“Ulainda kubaa busongo ooyo uulizyi kabotu
Bbaibbele lyakwe, alimwi kuti kapona kweendelanya ancoliyiisya. Kuli lwiiyo
lwazilengwa leza lujanwa mu Bbaibbele, kapati mubbuku lya Matalikilo, Joobo,
Intembauzyo, Tusimpi, Mukambausi, Izaya 
amubbuku lyokwa Ezekiya, kwiinda muciiyo cili coonse cinga cajanwa mu
Zikolo zipati amu Maganda muyiilwa zilengwa leza anyika iino. Kuli tubeela
twakasimpe tupati tusyangidwe mu Bbaibbele, pele tweelede kusanyangulwa mumuuya
wabulemu, nkaambo “[Yahuwah] ulabakazya boonse aabo balisumpula pele upa
luzyalo kuli baabo balicesya” – Jakobo 4: 6. [Simalelo] wesu wakati- “
Ndakulumba webo, O Taata, [Simalelo] wajulu anyika, nkaambo Webo wakabasisa
zintu eezi  basongo abacenjede,
akuziyubunwida bana bavwanda mbuli boobu. Inzya Taata nkaambo oobo
mbookayanda”- Mateyo 11:26, 26.” (Terra Firma: Earth Not a Planet, Proved
from Scripture, Reason, and Fact, David Wardlow Scott, p.166)

Ansi aawa, tulatondezya twaambo tumwi ooto
twakapa kuti nkamu ya WLC ikumbatile masimpe aakuti “Nyika Ilibandalele naa
ililandabele.” Ootu twaambo tatuli twaambo tulikke pe ntotukonzya kupeda  bumboni bwa mbaakani eeyo mpotwiimvwi swebo
pe. Pele eeci, ceelede kukosozya makani akaambo akukulwaizya muntu uli woonse
kuti alitalikile lwakwe mwini kuvwuntauzya ciiyo ciyandika eeci alimwi cikopa
maanu kapati, mumuuya wakusyomeka.

Tacili cintu cuubauba kusukumina ambali
zintu zyoonse nzyookazyibide kucengwa mulwiiyo lwaanyika, pele kwiinda
muluzyalo lwa Taata, cilakonzyeka kucitika eeci. Mupailo wesu ngwakuti webo
ubikke ambali mizeezo njojisi kale amanjezyeezya aako anze acibuye camulyango
kotana njila mukati kuti utalike kuvwuntauzya masimpe, kutegwa  ubaa muzeezo uusalala amuuya wamoyo
uusyomeka.

“Kasimpe kunyina nokayoowa kuvwuntauzyigwa
kumaninide pe” (David Wardlow Scott)

Kanjikanji notuswaanganya muzeezo ooyu: Muzeezo wakuti Nyika ilibandalele inga umvwikaanga ulisondokede. Ncencico ncobeni aswebo eeci ncitwaataangunide kuyeeya eelyo notwaajuzyigwa kuciiyo eeci. Katutayandide kukaka cintu cili coonse, alimwi katutanaa vwuntauzya kapati makani aaya, twakanjila mumipailo yakusanyangula kaambo aaka, akukonkezya kuti tuyoosyomeka kubumboni mbotuyoojana, akutobela kufumbwa nkobututozya bumboni oobo. Nikwakainda mvwiki amyezi minjaanji yakulilangaula mumyoyo yesu, akusanyangulisya kabotu kabotu, lino kukonkezya kwesu nkwakuti “muzeezo wakuti nyika ili bundumene mbuli bbola” nguusondokede. “Ooyo uuwviila kaambo nkataninga teelela, nkufubaala abweemya kuli nguwe.” (Tusimpi 18:13, KJV)

Bumboni bwa
Bbaibbele bugwasyilizya masimpe aakuti Nyika iliimvwi nji Kiibandalele:

Inyika Iliimvwi
nji mucibaka comwe:

• Amuyoowe munsi Lyakwe, nyoonse
  nomuli munyika: nyika ayalo iliimvwi nji, cakuti tiikonzyi kuzungaanyigwa.
  (1 Makani 16:30, KJV)

• Yahuwah nguulela,Ulisamide
  bulemu; Yahuwah usamide nguzu, eezyo Walo nzyalisamikide Lwakwe: Nyika ayalo
  ilisimpidwe, cakuti tiikonzyi kuzungaanyigwa. (Amulange Ntembauzyo 93:1.)

• Kobaambila aabo batamuzyi
  Yahuwah kuti nguulela: nyika ayalo ilisimpidwe cakuti tiikonzyi
  kuzungaanyigwa: Walo nguyoobeteka bantu mubululami. (Amulange Intembauzyo
  96:10.)

• Komutembaula Yahuwah, O muuya
  wangu. O Yahuwah Elohimu wangu, webo uli mupati kapati; webo usamide bulemu
  akubekabeka. . . . Nduwe Ookalazyika musemo wanyika, kuti utakazwisyigwi
  lyoonse kutamani. (Amulange Intembauzyo 104:1, 5.)

Inyika azilengwe
zyajulu zyikobeledwe aa mulengalenga:

Mpoonya Elohimu wakati, Akube
mulengalenga akataa  meenda, kuti
waandaanye meenda kuzwa kumeenda. Nkabela Yahuwah wakabamba mulengalenga, akwaandaanya
meenda aakali kunsaa mulengalenga kuzwa kumeenda aakali atalaa mulengalenga:
nkabela cakacitika oobo. Mpoonya Elohimu wakaita mulengalenga kuli ndi Julu.Eelyo igoko acifumofumo bwakali buzuba bwabili. (Amulange Matalikilo
1:6-8.)

Aawa tujana kuti Yahuwah wakalenga lukwakwa
lwajulu kwiinda mukwaandaanya “meenda aayo aakali kunsaa mulengalenga kuzwa
kumeenda aakali atalaa mulengalenga.” Kwiina abumbi mbocinga cainda kusalala
kwiinda waawa pe; kuli meenda ncobeni kunsaa mulengalenga aatala  lya mulengalenga.

Amumutembaule  walo, inywe nomajulu aamajulu, alimwi inywe
nomeenda aali atalaa majulu. (Intembauzyo 148:4, KJV)

Kweendelanya bwaamba Matalikilo 1:6-8, caamba kuti kuli meenda kunsaa mulengalenga aatala lya mulengalenga.

Ibbala lyakasandulwa kuti “mulengalenga”
aawa ngu H7549:

H7549- râqîya’
Ncoliiminina kweendelanya a BDB:
1) cibaka cipapalele (ciyumu), cibanda,
mulengalenga
1a) cibanda (cipapalele mbuli tabule,
kutabilila)
1b) mulengalenga (ciyumwido cajulu
citabilila meenda atala lyaco)
1b1) cakali kuteelelwa aba Hebulayo kuti
nciyumu alimwi cikwabilide ‘meenda’ atalaa ncico

BDB ulanganya mulengalenga kuti wiiminina “ciyumwido
cajulu citabilide meenda atala lyaco,” alimwi ulayungizya akuti cakali
“kulangwa aba Hebulayo kuti cakali cintu ciyumu ciyumwide ‘meenda’ atala
lyaco.”

Muyanda wabbala H7549 ( râqîya‘) ngu H7554 ( râqa ‘) eelyo lyaambwa mubbuku lya Strong
kuti:

“muyanda wabbala lyakaindi; kutwa nyika
(citondezyo kuyandisya amoyo woonse); kukwakwamuna (mbuli kubelesya nsando);
kuvwumbilila (alubulo mbuli masenke): – kufula, kukwazamuna (atala,
kukwakwamuna mbuli masenke), kuganta, koolola” – Strong’s Concordance

Mulengalenga ooyo uuyumwide meenda atala
lyawo kulangika kuti ngomuyanda wabbala lyakuti ciyumu, mbuli cintu
cakwakwamunwa ansando kuti cibe mbuli senke nokuba cikwankwani cipapalele.

Mangwalo aya kumbele kwaamba kuti zilengwa
leza zyamulengalenga zyakabikkwa mukati ka mulengalenga ooyu.

Mpoonya Elohimu wakati, Akube mimuni
mumulengalenga wakujulu kuti yaandaanye buzuba kuzwa kubusiku; alimwi ibe
zitondezyo, zyaziindi zyamwaka, amazuba, amyaka: Alimwi ibe mimuni
mumulengalenga wakujulu kuti ipe mumuni atalaa nyika: nkabela kwakaba oobo.
Mpoonya Elohimu wakabamba mimuni mipati yobile; mumuni mupati kuti
kuuyendelezya buzuba, alimwi amumuni musyoonto kuti kuuyendelezya busiku: walo
wakabamba anyenyezi azyalo. Alimwi Elohimu wakiianzika mumulengalenga
wakujulu kuti ipe mumuni atalaa nyika, Alimwi akweendelezya buzuba abusiku,
alimwi akwaandaanya mumuni kuzwa kumusinze: alimwi Elohimu wakabona kuti cakali
cibotu. (Amulange Matalikilo 1:14-18.)

Mangwalo alaamba mumulaka muubauba kuti:
(1)    Kwakali meenda kunsaa mulengalenga alimwi aatalaa mulengalenga. (Amulange Matalikilo 1:6-8)
(2)    Zilengwa leza zyakujulu zyakabikkwa mukati kamulengalenga. (Amulange  Matalikilo 1:14-18.)

Mulengalenga
ncintu ciyumu ciimvwi akataa zilengwa leza:

Mucibalo citobela aawa, Elihu mumubandi
wakwe a Joobo wakayumya kwaamba ceeco ncotwaiya kale kuzwa Kumalengelo mubbuku
lya Matalikilo, kuti mulengalenga waandaanya meenda alimwi uutabilide zilengwa
leza zyakujulu muyumu akwiima nji. Amubikkile maanu kuti Elihu nabelesya bbala
lya H7554 ( râqa ‘), imuyanda wabbala lya mulengalenga,
eelyo liiminina kuti “kukwakwamuna (kwiinda mukubelesya nsando); kuvwumbilila
(amasenke naa cikwankwani calubulo): – kufula, kukwakwamuna, kuladamuna (atala,
koolola, muzikwankwani), kugantaganta, kuladamuna.”

Hena webo anguwe wakaanzika
[H7554 ( râqa ‘)] mulengalenga, muyumu nta, alimwi uuli mbuli
cimbonimboni? (Joobo 37:18, KJV)

Lino, atusanyangule
kampango aako kaambwa ziindi zinjaanji kuti katabilila muzeezo wakuti nyika
nimbumbulu alimwi ilibundumene mbuli bbola:

Ngonguwe uukkede atalaa
kuzinguluka [H2329- chûg ] 
nyika, alimwi bantu bayo bali mbuli nsozi; ooyo wakaanzika majulu mbuli
ndembela, akulandabika ngawo mbuli civwuka cakukkalila. (Izaya 40:22, KJV)

Ibbala libelesyegwa
waawa lyaamba “ kuzinguluka” ngu H2329] ( chûg). Lyaamba cigaminina kuti
kuzinguluka, nzila yakuzingulukila, alimwi inga lyaambilizya akuti mulengalenga
wakujulu. Kunyina pe nolyaamba kuti “bbola” nokuba “cinkuli”.

H2329 –  chûg
BDB Ncoliiminina
1) kuzinguluka, nzila yakuzinguluka,
kucingilila
2) (BDB) mulengalenga
(wamajulu)

Ibbala lya H2329 ( chûg)
kunyina nolyaambilizya cintu cili mbuli bbola naa cinkuli. Mushinshimi Izaya,
keendelezyegwa a Moza usalala, wakasala mabala aayebeka aawa; walo taakabulide
bbala lyakuti “bbola” pe, mbuli mbomunga mwabona mukampango katobela:

Walo uyookuwaala ncobeni
webo mbuli bbola [H1754- dûr] munyika ili kulaale . . . (Izaya 22:18, KJV)

Izaya, eelyo naakali
kwaamba bbola wakalemba  bbala lyakuti
H1754 ( dûr) kutali lya H2329 ( chûg). Ootu ntwaambo twaandeene.

Cintu ciyandika
kubikkila maanu aawa ncakubona kuti bbala lya H2329 ( chûg) inga lyaambilizya
akuti “mulengalenga wamajulu”, eeco ncecintu cilibonya kabotu kuti ncoliiminina
mbulyaabelesyegwa mukampango aaka.Atulange bbala eeli alimwi:

Ngonguwe uukkede atalaa kuzinguluka
[H2329] –  chûg] nyika, alimwi
bakkede mulinjiyo bali mbuli nsozi; nguuyalide majulu [8064 – shâmayim]
mbuli mulembo, alimwi ngowaalandabika mbuli civwuka cakukkalila. (Izaya 40:22,
KJV)

Aaka kampango
katwaambila kuti Yahuwah ulikkede atalaa mulengalenga wamajulu atalaa Nyika¹
alimwi kuzwa kulubazu Lwakwe ooko, bantu bakkede aNyika balibonya mbuli nsozi.
Yahuwah, ncobeni, nkwali koonse koonse alimwi tacaambi kuti inga watyankila
meso Aakwe kuti ababone kabotu bantu bakkede a Nyika pe, pele cifwanikiso eeco
Izaya mushinshimi ncatondezya cilamvwika munzila iisalede.

Eeci cibalo citwaambila
kuti Yahuwah nguulandabika majulu [H8064
–  shâmayim] mbuli “mulembo” alimwi ulaanzika majulu mbuli
“civwuka”. Ibbala libelesyegwa kwaamba “majulu” aawa ndibbala ndeenya lyaambwa
ku Matalikilo liiminina  mulengalenga:

Alimwi Elohimu
wakaita mulengalenga [H7549 –  râqîya‘
]  kuti Ijulu [shâmayim]. Nkabela igoko naa  mangolezya acifumofumo bwakali buzuba
bwabili. (Amulange Matalikilo 1:8.)

Mushinshimi Izaya
ncasoleka kwaamba aawa ncakuti Taata Yahuwah ukkede atalaa mulengalenga ooyo
waanzikidwe atalaa Nyika mbuli civwuka. (Lyoonse Mangwalo alainduluka kwaamba
kuti Yahuwah nguulandabika majulu, naa shâmayim : Intembauzyo
104:2, Joobo 9:8, Izaya:40:22;  42:5;
44:24; 45:12; 51:13, Jelemiya. 10:12; 51:15, Zakaliya. 12:1)

Mushinshimi Izaya utwaambila kuti Taata Yahuwah ukkede atalaa mulengalenga ooyo ngwalandabika atalaa Nyika mbuli “mulembo” naa “civwuka”. (Amulange Izaya 40:22.) Aaka kampango inga tiikamvwugwa munzila yamusyobo ooyu kuti nyika niyali muciimo cambumbulu, bbola nokuba cinkuli.

Elifazi, mubbuku lya
Joobo, ulazumina akusandulula ooku, nkaambo walo waamba kuti Yahuwah
uleendeenda atalaa chûg(H2329]), ibbala ndeenya ndyaakabelesya alakwe
Izaya naakali kwaamba mulengalenga wajulu:

J.P Green mbwainduluka kwaamba Joobo 22:14- “a mulengalenga [2329] – majulu [8064] – Walo uleendeenda”

Makumbi aasisinkene
ncecilivwumbyo cakwe, kutegwa atabonwi; alimwi uleendeenda kuzinguluka [H2329]
–  chûg] wa kujulu [H8064 – shâmayim].
(Joobo 22:14, KJV)

Elifazi wakali kusyoma
ncobeni kuti Yahuwah wakakkede [ukkede] atala lya mulengalenga.

“Hena Eli tali mubulamfu
bwa kujulu[H8064 – shâmayim]? Alimwi amulange bulamfu bwa
nyenyenzi, mbozili kulaale!” (Amulange Joobo 22:12.)

Solomoni, mubupanduluzi
bwakwe mwapandulula makani aa Malengelo, uyumya kwaamba ncitwaiya kale kusikila
waawa kuzwa muli zyeezyo zyakalembwa a Mozesi, Izaya amulembi wabbuku lya
Joobo:

“Eelyo naakasimpika majulu
[H8064 – shâmayim], Ime ndakaliko: eelyo naakabikka mubalo [H2329
– chûg] atalaa  lyamaanzi malamfu:
Eelyo walo naakabikka makumbi kujulu: naakayumya musemo watusensa twa meenda
malamfu: Eelyo walo naakabikkila lwizi migaano yalo, kuti meenda atasotoki
mulawo wakwe: eelyo walo naakabikka musemo watusensa twanyika.”(Tusimpi
8:27-29,KJV)

Aawa alimwi, tulajana
bbala ndyeenya lyakabelesyegwa mukwaamba mulengalenga, nokuba majulu , ibbala
lyakuti:  chûg H2329

“Amulumbaizye Nguwe, inywe nozuba amwezi: amulumbaizye Nguwe, inywe nonyenyezi zyamumuni. Amulumbaizye Nguwe, inywe nomajulu aamajulu, andinywe nomeenda aali atalaa majulu. . . .nkaambo zina Lyakwe lilikke ndelyeebeka; bulemu Bwakwe bulaatala lya nyika ajulu.” (Intembauzyo 148:3-4, 13.)

Solomoni mukampango
kalaatala aawa, wiinduluka kwaamba mumajwi amwi eeco Yahuwah ncaakacita
mumvwiki ya Malengelo (Amulange Matalikilo 1:2.) Mubwini, kulangikaanga
Solomoni wakali kwaamba waawo mulengalenga mpuusimpidwe mumeenda malamfu,
nkaambo walo ulasalazya kwaamba  namanizya
kwaamba kubamba majulu [H8064 – shâmayim] kuti chûg H2329
lyakaanzikwa “atalaa bulamfu bwameenda.” Bupanduluzi abumwi buteeleleka
mbwakuti Solomoni aawa, waamba mulenga wacaanda ooyo ngwaakabamba Yahuwah
kutegwa akungilile lwizi loonse antoomwe, nkaambo uya kumbele kusalazya kwaamba
kuti:

Wakapa lwizi mulazyo
wakwe, kuti meenda atasotoki mulazyo wakwe: eelyo naakabikka musemo wanyika
(Tusimpi 8:29, KJV)

Kutabikkila maanu aawo
ayeeme bupanduluzi buli boonse mpayaamide muntu, kuli cintu comwe buyo
camasimpe: kunyina pe nyika mpoyaambwa kuti ili muciimo cambumbulu, bbola
nokuba  kubundumana mbuli cinkuli pe.
Zyoonse zyaambwa muBbaibbele kusikila waawa zilatondezya cakutamamanya kuti
nyika ilipapalede alimwi ilikobeledwe a lukwakwa lwa mulengalenga wakujulu.

Lino atuvwuntauzye
cilengaano ceebeka cimwi eeco ncaakalemba mushinshimi Ezekiya:

“Lino cakacitika kuti
mumwaka wamakumi otatwe, mumwezi wane, mubuzuba bwasanu bwamwezi ooyo, eelyo
Ime neekakkede akataa bazike kumbalaa mulonga 
wa Cheba, majulu [H8064 – shâmayim] akajulwa, mpoonya mebo
ndakabona zilengaano zya Elohimu. . . . Alimwi ndakalanga, akubona  kapepele kakazwa kuzyila kunyika, akkumbi
nanka joba lipati, amulilo kuuvwumbilidwe mukati, akusalazya kapati mumbali
lyawo, alimwi mukati kawo kwakali musyobo uulibonya mbuli kusubila , kuuzwa mukati
kamulilo.Alimwi kuzwa akata kamulilo ooyo kwakalibonya zilengwe zipona zyone. .
. .Ajulu amitwe yabanyama kwakali mweenya [H7549 – râqı̂ya‛] uutandabede, wakali
kubalangala mbuli bbwe litakwe musyobo libalangala, wakalitandabede ajulu
amitwe yabo. Lino kunsi lyamweenya
[H7549 – râqı̂ya‛]  ooyo, mababa aabo akalitandabede
cakululama, limwi alimwi lyakaliswaneene abbabanyina, alimwi umwi aumwi kajisi
mababa obile aakulivwumbya mubili wakwe. Nkabela nibakali kweenda, ndakamvwa cikwala
camababa aabo mbuli cikwala camaanzi aavwuuma, mbuli ijwi lya Singuzyoonse,
cikwala cakubandika mbuli cikwala camakamu makamu aabasilumamba. Lino baime
buyo, bakavwunga mababa aabo. Mpawo kwakamvwigwa ijwi
lizwa kumweenya [H7549 – râqı̂ya‛]  uuli atala lyamitwe yabo, nibakaimvwi
akuvwunga mababa aabo. Alimwi
kujulu lyamweenya  [H7549 – râqı̂ya‛] ooyo wakali atalaa
lyamitwe yabo kwakaboneka cili mbuli cuuno cabwami, cakali mbuli ibbwe
lya-Safiro, nkabela atala acintu eco cakali mbuli cuuno akakede mbuli muntu.
Lino ndakabona mbuli
mundalila uusalalisya mbuli mulilo uuli mukati kansaka nanka mucikko. Kuzwa
mucikungu cakwe kuya mujulu, alimwi kuzwa mucikungu cakwe kuya ansi, ndakabona
mbuli mulilo. Alimwi kakuli mumuni uumuzyungulukide. Mbubonya mbuli fulicongo uuboneka mujoba nanka
mumakumbi ciindi camvula, mbuwakabede mumuni wakazyungulukide.  Mbuboobo mbucakabede cilengano cabulemu
bwa Yahuwah. Lino nindakacibona, ndakavundama ansi, nkabela ndakamvwa ijwi
lyasikwaamba. (Amulange Ezekieli 1:1, 4, 5, 22-28.)

Aawa Ezekieli utwaambila kuti:

1.Majulu [8064 – shâmayim] akajulwa. (Amulange Ezekieli 1:1.)

2.Kapepele, ikkumbi pati amulilo zyakaboola
kuzwa kunyika.(Amulange Ezekieli 1:4.) “Kunyika” mucibalo eeci , cilangikaanga
caamba kuti aciluli camajulu, eeci cakajulilwa kuli nguwe. Joobo awalo
ulazumina bupanduluzi oobu: “Wakalandabika kunyika atalaa busena butakwe cintu
. . .” (Amulange Joobo 26:7)

3.Kuzwa mukati kakapepele kamulilo aaka
kwakalibonya zilengwe zizumi zyone. (Amulange Ezekieli 1:5)

4.Nizyaamanizya kulibonya zilengwe zyone
eezyo, Ezekieli wakabona mweenya [H7549 – râqîya‘] “kuuvwumbilide atalaa
mitwe yazilengwe” Ezekieli weelanya mulengalenga naa mweenya kuti “ kkulusitolo
utaambiki.” (Amulange Ezekieli 1:22.) 
Ibbala lisanduludwe kuti “kkulusitolo” aawa ndyakuti H7140 (qerach) eeco
ciiminina “caanda.”Eeci caambilizya kuti meenda aali atala lya mulengalenga
aliyumide mbuli caanda (nokuba kulangika mbuli caanda). Eeci cilangika kuti
ncencico Mwaapositolo Johani ncaakabona mucilengaano cakwe: “Munsi lya cuuno
cabulemu kwakali lwizi luŋaima mbuli cimbonimboni, nokuba mbuli bbwe
libalangala. Akataa cuuno cabwami, amumbali lya cuuno cabwami, kwakali zilengwe
zyone zipona kazyizwide meso kunembo akusyule. “(Ciyubunuzyo 4:6) Ibbala lyaci
Giliki lisanduludwe kuti “Kkulusitolo” aawa ndibbala lyakuti  Krustallos (G2930), eelyo libelesyegwa
“muzilembedwe zyaci Giliki kwiiminina caanda.” (Vincent’s Word Studies)
Zinjaanji inga zyaambwa kujatikizya kaambo aaka, pele tuuli muzeezo waciiyo
eeci kuti tugamike kusanyangula kwesu kutozya kooko.

5.Ijwi lyakaita zilengwe zipona kuzwa
mumulengalenga [H7549 – râqîya‘]. (Amulange Ezekieli 1:25.)

6.Ezekieli wakabona Yahuwah kakkede acuuno
Cakwe cabwami atalaa mulengalenga [H7549 – râqîya‘]. (Amulange Ezekieli
1:26-28.

Aawa Ezekieli, ututondezya cifwanikiso
cisalala cokwa Yahuwah kakkede mubulemu Bwakwe acuuno cabwami atalaa
mulengalenga, ooyo ulangikaanga ncaanda ciŋaima.

Mushinshimi ulayumya kutwaambila cifwanikiso
eeci mucilengaano cimwi:

Mpoonya ndakalanga, alimwi, amubone, mulengalenga
[H7549 –  râqîya‘] kuti wakali
atalaa mutwe wama Gelebbemu aayo aakalibonya atalaa mbabo mbuli bbwe lya
Safaya, lilangika  musyobo mbuli cuuno
cabwami. Ezekieli 10:1)

Izaya, Elifazi, Elihu, a Ezekieli boonse
balazumina kuti Yahuwah ukkede acuuno cabulemu cabwami atalaa mulengalenga
muyumu. Kulibonyaanga Inyika mukaambo aaka ngamalyatililo ncobeni ookwa
Yahuwah:

“Mboobu mbwaamba Yahuwah, Ijulu [8064 –  shâmayim] ncecuuno cangu, alimwi inyika ngamalyatililo aangu: ili
kuli ŋanda njimwandiyakila mebo? Alimwi mbuli busena bwangu bwakulyookezyela?
(Amulange Izaya 66:1.)

Inyika
Ilibandalele:

Mubbuku lya Joobo,
tulajana mubandi umwi uukondelezya alimwi uuzwide kukulwaizya oomo mwaakali
kulyaambauzya Joobo. Mucipati ca 38, Yahuwah wakalibonya kuli Joobo akutalika
kumubuzya. Umwi mubuzyo mupati mucibalo eeci ngwakuti:

“Hena webo wakabona
bukwazeme [H7338 – rachab ] nyika? Kondaambila kuti naa ulizyi coonse
eeci. (Joobo 38:18, KJV)

Ibbala lyakuti, bukwazeme,
aawa ndibbala lya rachab (
H7338), eelyo lyaamba kuti “
bukwazame, kukwakwamuka naa cibanda cipati.” (BDB Lexicon) Ooyu ulibonya
kuti inga waba mubuzyo uululeme kuti koimvwi atalaa Nyika iibandalele. Pele
ncintu citakwe maanu kuti nyika niyali muciimo cambumbulu mbuli bbola nokuba
cinkuli.

Mubbuku lya Daniele, zintu zilembedwe zyaciloto cabushinshimi cokwa
Nebbukadinezala zitondezya kuti Nyika ilibandalele naa ilipapalele:

Eezi nzyezilengaano
zyamutwe wangu eelyo neekalede abulo bwangu: Ime ndakalikulanga, ndakabona,
Cisamu kaciimvwi akataa nyika, Alimwi bulamfu bwaco bwakali bupati. Eeco
cisamu cakakomena akubaa nguzu; Bulamfu bwaco bwakasika kujulu, Alimwi cakali
kukonzya kubonwa kumagolelo aanyika kuli koonse. (Daniele 4:10-11, KJV)

Nebbukadinezala wakaamba
kuti wakalota cisamu eeco cakakomena akulampa cakuti cakali kukonzya “kubonwa
kumagolelo aanyika yoonse.” Nokuba kuti eeci cakali ciloto buyo, pele
cilatondezya kuti caamba Nyika iibandalele naa iipapalede, nkaambo nyika
iipapalede ilikke njiikonzya kubaa magolelo. Ooyu muzeezo tuukonzyi kuba atalaa
nyika iili muciimo cambumbulu nokuba iili mbuli cinkuli.

Lino atulange
bupanduluzi bwakuzyokela kwa Mufutuli wesu waluyando mubulemu Bwakwe:

“Lino ndakabona eelyo
naakanamatula cinamatizyo cacisambomwi, mpoonya kwakaba kuzungaana kupati
kwanyika; alimwi zuba lyakasiya mbi mbuli cisani caboya cisiya, imwezi woonse
wakasalala mbuli bulowa, inyenyeezi zya-kujulu zyakalokela anyika,
mbubonya mukuyu wazungaanizyigwa aguwo pati mboumbulumusya nkuyu zyawo zikwange
ansi. Mpoonya ijulu lyakavwungailwa mbuli bbuku lyakuvwunga
nolivwungidwe antoomwe, alimwi zilundu zyoonse ansumbu zyoonse zyakaatulwa
mumasena aazyo. Mpoonya bami bamunyika, basizyuuno zyaatala, beendelezi
babasikalumamba, ibavwubi,bantu bayumu, ibazike boonse alimwi abantu boonse
baangulukide bakayuba mumpangala amumyala yamalundu. Eelyo bakazumanana
kwaambila zilundu amyala kuti: “Amutulimbe akutusisa kubusyu bwa Yooyo
uukkede acuuno cabwami akubukali bwa Mwanaambelele, nkaambo bwasika buzuba
bupati bwabukali bwabo, eelyo ino nguni uukonzya kwiima?” (Ciyubunuzyo 6:12-17,
KJV)

Amubone! Ulaboola amakumbi, eelyo meso oonse ayoomubona, antoomwe
abaabo bakamuyasa; alimwi bantu bamisyobo yoonse anyika bayoolyuuma acamba akulila
akaambo kanguwe. Akube boobo. (Ciyubunuzyo 1:7, KJV)

Kweendelanya abwaamba Johani Muyubunuzi:

1.Inyenyezi ziyooloka
aNyika. (Amulange Ciyubunuzyo 6:13.) Johani mbuli bashinshimi bamwi, uya
kumbele kupandulula makani aaya, alimwi taakali kusyoma kuti nyenyezi zyakali
zipati (kwiinda nyika kukomena) nokuba kuba kulaale zyuulunzuma
zyabamaile pe. Kuti eeci nicali ncobeni, mbuli bwaamba basyaazyibwene
bazilengwa leza mazubaano, inyenyezi yomwe niyali kunga yamwaya Nyika yoonse
kuguntana buyo aciindi comwe. Amubikkile maanu kuti Johani waamba kuti nyenyezi
“zyakalokela” aNyika; taambi kuti nyenyezi zyakali kufuuma kugama Nyika pe.

2.Majulu ayoovwungaika mbuli bbuku livwungwa. (Amulange
Ciyubunuzyo 6:14.) Aaka nkaambo keendelana abwaamba Mangwalo kuti majulu
aliyalidwe mbuli mulembo nokuba kwaanzikwa mbuli civwuka. Oobu bupanduluzi inga
bwabula maanu kuti Nyika niyali muciimo cabbola naa cinkuli.

3.Bantu boonse aNyika
bayoomubona kaboola mubulemu. (Amulange Ciyubunuzyo 1:7.) Eeci ncintu cilaa
maanu alimwi cikonzyeka kucitika atalaa Nyika iibandalele naa iipapalede, pele
tacili cintu cinga cakonzyeka atalaa Nyika ili muciimo cabbola nokuba cinkuli.

4.Basofweede abateempwi
bayoosoleka kulisisa kuzwa “kubukali bwa Mwanaambelele” a “kubusyu bwa yooyo
uukkede acuuno cabulemu.” (Amulange Ciyubunuzyo 6:15-16.) Eelyo majulu
naavwungailwa mbuli “bbuku livwungailwa,” basofweede bayoobona busyu Bwakwe
ooyo uukkede acuuno cabulemu (atalaa mulengalenga naa mweenya wakujulu, naa
mweenya uuvwundumene “kuzinguluka [H2329 – chûg] nyika” Izaya
40:33, alimwi bayoosoleka kulisisa lwabo.

Mangwalo aamba kuti aciindi ca Kuboola Kwabili ( Second Coming )kwa Yahushua, majulu ayakuyaamuka “ mbuli bbuku livwungailwa eelyo nolivwungailwa antoomwe,” alimwi kuti “liso lili lyoonse liyoomubona Walo.” (Amulange Ciyubunuzyo 1:7; 6:12-17.) Inga kwayandika zinjaanji zyakwaamba akupelengusya kuti aaya makani ayendelane anyika ili muciimo cabbola nokuba cinkuli. Eelyo julu lyaakuvwungailwa, basofweede bayoomubona Yahuwah acuuno Cakwe cabulemu, alimwi bayoosoleka kulisisa lwabo kuzwa mpabede aawo aali bulemu.

Nzilengwe zili mujulu
zyendeenda, kutali Nyika pe.

Mpoonya Joshuwa wakati
kuli Yahuwah mubuzuba oobo Yahuwah naakalekela ba Amolaiti kuti bazundwe abana
aba Isilayeli, alimwi wakati mumeso aabana ba Isilayeli, Zuba, koima nji
atalaa Gibbiyoni; alimwi webo, Omwezi, mumusena wa Ajaloni.

Mpoonya zuba lyakaima
nji, awalo mwezi wakaima, kusikila bantu nibakamanizya kujokezya
ncibaacitilwa abasinkondonyina. Hena tacilembedwe eeci mubbuku lya Jasha? Mbombubo
oobu zuba mbolyakaima kuti nji akataa julu, alimwi tiilyakabindaana kuya
kukubbila buzuba boonse oobo (Amulange Joshua 10:12-13.)

Eeci cibalo inga tiicainda
kusalala kwiinda waawa: “Izuba lyakaima nji akataa julu.” Joshua
wakalailila zuba amwezi kuti ziimikile mujulu. Walo taakaambila Nyika kuti
iimikile ileke kupindauka pe. Mbuli basicikolo ba Bbaibbele basyomeka, tweelede
kuzumina kusalazyilwa ooku nkotujana mukampango aaka. Yahuwah ulakasya
kupindaula Mangwalo kutegwa ayendelane amizeezo yabantu yalwiiyo lwa zilengwa
leza eeyo iiyeeme azuba, eeyo iikazyanya aBbaibbele kuzwa ku Matalikilo. Lwiiyo
lwamasimpe lwa zilengwa leza (lwakasunkwa akulangilizyigwa kiilibonya ameso)
lulazuminana amasimpe aakuti Nyika iliimvwi nji: Experiments and Alleged Coriolis Effect.

Mubbuku lya Izaya,
tulajana cilembedwe caayoyelwa moza eeco citwaambila Yahuwah mbwaakalijosya
musyule zuba  lyakali mujulu, akupa kuti
cinzimweemwe cankoloko cibweedele musyule.

“Amulange, Ime
ndajokezya cimvwiide musyule, eeco ceendede munkoloko yokwa Ahazi, tunzumina
tuli kkumi. Aboobo izuba lyakabweeda tunzumina tuli kkumi, ooto
ntolyakeendede kale kuya kukubbila. (Izaya 38:8, KJV)

Mushinshimi Izaya
ulatwaambila mumulaka muubauba kuti “izuba lyakabweedela kubala tunzumina tuli
kkumi” Kunyina mubuzyo acintu eeci: Izaya wakali kusyoma kuti lyakali zuba
lyakali kweendeenda, kutali Nyika pe.

Mwami Davida awalo
wakali kusyoma kuti lyakali zuba lyakali kweendeenda:

“Majulu atondezya bulemu
bwa Eli; alimwi mulengalenga utondezya milimo yamaanza aakwe. Buzuba abuzuba
bulaamba mwaambo, busiku abusiku butondezya luzyibo. Kunyina pe mubandi nokuba
mulaka, oomo ijwi lyazyo molitamvwugwi pe. Mundando wazyo ulaunka munyika
yoonse, alimwi majwi aazyo alaunka kumagolelo aanyika. Muli nzizyo eezi walo
wakasimpa civwuka cakwe nkaambo  izuba, lyalo nde Sibwiinga uuzwa mucivwuka
cakwe, akukkomana mbuli mulombwana uulaanguzu kuti abalike musinzo. Nzila yalyo
izwida kugolela julu, alimwi nzila yakuzinguluka yalyo isikila kumagolelo
aajulu: alimwi kunyina cisisidwe kuzwa kukuumpa kwalyo. (Amulange
Intembauzyo 19:1-6.)

Yahuwah ulakasya kuti
tupe bumboni bwabashinshimi kunsaa mizeezo yabantu balubide alimwi balaalweeno.

Bumboni
Bugwasyilizya kuti Nyika Ilibandalele naa Ilipapalele:

Ansi aawa, twasoleka
kutondezya asyoonto bumboni bumwi butabilila kwaamba kuti Nyika
ilibandalele nokuba kupapalala. Eeci tacaambi kuti mbobumboni bulikke oobu pe.
Taali makanze eesu aawa kuti tunjile mumakani manjaanji mutwaambo ootu, mbokuli
kuli kale milwi milwi yabumboni muluwo iijatikizya makani aaya iikonzya kujanwa
amuntu kufumbwa uusyomeka kuyandaula kasimpe.

• Kubula
  ciimo cakuvwukumana: Kuti Nyika
  niyali bbola lisika kukwazama bamaile bali zyuulu zyili makumi obile awosanwe
  mbuli bankamu ya NASA mbobataminina, nkokuti meenda aalo ayelede kuvwukumana
  lyoonse muli bamaile bali lusele akuyungizya bulamfu bwamusinzo. Eeci inga
  ceelana mbuli kulangilizya  bwiimpukide
  cintu cili kulaale. Misunko minjaanji yakasoleka kucitwa kusunka cintu eeci,
  pele yoonse misunko eeyi yakaalilwa kutondezya kuti meenda nokuba nyika kuti
  zyilivwukumene. Meenda lyoonse alilandabede mubukkwene. Kunyina pe
  naavwungumana. (Mikonzyano misyoonto)

• Masimpe
  kuti basyaazyibwene bamayake tababikkili maanu kuvwukumana kwa Nyika nokuba
  kuli buti eelyo nobapima nzila zyabuyaki mumilimo yabo. (Nokuba kuti bamwi
  balataminina asyoonto kuti zyizabukilo zimwi zyakayakwa  kweendelanya akuvwukumana kwanyika, pele ooyu
  muzeezo ulalibonya kuli ngwabufubafuba nkaambo kunyina pe meenda aayinda mujungusi
  lyacizabukilo naatobela mbocivwukumene cizabukilo cili coonse  pe. Meenda lyoonse alilandabede: kunyina pe
  naavwukumene.)

• Beenzya
  ndeke kunyina pe nobacengamika mutwe wandeke ziindi zyoonse kutegwa lyoonse
  kabaulukila abulamfu bweelede akuti bataulukili mumulengalenga (eeco nicali
  cintu ciyandika kuti nibali kuuluka myaanda myaanda yabamaile atalaa nyika iili
  muciimo cabbola)

• Nkaambo
  kamasimpe aakuti milonga ilatobezya kukunkulikila mumasena munyina cintu
  cisinkilila, pele ilajanwa kapati mumasena manjaanji kiikunkulika kuya mutala,
  eeco ncecintu cinga caba mamaile manjaanji aakuvwukumana. (Mukonzyano: Mulonga
  wa Mississippi ulaselemuka bamaile bali kkumi awomwi kuutaninga swaanganya
  lwizi ku Nkomwe yaku Mexico.)

• Nokuba kuti
  aciindi cimwi kwakali kuyeeyegwa kuti kuvwukumana kwa Nyika (nokuba meenda)
  ooko kwakali kupa kuti syule lya bwato libbilile kulibonya kumuntu
  uulangilizya, pele lino tulizyi kuti eeci cilacitika nkaambo buyo “kamulazyo
  wakulibonya kwazintu” awaawo aaimvwi yooyo muntu uulangilizya.” Mato manjaanji
  aabbilide kumeso aalangilizya inga alibonya alimwi kuti alangwa acibelesyo
  cakulanga zintu zili kulaale loko, nokuba kukomezya cintu cilangwa mukubelesya
  gilazi likomezya cintu ncolanga.

• Mulazyo
  wakuti cintu cilaa nyika kuti cafusilwa mujulu cilapiluka anyika alimwi
  tuunasunkwa mubwini pe; inga watambulwa buyo mulusyomo kuti nyika niyali
  muciimo cabbola. Ooyu mulazyo ncintu ncotwatakabikkila maanu pele twakuutambula
  kuti nkasimpe kuzwa nitwakacili bana (nkaambo “zikolo” nkotwakayiila
  zyakatulida masuku atalaa mutwe), pele mubwini, ooyu mulazyo tuukwe maanu pe.
  Hena tweelede kuteelela kuti kuli nguzu zyamaleele zyiitwa kuti “gravity”
  zyikonzya kudyaaminina milwi milwi meenda aamulwizi ansi Anyika, pele eezi
  nguzu tazyikonzyi kukwelela ansi nokaba kakumbi kabusi nokaba kauka kainda kuceya
  kalaa mapepe? Hena tweelede ncobeni kusyoma kuti kuli nguzu zyamusyobo ooyu
  zyikonzya kuleta mvwula kuti kiiwa kuzwa ansi kuya mujulu nokuba kukomezya
  mweemvwe kuya mumbali?….zyoonse eezyi kazyicitika katutakubwene swebo? (Aabo
  batabilila muzeezo wanguzu eezi mbeenya mbabaamba kuti Nyika ilacenguluka cuulu
  cabamaile muwoola lyomwe (1000mph) noizinguluka zuba zyuulu zyabamaile zyili
  makumi cisambomwe aciloba  muwoola
  lyomwe(67,000mph), akubalika mumulengalenga zyuulu zyabamaile zyili myaanda
  yone amakumi obile mu woola lyomwe (420,000mph). Pele zyoonse eezi nozicitika
  kunyina pe nokuba kuzuzuma asyoonto webo nkonga mwamvwa nokkede kobala cibalo
  eeci kunembo lya kkomputa yako. Cilamanukizya cintu eeci!) Lwiiyo lwazilengwa
  leza lwamazubaano lwaamba kuti “Kobikka ambali ma Bbaibbele aako, bikka ambali
  maanu ako, mizeezo yako, zyoonse nzyokonzya kwiibaluka akubona …kotobela
  ncolikwaambila bbuku lyakucikolo.” Beendelezi banyika balizyi kabotu kuti,
  “Kuti watalika kubeja alimwi koya kumbele kwiinduluka kubeja, inga watalika
  kusyomwa.” (Adolf Hitler) Webo kosongoka,Utalubili aawa pe; Dyabooli ulaa
  mulimo ngwayanda kucita munzila zyacikolo. (kapekupeku kasyoonto: Gravity or Density?)

• Magolelo
  aanyika alaimpuka lyoonse kuti kolanga ameso buyo( nokuba kuti uli mundeke
  yuuluka mafiiti zyuulu zyili makumi otatwe mujulu atalaa nyika). Kunyina pe
  abusena mponga wabonena magolelo aavwungumene aanyika iili muciimo cabbola.

• Magolelo
  aanyika lyoonse alibonya kulandabala naa kupapalala ncobeni.

Amubone mulaka wanzoka ulaa mpanda mucifwanikiso ca NASA.

• Bunji bwa
  basilutwe beenzya mato balakatazyigwa eelyo nobeenzya mato aabo Kumusanza wa
  Nyika eelyo nobeezyeezya kuti Nyika ili muciimo cabbola. Kuti Nyika niyali
  muciimo cabbola, myeengwe iizwa kujwe kuya kumbo niyali kunga ilasinsinkana
  kutozya kumusanza. Nokuba boobo, atalaa Nyika Iibandalele, myeengwe eeyi iizwa
  kujwe kuya kumbo ilatantaana kuzwa Kunyika kuya Kumusanza.

• Bantu
  bakali kweendeenda mumisela yamyaka 1700 a1800, bakali kweezyeezya kuti
  bakeenda zyuulu zyabamaile zyili makumi osanwe (50000 miles) kusoleka kubanda
  nsumbu ya caanda Kumusanza lyanyika, yalo mubwini eeyo ninsumbu iili kumagolelo
  aa Nyika Iibandalele (mbuli James Cook, James Clark Ross, amusinzo wakeendwa a
  British “Challenger”) Amubikkile maanu kuti mbunga ya NASA yaamba kuti nyika
  iili muciimo cabbola ilaa bamaile bali zyuulu makumi obile azyosanwe (25,000)
  kwiizinguluka.

• Misinzo
  yabufubafuba yuulukwa andeke zyinyamwide bantu (kapekupeku kasyoonto: Down South)

• Masimpe
  aakuti zintu zili kulaale, nokuba kuti zyilibonya aanga zyili kunzaa magolelo
  aanyika kumeso, pele tazyiboneki kucengamina kunze lyamagolelo aanyika
  kumuntu uulangilizya pe ( eeco nceceelede kuba cintu cicitika kuti muntu kali
  abusena Nyika mpiivwungumene) Atalaa Nyika iivwungumene nguzu zya “gravity”
  eezyo zyikwela cintu kufumbwa caimpuka kuzwa atalaa nyika kuya mujulu
  akucibweedezya ansi, mabbola aazwide muya ukasaala ayelede kulibonya kuyanda
  kukkala ansi eelyo naaimpuka kuya mumakumbi kulaale amuntu uulangilizya.

• Makani
  aakuti Polaris (Nyenyezi ya Kunyika) ilalibonya kumusanza  lya Nyika, pele Nyenyezi ya Kumusanza (Sigma
  Octantis) tiibonwi ataala Nyika
  nokuba abusena bwaakatikati kanyika
  ( azimwi zyilwi zyanyenyezi)

• Bweende
  bwamwaka bulamvwika camaanu atalaa Nyika Iibandalele: Azimunthal Equidistant Map ( Amutyanke a “earth” ansi lyakululyo lwenu mbuli
  butondezyedwe kutegwa mujane cakulisalila kulanga.) Eeyi nje maapu iibelesyegwa
  ambunga ya United Nations mucifwanikiso cayo.

• Masimpe
  ngakuti nkamu ya NASA (nkamu yalumamba yamaseseke) tiinapede cifwanikiso ca
  Nyika, alimwi acisolekesya kweena bantu…

Cifwanikiso ca Robert Simmon kunembo lya “Mbumbulu Yacijulujulu.” Credit: NASA/W. Hrybyk

Mbunga ya NASA
ilalizuminina kuti zifwanikiso zyayo zyakabambwa  amakkomputa, kutali kuti nzifwanikiso
zyanyika ncobeni pe. Eelyo Robert Simmon waku NASA Syaazyibwene wa Zifwanikiso
alimwi Uubamba zifwanikiso naakabuzyigwa kuti, “Ncintu nzi ncookacita ciinda
kubotelezya mumulimo wako ku Goddard?” wakavwiila kuti:

“Ciindi cicaalizya
muntu uli woonse naakabwezede cifwanikiso kuzwa atalaa Nyika  eeco cakali kutondezya mweenya woonse
(kubbazu lyomwe), cakali ciindi camu 1972 niyaali kuuluka ndeke ya Apollo 17.
Mincini ya NASA  Yakulangilizya Nyika
yakabambidwe kutobezya buumi bwaanyika. Kusikila mu 2002, twakabaa makani manji
aakuti tukonzye kubamba cifwanikiso ca Nyika yoonse. Nkabela twakacita oobo. Cintu
cakali kukatazya kapati cakali cakubamba lubuwa lwa Nyika mbolulibonya mumyezi
yone mumincini. Reto Stockli, lino uuli ku Swiss Federal Office ooko
nkobalangilizya bweende anyika, nguwaacita mulimo ooyu kapati. Mpoonya
twakazingaila cifwanikiso ca Nyika atalaa bbola. Mulimo wangu wakali wakuswaanganya
cifwanikiso eeci, makumbi, alwizi kutegwa cilibonye mbuli bantu mbobaali
kuyeeya kuti Nyika mbwiilangika kwiilangila mumulengalenga. Eelyo bbola
lyakabaa mpuwo yakuba Mbumbulu yamusyobo Wacijulu-julu. Ime ndakakondwa acintu
eeci pele nsyeekalaa muzeezo wakuti inga mpuwo eeyi yamwaika boobo.Tiitwakali
kuyeeya kuti inga caba cintu ciluulwa. Ime ncobeni kunyina neekali kuyeeya kuti
inga ndaba “Mr Blue Marble” (“Bamisita Bbola Lyacijulu-julu”). Twakaya kumbele
kusikila ino kubambulula cifwanikiso eeco, alimwi kuzwa mu 2004 twakatalika
kusimba zifwanikiso mwezi amwezi.” (http://www.nasa.gov/centers/goddard/about/people/RSimmon.html)

Maawe kuli baabo
bayandaula kuti bayube kuzwa kumalaile ookwa Yahuwah, alimwi milimo yabo ili
mumusinze, aabo baamba kuti, Nguni uutubwene swebo? Nokuba kuti nguni utuzyi
swebo? Ncobeni kupindamuna zintu nkomucita kuyoozyibwa mbuli bulongo
bwamubumbi: nkaambo hena mulimo weelede kwaambila muntu wuucita kuti,
Taakandibumba mebo pe? Nokuba cintu cilengedwe hena inga caambila yooyo
waacibumba kuti, Takwe maanu pe? (Amulange Izaya 29:15-16.)

Nguni ngosyoma webo?
Bashinshimi bokwa Yahuwah naa nkamu yamaseseke yalumamba ya NASA?

Mboobu mbwaamba Yahuwah;Ulitukidwe ooyo uusyoma muntu, akubamba nyama kuti libe janza lyakwe,
alimwi ooyo ulaa moyo waandeene a Yahuwah. Nkaambo uyooba mbuli cibuye
munkanda, alimwi takaciboni cintu cibotu nociswenena; pele uyookkalila mumasena
aanyina cintu musyokwe, munyika yamunyo iitakkedwe cintu.

Walelekwa ooyo muntu
uusyoma muli Yahuwah, bulangizi
bwakwe ngu Yahuwah. Nkaambo uyooba mbuli cisamu cisyangidwe munsaa meenda, eeco
cilandabika miyanda yaco munsaa mulonga, alimwi takamvwi kupya, pele matuvwu
aaco ayooba aanyanzabili; alimwi takabuli cintu mumwaka wacimpayuma, nokuba
kuleka kuzyala micelo. (Amulange Jelemiya 17:5-8.)

¹ Nokuba kuti mbobupanduluzi
mbobajisi bantu banji basandulula Bbaibbele, beezyeezya kuti “kuzinguluka
nyika” nkwaakali kwaamba mushinshimi Izaya (Isa. 40:22) kuti kwakali
kwaamba  ciimo ca Nyika kuba mbuli
cinkuli. Aaka nkaambo katayi koo Moonga pe. Cintu cini mushinshimi ncaatakali
kwaamba ncakusendekezya kuti Nyika ili muciimo ca bbola naa cinkuli.