi,
akubakkomanya mukubapa nzyobayanda, kubaabila nzyobabulide nokuba kubagwasya
nobapatide; kubaa moyo mubombe abubotu bwa ciimo.”
Lubomba: “Waluse, waluzyalo; uuyanzanyika . .
.mubombe moyo, weengelela; uuyandisya kulekelela milandu akupa zileleko
zitabeelede.”
Mubombe Moyo: “Uuyandisya kucita cibotu; uujisi luyando
kubantu, uuyandisya kubapa buvwubi akubakkomanya.”
Walweetelo: “Weetela antoomwe aumwi; kufwida lweetelo
lucisa; kumvwida buusu nkaambo kakuciswa nokuba kunjila mumapenzi kwa umwi;
kumvwa buusu mbwamvwide umwi; kumvwida antoomwe aumwi.”
Uumvida Buusu: “Kumvwa cicisa ncamvwide nokuba buusu
mbwamvwide umwi; kumvwida lweetelo kuli umwi; . . .kumvwa umwi mbwatakkomene.”
Luse: “kumvwida lweetelo, kubomba moyo ooko
kupa kuti muntu alekelele umwi nokuba kucitila zintu zibotu kumuntu ulaa
mulandu kwiinda mbwayelede kucitilwa; ciimo cuubyaubya bululami, akucita kuti
ooyo wabisyilwa alekelele yooyo wamubisyila milandu, kulesya cisubulo.”
Taakwe ziimo
zyabulemu zibotu eezi mozibonwa kabotu cakusalalisya kwiinda mukaano kamukaintu
ooyo wakajatwa mubumambi, akuletwa kuli Yahushua kuti abetekwe. Kakwiina kweezyeezya,
wakalaa mulandu. Wakajatwa ncobeni kacita mamambe eeni! Eelyo balombwana
baamujata nibakamududila munsaa Nguwe akuyandisya kuti apegwe cisubulo, Walo
Mufutuli wakavwiila munzila njeenya Yahuwah njaakali kunga wavwiila kuti
naakali Nguwe wiimvwi waawo. Ooyo wabulemu bwakujulu wakasintama ansi akulemba
amunwe Wakwe, aabe taakamvwide. Liya nibakaya kumbele kumubuzya, Walo
wakaimikila akwaamba kuli mbabo kuti, “ Ooyo uunyina cinyonyoono akati kenu,
ataangune nguwe kumupwaya bbwe litaanzi.” Alimwi Walo wakasintama akuzumanana
kulemba ansi. Nkabela aabo bakamvwa ncaakaamba bakabona milandu ili mumizeezo
yabo, akutalika kusomooka umwi aumwi kutalikila kumudaala kusikila ucaalizya.
Nkabela . . .[Yahushua] wakacaala alikke amukaintu kaimvwi akati. (Johane 8:6-9,
NKJV)
Ma Munununi waluse
nobantu! Mufutuli waluyando akubomba moyo! Naakamulanga mumeso aakwe aazwide
nsoni, Walo wakamubuzya kuti: “balikuli aabo bakutamikizya? Hena kunyina wakupa
mulandu webo?” (Amulange Johane 8-10.)
Mpawo walo, wakasuumbene kayoodewe, kalindila bbwe litaanzi kuti limuumpute
acikanda cakwe citeteete, wakavwiila, “Kunyina naba omwe, Omwami.”
Nkabela majwi
mabotu, aazyila kumoyo wa Yahuwah akawida
mumatwi aakwe: “Ambeyo tandikupi mulandu; koya alimwi kuzwa sunu
utakaciti kabili cibi.” (Johane 8:11)
Aawa mpaalibonya
kubambulula munzila zyobile:
- Yahuwah tatupi
mulandu iswe pe, aboobo myoyo yesu ilalikwela kuzya kuluyando Lwakwe oolo
luyubununwa kuti nduyando luteeli. - Kukulwaizya kwa
Sikabumba kupa nguzu zyakucita ncaamba, aboobo kulailila Kwakwe kuti “koya
alimwi utakaciti kabili cibi” kujisi nguzu ziyumya mubisyi kuti acite
ncaalaililwa mubulemu.
Mulazyo wabulemu
wakuti kumuzyiba Walo Yahuwah nkuyanda Nguwe. Mbombubo, ncocili cintu ciyandika
kuyubununa muzeezo wabulemu kubabisyi kutegwa, abalo balyeete lwabo beni
nobaliyandila kuli Nguwe.
. . .[Yahushua]
Mumuni wanyika, wakavwumbilila bulemu Bwakwe butowa kumwekamweka akuboola
kuzyookkala mbuli muntu akataa bantu, kutegwa abalo, kamwiina kuumpwa abulemu
bwakwe, bazyibile kuba munsaa Sikabumba wabo. . . .[Yahushua] wakaboolela
kuyiisya bantu eeco . . .[Taata] ncayanda kuti bazyibe. Kujulu, amunyika,
mulwaanje lukwazeme, tulabona milimo yamatansyi ookwa . . .[Yahuwah]. Zyoonse
zilengwe zipa bumboni bwa nguzu Zyakwe, busongo Bwakwe, luyando Lwakwe. Pele
takuli kuzwa kunyenyezi nokuba mavwuumina ameenda nkotunga twayiya buntu bwakwe
. . .[Taata] mbuli mbwayubunudwe mu . . .[Mwanaakwe].
Kwiinda
mukuyubununwa kwaluyando lwa bulemu, mizeezo yabantu yeelede kulileta kumuzeezo
wabulemu akubambululwa mucinkonzya cabulemu. Eeyi nzila yantaamo antaamo mwalo
Mwana mwaakatundululwa akulyaaba Lwakwe kutegwa ayubunune luyando lwa Taata
Wakwe, ililembedwe mu Mangwalo.
“Amube
amuzeezo ooyu ngoonya iwakali muli [Yahushua], Walo ooyo, nokuba kuti wakali
muciimo ca . . .[Yahuwah], kunyina pe naakayeeya kubweza bweendelezi, nkokuti
kutegwa beelane a (Yahuwah)]. Pele wakasiya zintu zyoonse nzyaakajisi akubweza
ciimo camuzike, eelyo wakaba muntu. Kunze lyaboobo, naakaba muciimo camuntu,
wakalicesya akumvwida mane kusikila kulufwu, inzya, lufwu acisamu
cakupenzyezya. Aboobo. . . akaambo kaako,[Yahuwah] wakamusumpula akumupa cuuno
caatala, azina liinda mazina oonse, kutegwa muzina lya . . .[Yahushua] boonse
bafwugame . . .alimwi boonse beelede
kuzumina caantangalala kuti . . . [Yahushua Uunanikidwe ngo Simalelo], abulemu
bwa . . . Mwami [Yahuwah] kutegwa Taata alemekwe. Bafilipi 2:5-11,KJV;
bracketed quote J.B. Phillips translation.)
Nkaambo
luyando lulasinsimuka kuluyandonyina lupegwa, acalo ciyubunuzyo ca luyando lwa
Taata ncecisolweda babisyi kuti baleke nzila zyabo zyakuyumya myoyo kuluyando
lwakwe. Luyando lulagwisya kuyoowa akubikka camba mucibaaka cakunyasya liya
ciimo ca Taata nociboneka mubuumi bwa Mwana.
Mubombe,
uufwida lweetelo, uufwida nkumbu, uubikkila maanu kuli bamwi, Walo wakatondezya
. . .[Taata], alimwi lyoonse wakaluukwete mulimo wa . . .[Yahuwah] amuntu. . .
.mbuli . . .[Yahushua] mbwakali muntu muciimo cakwe, mbweenya . . . [alakwe
Yahuwah] ncaambila basikwiiya bacizya
kumpela. Munguzu Zyakwe tweelede kupona buumi busalala akulemekwa oolo
ndwaakapona Mufutuli.
Eelyo
Luyando noluba mucibaaka ca Kuyoowa, ndendilyo cisyomyo cakulengululwa
nocimanina. Kubambululwa kwamanina alimwi ciimo cabuntu caba mbuli cimbonimboni
mucinkonzya ca bulemu. Boonse balayandana mulilwabo beni, amulusyomo, kutegwa
balikankaizye mu Lufutuko lwa Yahuwah, lufutuko lwa cisyomyo cakuti Yahuwah
Ulavwuna! Aaba bayootambula cipego cakubambululwa. Kunununwa kwabo ,
ookokwaatalikila aciciingano, lino kwamanina mbuli mbobayaa kumanina
kubambululwa mucinkonzya caciimo ca Taata, nkaambo mulawo Wakwe ulilembedwe
mumyoyo yabo.
Amutyanke aawa kuti mulangilizye cipekupeku!
1 This story is not to condone this sort of action. Such behavior on the part of a teacher today would likely get him fired. Nevertheless, it remains one of my favorite high school memories!
2 E. G. White, Patriarchs and Prophets, p. 63.
3 American Dictionary of the English Language, Noah Webster, ed., 1828.
4 E. G. White, Desire of Ages, p. 173.
5 Ibid., pp. 172-173.
6 American Dictionary of the English Language, Noah Webster, 1828.
7 The Aramaic English New Testament actually gives the Messiah’s name as Y’shua. “Y’shua” is actually a contraction of the longer, more accurate Yahushua.
8 This spelling of Yahuwah with a V was based on a lack of knowledge regarding ancient Hebrew. Hebrew did not originally contain a V sound, thus the name is Yahuwah, not Yahovah.
9 “Halleluiah,” American Dictionary of the English Language, Noah Webster, 1828.
10 E. G. White, Reflecting Christ, p. 15.
11 E. G. White, Sons and Daughters of God, p. 21.
12 American Dictionary of the English Language, Noah Webster, ed., 1828
13 Ibid.
14 Ibid.
15 Ibid.
16 Ibid.
17 Ibid.
18 E. G. White, Sons and Daughters of God, p. 21.
19 E. G. White, Sons and Daughters of God, p. 21.
