Tupona mumusela wabuzangi bwanciki
akunyansya.

Cinyonyoono cakaindila kuvwula munyika eeyi
kuzwa Saatani naakawa. Saatani wakatyola mulawo
wa Kujulu alimwi lino uyanda kuti abalo bantu banyansye Yahuwah. Hena
uyoozwidilila?

Saatani ubelesya milwi yanzila
zyakukulwaizya bantu bokwa Yahuwah kuti batyole mulawo wabulemu. Imwi nzila
iinda kuzwidilila njakunjilauka muli nzyotusyoma akutoongelezya kuti
tatuceelede kutobela mulawo wa Yahuwah.

Bana Kristu banji baluula mbobalemeka
Yahushua ajwi Lyakwe; pele, tabakubwene kuti zimwi nzyobasyoma zibasolweda
mbuli moofu kuti batabilile buzangi bwa Saatani.

Muzeezo wa “mulawo aluzyalo” kanjikanji
tuuteelelwi kabotu alimwi, citobela, bantu banji balaligunkula amuzeezo ooyu.
Kutateelela kabotu luzyalo lwabulemu mbolweendelanya amulawo ncecitola
zyuulunzuma zya bana Kristu baluulwa kuti basyome kuti tabaceelede kubamba
Milawo.

Kutegwa tulyaangulule kuzwa kukulubila ooku,
tweelede kumvwa ncocaamba kuba “kufwidwa luzyalo” kujatikizya bwaamba Mangwalo.
Hena luzyalo caamba kuti tatuceelede kubamba Milawo
ili Kkumi na?

Ninzi ncotunga twaamba? Hena tuye kumbele
mucinyonyoono, kutegwa luzyalo lwiindilile kupegwa? Nee kaka,Yahuwah tazumizyi
eeci… (amulange ba Roma 6:1-2.)

Mangwalo alisalazyide: Tatweelede kuya
kumbele mucinyonyoono nkaambo biyo kakuyi kucili luzyalo.

Pele ino ninzi cinyonyoono?

“. . . cinyonyoono nkusotoka mulawo.”
(Johani 3:4)

Aboobo, luzyalo, talutuzumizyi kuti tutyole
Milawo, nkaambo cinyonyoono nkusotoka naa kutyola mulawo wa Yahuwah. Kupeekezya
kuti luzyalo lutupa kwaanguluka kuti tatuceelede kubamba Milawo ili Kkumi inga
kwaba kwaamba kuti luzyalo nkuzumizya kucita cinyonyoono! Nee kaka, Yahuwah
tazumizyi eeci pe.

Ibbaibbele lyaamba zinji kujatikizya kutyola
mulawo [cinyonyoono]:

“Bulumbu bwa cinyonyoono ndufu . . .” (ba
Roma 6:23)

“Nkaambo kufumbwa uubamba mulawo woonse,
pele kalezya mukampango komwe, ulaa mulandu muli zyoonse.” (Jakobo 2:10)

Kubamba mulawo lino caboneka kuti ncintu
ciyandika kapati. Pele kujanza limwi, tatukonzyi kunununwa kwiinda mukubamba
buyo mulawo kulikke:

“Aboobo kwiinda mumicito yamulawo taakwe
uukonzya kusalazyigwa kunembo Lyakwe . . .” (ba Roma 3:20)

Mangwalo alisalazyide kuti taakwe naba omwe
uyoonununwa kwiinda mumicito yamulawo pe. Hena tunununwa buti? Mbuti mulawo
mbuuyendelana aluzyalo? Ciyubunuzyo 14:12 citwaambila kuti basaante banooli
baabo babamba milawo ALIMWI balaa lusyomo muli Yahushua. Nduzyalo lwa Yahuwah
lubapa kuti bakonzye buyo kubamba mulawo.

Nkooku kubikkilila kwabasaante: mbaaba babamba
milawo yokwa Yahuwah, alimwi balaa lusyomo muli Yahushua. (Amulange
Ciyubunuzyo 14:12)

Kanjikanji kampango katateelelwi kabotu
kabelesyegwa kupandulula luzyalo nkaaka:

Eelyo cinyonyoono tacikakuzundi: nkaambo
toli kunsaa mulawo pe, pele ufwidwe luzyalo. (amulange ba Roma 6:14.)

Ninzi caambwa mukampango aaka? Katutana
manizya kwaamba, atuye kumbele mukampango katobela kaako:

Ino mbuti kayi? Hena tucite cinyonyoono
nkaambo kakuti tatucili kunsaa mulawo, pele tufwidwe luzyalo? Nee kaka ,Yahuwah
tazumizyi eeci pe. (amulange ba Roma 6:15.)

Mbuli mbutwabona kale, cinyonyoono
nkusotoka naa kutyola mulawo wa Yahuwah (1 Johani 3:4). Aboobo, hena aaka
kampango, kaamba kuti tweelede kutyola naa kusotoka mulawo wa Yahuwah nkaambo
tulifwidwe luzyalo?” Kwiingula nkuti: “Nee kaka, Yahuwah tazumizyi eeci.”

Mulawo uli mbuli cimbonimboni citutondezya
aawo mpotwacita cinyonyoono.

Nindataazyiba cinyonyoono, pele buyo nkaambo
kamulawo. (Amulange ba Roma 7:7.)

Mulawo ututondezya waawo mpotwacita
cinyonyoono kutegwa tupiluke kuli Yahushua. Tatubambi Milawo kutegwa tunununwe
pe. Tubamba Milawo nkaambo kakuti tuli nunudwe kale. Kubamba Milawo ngo
mucelo walufutuko lwesu, kutali muyanda.Tulinunundwe kwiinda muluzyalo
lwabulemu.

Yahushua wakali kubamba Milawo, alimwi
notuzyiba Nguwe, tuyooba mbuli Nguwe.

“Ooyo waamba kuti, Ime ndili Muzyi, pele
katabambi milawo Yakwe, mubeji, alimwi kasimpe takali muli nguwe.” (1 Johani
2:4)

Basaante mbabaabo “babamba milawo yokwa
Yahuwah, alimwi balaa lusyomo muli Yahushua.” (Ciyubunuzyo 14:12)

“Nkaambo mbuli mubili kuti kakwiina muya
ulifwide, mbweenya alusyomo lutakwe milimo lulifwide alwalo.” (Jakobo 2:26)

Caatalikila acinyonyoono comwe. Nkaambo
mulawo wakatyolwa, Yahushua wakasala kubbadela bulumbu bwa lufu kuti anunune
ndiswe. Aboobo kalwiindide lufu Lwakwe, hena mulawo tiiwakaciliko?? Yahushua, Lwakwe, wakabamba
Milawo.

“Kuti kamubamba  milawo Yangu, muyookkala muluyando Lwangu;
mbweenya mbuli Ndime mbweekabamba milaawo ya Taata Wangu, akukkala muluyando
Lwakwe.” (Johani 15:10)

Mbubuti luyando lwesu kuli Yahushua
mboluyubununwa?

“Kuti kamuyanda Ndime, kamubamba milawo
Yangu.” (Johani 14:15)

Mbubuti bweende bwesu a Yahushua
mbobulibonya?

“Ooyo waamba kuti, Ime ndili Muzyi,
alimwi katabambi milawo Yakwe, ngo mubeji, alimwi taakwe kasimpe
muli nguwe.” (1 Johani 2:4)

Banji bayakwaamba mubuzuba oobo kuti,
Simalelo, Simalelo, hena tiitwakashinshima muzina lyako? Alimwi akutanda
madaimona muzina lyako? Alimwi akucita maleele aalibotela muzina lyako? Nkabela
Ime njakubaambila kuti, Ime nsyemuzyi nywebo: kamuzwaawa munsi lyangu, inywe
nomucita zisofweede [kubula mulawo]. (Amulange Mateyo 7:22-23.)

Kuti katumuyanda ncobeni Yahuwah, tunooya
kumbele kubamba Milawo Yakwe yoonse.

Nkaambo oolu ndoluyando
lwa Yahuwah, kuti tubambe milawo Yakwe: alimwi milawo Yakwe tiikatazyi pe.
(Amulange 1 Johani 5:3.)