Twakajokolosya Mumangwalo Mazina  aa Taata a Mwana, mbweenya mbuli
mbwaakalembedwe abalembi ba Bbaibbele aabo bakayoyelwa Moza. Tyanka aawa (here) kuti utambule Bbaibbele eelyo lilaa Mazina
Aakajokololwa (RNV). – Nkamu ya WLC

1.Zilengwa zyabantu? Naa Masimpe?

Ibbaibbele lyaciindi ca Mwami Jakobo
(KJV) ndelibelesyegwa kanjaanji muziiyo eezyi. Tyanka aawa (Click here) kuti utambule Bbaibbele eelyo.

Balemekwa ba Isaac Newton bakacibbukizya
cintu eeci mumyaka yakuma 1600 yakainda. Acalo Cikombelo ca Katolika caku Loma
cakaabbukizya makani aaya kutobela waawo. William Miller a Samuel Snow abalo
bakabbukizya makani aaya mu 1844. Grace Amadon ambunga mpati yeendelezya
cikombelo ca SDA akuvwuntauzya makani mucikombelo eeco, ayalo yakalibonena
makani aaya mu 1938.

Ncintu nzi kayi ncobakabbukizya?

Bakajana kuti, ncintu citakonzyeki  kuswaanganya “Tusimpe tuli kkumi atubili” twabuzuba bwa kukankaminwa kwa Kristu antoomwe akkalenda lina
Gregory nanka lina Juliyasi, eelyo ndyobabelasya bantu mazubaano. (“Tusimpe
tuli kkumi atubili- ncipimyo naa musunko ooyo 
aayimvwi lubeta oolo lweede kuba mukukosozya kaambo.) Nokuba boobo,
boonse bantu baambwa atala aawa, bakalijanina kuti ooto Tusimpe tuli kkumi
atubili tulaswaangana akunjila mukkalenda lyakumalengelo eelyo litobezya mwezi
azuba alimwi lijanwa mu Bbaibbele lya Mulengi wesu, Yahuwah , Walo ndyaakabamba kuti lyeendelezye
ciindi (langa Matalikilo 1:14-19). Ikkalenda lya Mulengi libelesya zuba amwezi
antoomwe kubala mazuba, mvwiki, myezi amyaka. Aboobo nkaambo kakubbukizya
makani aali boobu, Cikombelo ca Katolika caku Loma cakalamatika tusimpe  twakupelengusya tosanwe buyo, kumwaka
wiimpene wa (A.D 33) ooyo uujanwa akkalenda lina Juliyasi nanka lina Gregory,
kutegwa kabacilaa buzuba bwa Nsondo kuti mbuzuba bwakubuka kwa Kristu kuzwa
kubafu. William Miller a Samuel Snow eelyo nibakabbukizya makani aaya,
bakalibonena akukonzya kuswaanganya mazuba woonse aacishinshimi camazuba ali
zyuulu zyobile amyaanda yotatwe (2300 day prophecy). Grace Amadon ambunga
Yakuvwuntauzya yaba SDA, abalo bakabungika akulemba makani ngubaalijanina
mumyaka iili kkumi, kabalembelana abasyaazyibwene bazilengwa leza ataala nyika
yoonse; eeci cakatola mapeeji aasika ku zyuulu zyosanwe (5000 pages), alimwi
bakajuzya makani aaya mumuswaangano kumweendelezi mupati wacikombelo ca SDA.

Ncintu ciyandika kapati kumvwisisya tusimpe
tuli kkumi ooto twaambilizya buzuba bwakukankaminwa kwa Yahushua nkaambo
ntweenya tusimpe ooto ntotutondezya buzuba bwini eelyo Nsabata yamasimpe
niiyelede kuba –  alimwi buzuba oobo
teesyi Mujibelo pe. Zishinshimi zyokwa Daniele zyitondeka kumwaka wa A.D 31
kuti ngomwaka Yahushua naakakankaminwa, aboobo ooyu ngomwaka uusanyangulwa
muciiyo eeci.

Kanjikanji, ncilengwa cabantu kwaamba kuti
kuzwa kumatalikilo aa Malengelo aazyintu zyoonse myaka iili zyuulu cisambomwe
yakainda musyule, mvwiki zyitobelana, mazuba aali cisambomwe aatobelwa a
kulyookezya mu Nsabata, kuti zyoonse zyakali kutobelana kakwiina kulekezya
kusikila buzuba buno. Kuyungizya waawo, kwaambwa kuti mvwiki yesu mazubaano,
ayalo yakazyila kumvwiki yamalengelo kutali 
kumuzeezo ulaampuwo wazyuulunzuma zyamyaka iizingulukana. Nguni uunga
wakazya kaambo aaka mbwaanga bama Juuda bacibamba mulongo wamazuba aali ciloba
mazubaano, antoomwe a kubamba Nsabata Mujibelo? Hena mbombubo oobo na?

Cimwi cijuzyo cakukopolozya maseseke aaya
cili “mutusimpe tuli kkumi atubili” ooto tutondezya kukankaminwa kwini
nikwaacitika abuzuba bwakubuka kuzwa kubafu.

Nkaambo
nzi mvwiki yakukankaminwa nciiyandika boobu kuteelelwa kapati?

Kaambo keni eeyi mvwiki yabuumi bwa Yahushua
nciiyandikila kapati kubantu boonse bavwuntauzya kasimpe, ncakuti aaya mazuba
aatobelana mumvwiki eeyi alatondezya cakumaninina, cibeela caciindi cili
coonse, abweendwe bwamusela ookwa Yahushua; kuzwa musyule lyakwe kataninga
zyalwa, mumazuba naakali kupona alimwi akumbelaa mazuba. Nzila yaMulengi
wesu yakubambya ciindi, alimwi nzila Yakwe iilikke luzutu, njiijisi caando
caciciingano cokwa Yahushua.

Eeci ncecipa kuti muntu atakonzyi
kucinculula, nokuba kupelengusya kkalenda lya Mulengi lya misela azishinshimi.
Aboobo, eeci ciiyo cisoleka kuvwununa masimpe aayo aakasisidwe kwaciindi
cilamfu loko. Makanze aaciiyo eeci nkuganta kutondezya kkalenda eelyo
liswaangana “atusimpe tuli kkumi atubili” twalo ootu tusimpe katubeleka mulimo
wakutondezya mwaka wini, buzuba, awoola mukkalenda Lyakwe lyamasimpe eelyo
ndyaakabamba.

Kuzwa kumazuba aakali kupona mushinshimi
Ezula a Nehemiya kusikila kuciindi cino, kuli milwi milwi yamisela amalembe
aabasyaazyibwene bazilengwa leza, eezyo zitupa cifwanikiso camwezi cikkwene,
azibeela zyamwezi mupya kuzwa kuciindi eeco kusikila sunu. Cibeela camwezi cili
coonse cilipanduludwe atalaa mabwe, nokuba mumalala aapesedwe mbuli bbuku,
nokuba mumabbuku aansiku aabasyaazyibwene bazilengwa leza, aayo ngobalembede
mazubaano. Mbombubo oobo nzila yakubamba ciindi mbuyakabambililwa akweelana
aciindi camwezi azuba caba Juuda, mbuli mbociyeeme amwaka walufu lwa Kristu.
(Grace Amadon, Collection 154, Center for Adventist Research, Andrews
University, Berrien Springs, Michigan.)

“Walo uyoosampaula Singuzuzyoonse Mupati,
uyoopenzya akutundulula basalali ba Singuzuzyoonse Mupati, alimwi uyoosoleka
kucinca kkalenda amulazyo.” Daniele 7:25 (Knox translation, 20^th
Century.)

Nsabata a Mwezi Mupya (Rosh Hodesh), zyoonse
zyobile, ziindi zinjaanji zyakali kwiinduluka kuba mubweende bwamwaka. Mwezi
Mupya ucili, ayalo Nsabata kumatalikilo, zyakayeeme abweende bwa mwezi
uulibonya. Universal Jewish Encyclopedia, p. 410.

Ikuti bumboni mbotutijane muciiyo eeci
kabuli masimpe, nkokuti azyalo mvwiki zyitobelana mbuli mbozyizyibidwe
mazubaano mukkalenda lina Juliyasi nanka lina Gregory “zyakali lekede
kutobelana” aciindi cimwi kuzwa kumalengelo. Cabili ncakuti, Mujibelo mbuli
buzuba mbotuzyi mazubaano tabukonzyi kuba buzuba bwakasimpe bwa Nsabata
yabuzuba bwa ciloba yokwa Yahuwah. Kuti eeci kacili masimpe, alimwi kuti webo
oobala kusikila waawa koli sikuvwuntauzya kasimpe uukubwene, hena inga tiicaba
cintu cikkomanisya kubbukizya buzuba bwaciloba bwini bwa Nsabata ya Mulengi
wesu bwa Kumalengelo akumatalikilo aaciindi?

“Alimwi muzyiindi zyakutazyiba ooku Yahuwah
wakatyankila meso. . . .”Milimo 17:30

“Aboobo, 
mbwaanga kucili cisyomyo cakunjila mukulyookezya Kwakwe, atuyoowe
nkaambo inga bamwi benu kabayoolezya kusikila muli mbubo . . . . ‘Sunu, kuti
nywebo naa mwalimvwa jwi Lyakwe, mutayumyi myoyo yenu . . . .’ Atube bantu
basungu kuti tukanjile mukulyookezya ooko, nkaambo umwi inga kayoowida ansi akuba
mukonzyanyo wakutateelela. Nkaambo jwi lyokwa Yahuwah ndizumi alimwi
lilaanguzu, lilabosya kwiinda cceba likwengedwe kumabazu obile koonse,
kalikwamuna akwaandaanya muuya amubili, alimwi akwaandaanya mafuwa amooma,
alimwi lilizyi mizeezo amakanze aamoyo wamuntu. BaHebulayo 4:1, 7, 11-13

Nokuba kuti ciiyo eeci cikwalakwala buyo
atalaa makani woonse, pele nciiyo cipati cilaa cikkelo maningi, webo ulakonzya
kulibonena lwako zyintu ziimpene akataa makkalenda obile kuti waayezyekanya
omwini.

“Aaba bakalaa mizeezo iisalala kwiinda baabo
baku Tesalonika, mukaambo kakuti bakatambula jwi kabalibambide muli zyoonse
alimwi bakasanyangula Mangwalo abuzuba kuti balijanine naa kuti eezyo zyintu
zyakali boobo ncobeni.” Milimo 17:10-11

2.Tusimpe 1-6

Ibbaibbele lyaciindi ca Mwami Jakobo
(KJV) ndelibelesyegwa kanjaanji muziiyo eezyi. Tyanka aawa ( Click here
) kuti utambule Bbaibbele eelyo.

Mangwalo alandabika Tusimpe tuli Kkumi
Atubili antoomwe  mukabunga,
alimwi ooto tusimpe tatukonzyi kwaandanyigwa pe. Ootu tusimpe tubelekela
antoomwe mbuli cibulo cakuyandauzya lubazu nokuba kweelanya cibaka cicengeme
kuti ceelane kulandabala, eeco cijanwa muli banamutekenya bamazubaano,
amundeke, amumato amumilimo yakuyaka maanda, akuyaka migwagwa. Ansi aawa
kulipedwe mulongo watwaambo ooto kweendelanya a Mangwalo alimwi akuzuminwa a
Ellen White. Kutegwa ootu twaambo tuli “Kkumi atubili”, tulomye kuganta makani
aalufu lwa Yahushua, kulyookezya mucuumwe akubuka kuzwa kubafu, tweelede kuti
twakali yobwedwe katuli mukabunga kwa cuulu myaanda yosanwe yamyaka (1500
years) kataninga kufwa Yahushua. Lufu Lwakwe aciindi ca Pasika, ncintu
citondezya twaambo ootu. Aaka Kasimpe kakusunkya, Yahuwah wakali kabambilidwe
kwiinda zyuulu zyotatwe amyaanda yosanwe yamyaka (3500 years) alimwi wakacitila
boobo kutegwa abazinge mizeezo aabo batapaludwe mumyoyo pele kuti aleleke bantu
Bakwe basyomeka kuyandaula kasimpe muciindi Cakwe ncabikkide mwini. Ma! Kubota
muzeezo ookwa Yahuwah.

Mumuni abulemu wakalibonya akubunganina atalaa ciindi calufu akubuka kuzwa kubafu
[kwa Yahushua], akukosozya tusimpe tusetekene kuti walo ngo Mufutuli wanyika. Early
Writings, p. 197.

Muumyaka misyoonto buyo yakainda musyule
lyesu, nikwaajanwa kuti ooyo mumuni wanyenyezi zyili kkumi azyibili wakalibonya
ciindi eeco ngweenya ngomumuni uuli mu Ciyubunuzyo 12:1. Mulongo watusimpe ooto
tusamidwe amubili amumusyini wamukaintu uusalala ooyu. Walo alikke ngowiiminina
basyomeka bokwa Yahuwah kumamanino aaciindi, alimwi ulitondezyedwe kaimvwi
atalaa mwezi, kasamide zuba alimwi kakuli musyini wanyenyezi zyili kkumi
azyibili amutwe wakwe. Bikkila maanu kuti zuba, mwezi anyenyezi nzyezyintu
zyibeleka kupimya ciindi cakkalenda lya Mulengi wesu, mbuli mbuzyaapegwa kale
mulimo ooyo mu Matalikilo 1:14.

1.MWAKA: A.D 31. Buzuba butaanzi
bwamwaka lyoonse butalikila mu Mwezi Mupya wamwaka uli woonse. Mesiya
wakakosolwa akataa mvwiki eeyo yakabikkidwe 
mu Cishinshimi camvwiki zyili makumi ciloba cokwa Daniele alimwi
cakaambilizyigwa a William Miller mu 1843.

Daniele 8:14
Mpoonya wakati kulindime, “Mumyaka iili zyuulu zyobile amyaanda yotatwe; mpoonya
busena busalalisya buyoosalazyigwa.”

Daniele 9:24-27 Kulipimidwe mvwiki zyili makumi aali ciloba  kuti azuzikwe kubantu bokwanu amunzi
uusalala, akuti kusotoka mulawo kuzimaanyigwe, muleke kucita zinyonyoono,
mukombelezezye babi, mutalike kucita bululami oobo buteeli, kujala zilengaano
abusinsimi kuti zimane, akuti Busena Busalala bunanikwe.Webo welede kuziba
cintu eeci kuti ucimvwisye kuti, kuzwa ciindi nikwaambwa kuti munzi wa
Jelusalema ubukulusigwe akuyakululwa, kusikila kuciindi cakusika kwa Mesiya
Mwanaa Mwami, kuyooba mvwiki zili ciloba, amvwiki zyili makumi aali cisambomwe
azibili. Uyooyakululwa akuba aamigwagwa akankolola, pele cinooli ciindi
camapenzi. Kwaakwiinda mvwiki zyili makumi aali cisambomwe azibili, Mesiya
Munanike uyoogwisigwa, pele kutali kukoswedwa Lwakwe pe; bantu bamuleli ooyo
uyooboola bazoonyonyoona munzi abusena busalala. Mamanino ayooboola mbuli
zambangulwe. Nkondo inooliko mane kusikila kumamanino, nkaambo kwakalaililwa
kuti zinyonyoonwe. Uyoobamba cizuminano abantu banji mumvwiki yomwe, pele akati
kamvwiki eeyo, Walo uyoolesya zipaizyo azituuzyo.

Great Controversy, p.327: Mucilimo camwaka wa A.D 27 [Yahushua] wakabbizyigwa a Johani
mubbapatizyi alimwi wakatambula kunanikwa kwa Moza. Mwaapositolo Petulo ulapa
bumboni kuti “[Yahuwah] wakananika [Yahushua] waku Nazaleta a Muya Uusalala
anguzu” . . . Naakamanizya kubbizyigwa Walo wakaunka ku Galilaya, “kayaa
kukambauka mulumbe mubotu wabulelo bwa [Yahuwah], alimwi kumwi kaamba kuti,
casika ciindi.” Maako 1:14, 15 . . . “Akataa mvwiki Walo uyoolesya cituuzyo
acipaizyo kuti cileke kuyasilwa.” Mu A.D 31, myaka yotatwe akwiinda akati mwaka
omwe kuzwa naakabbizyigwa, [Simalelo] wesu waakankaminwa aciciingano.

2.CIINDI CAMWAKA: Cakali ciindi
cakusyuuka malubaluba amasamu mumwezi mutaanzi wamu Bbaibbele.

Bapaizi / BaLevi 23:5 Mubuzuba bwakkumi abwane bwamwezi mutaanzi kumangolezya ngu Pasika
wa Yahuwah. (Mwezi mutaanzi lyoonse wakali mwezi mutaanzi muciindi nokulibonya
kusyuuka malubaluba amasamu.)

Bapaizi / BaLevi 23:9-11 Eelyo mwaakusika munyika eeyo Ime njeyoomupa nywebo, alimwi
mwaakutebula munyika eeyo, nkabela mukalete musunta wamaila mataanzi mubutebuzi
bwenu kumupaizi, alimwi walo uyoozumbaanya musunta wamaila kunembo lyokwa
Yahuwah, cifumo yaakwiinda Nsabata. (Micelo mitaanzi yabutebuzi bwamaila
lyoonse yakali kupaizyigwa muciindi camwaka nokusyuuka malubaluba amasamu.)

Great Controversy, p. 327: Mucilimo camwaka wa A.D. 27 Kristu wakabbizyigwa . . . . Mumwaka wa
A.D. 31, myaka yotatwe kuzwa naakabbizyigwa, [Simalelo] wesu
waakankaminwa.  (Aboobo eeco ciindi
cakali ciindi cakusyuuka malubaluba camwaka.)

Kolanga : Milimo 10:38; Maako 1:14, 15

3.MWEZI: Buzuba butaanzi bwamwezi uli
woonse Mbuzuba bwa Mwezi Mupya, lyoonse mumwezi omwe omwe, alimwi mwezi
mutaanzi wamwaka wiitwa kuti Abibu / Nisani, mumwaka uli woonse omwe omwe.

Ciibalusyo 16:1 Ubambe mwezi wa Abibu,
alimwi umubambile pobwe lya Pasika Yahuwah Eloah wako: nkaambo mumwezi wa
Abibu, Yahuwah Eloah wako wakakugwisya munyika ya Ijipita  ciindi masiku.

Great Controversy, p. 399: Mubuzuba bwakkumi abwane bwamwezi mutaanzi waba Juuda, mubuzuba
bwini bwamwezi ooyo kwamisela milamfu iili kkumi ayosanwe, ndendilyo eelyo
mwanaambelele wa Pasika naakali kuyasilwa . . .

Kolanga aku: Kulonga 23:15; Great
Controversy, p. 399; Patriarchs and Prophets, p. 486.

4.BUZUBA BWAKKUMI ABWANE BWAMWEZI: Oobu
mbobuzuba bwakkumi abwane, kubala kutalikila ku Buzuba bwa Mwezi Mupya, lyoonse
kumatalikilo aamwaka omwe omwe.

Bapaizi / Balevi 23:5 Mubuzuba bwakkumi wabwane bwamwezi mutaanzi kumangolezya ndipobwe
lya Pasika lyokwa Yahuwah.

Great Controversy, p. 399 Mubuzuba bwakkumi abwane
bwamwezi mutaanzi waba Juuda, mubuzuba bwini amwezi ooyo kwamisela milamfu iili
kkumi ayosanwe, ndendilyo eelyo mwanaambelele wa Pasika naakali kuyasilwa . . .

Kolanga amu: Great Controversy, p.
399; Patriarchs and Prophets, p. 486.

5.BUZUBA BWACISAMBOMWE BWA MVWIKI: Oobu
mbuzuba bwacisambomwe bwa mvwiki yomwe yomwe mumwaka uli woonse.

Johani 19:31-32 Aboobo, nkaambo oobo bwakali Buzuba Bwakulibambila, kutegwa
mibili itacaali kiicili aciciingano kusikila muNsabata nkaambo eeyo Nsabata
yakali buzuba bupati, bama Juuda bakalomba Pilato kuti maulu aabo akompoolwe,
akuti batolwe kooko. (Buzuba Bwakulibambila bwaambwa waawa mbuzuba
bwacisambomwe bwamvwiki, nkaambo buzuba bwakali kutobela bwakali buzuba bwa
Nsabata Mpati. Nsabata Mpati, lyakali bbala libelesyegwa eelyo Nsabata
iisekelelwa Pobwe aciindi cimwi mumwaka niswaangana a Nsabata iisika mvwiki
amvwiki.)

Desire of Ages, p. 794: Mubuzuba bwacisambomwe mbwamvwiki
eeyo bakamubona Simalelo wabo kazaya. . .

Kolanga amu: Desire of Ages, p.
769-774, 794; Intembauzyo 81:3

6.BUZUBA BWAKULIBAMBILA: Oobo lyoonse
mbuzuba bwacisambomwe, butobelwa a Nsabata yabuzuba bwaciloba iisika mvwiki
amvwiki.

Mateyo 27:62:
Lino nibwakaca Buzuba bwa Kulibambila, basilutwe babapaizi aba Falisi
bakabungana antoomwe kuli Pilato, bakati: “Mwami, twayeeya kuti silweeno uulya
kacili muumi wakaamba kuti ‘Kwainda mazuba otatwe ndiyoobuka.’ Aboobo kolailila
kuti cuumbwe cilindililwe kusikila mubuzuba bwatatu kafwide kutegwa basikwiiya
bakwe bataunki kuyoomubba akwaambilizya kubantu kuti, ‘Wabusyigwa kubafu!’
Eelyo lweeno lwamamanino oolu inga luyoobija kwiinda lwakusaanguna.”

Maako 15:42-44 Lino mbwaanga zuba lyakali afwaafwi kubbila
alimwi bwakali Buzuba bwa Kulibambila, nkokuti buzuba kaitana talika Nsabata,kwakasika Josefa waku Alemateya umwi uulemekwa wa Nkuta Mpati Yaba Juuda
uulemekwa, awalo lwakwe ooyu wakali kulindila Bwami bwaYahuwah. Wakalisungula
kuya kuli Pilato akulomba mubili wa Yahushua. Pele Pilato tanaakali kuyeeya
kuti inga kafwide kale, aboobo wakaita silutwe wabasikalumamba akumubuzya naa
wakalifwide kale.

Ootu tusimpe tuli
cisambomwe luzutu tutondezya kuti kunyina pe nikwaali kukonzya kuba
Kukankaminwa mu Friday. Muciiyo citobela ansaawa, kuli twaambo tuli cisambomwe
ooto tuyumya kutondezya masimpe aaya kakwiina kusiya nokaba kamvwule
kakudonaika.

3.Tusimpe 7-12

7.BUZUBA BWA MWEZI UUZWIDE
KUMWEKA: Mwezi Uuzwide kumweka lyoonse usikila
mubuzuba bwakkumi abwane nanka bwakkumi wabasanu bwamwezi uutobezya kuzinguluka
kwamwezi uulibonya.

Buzuba bwamwezi uuzwide kumweka lyoonse
busikila mumazuba kkumi aawone nokuba mukkumi aasanu lyamazuba, kubala kuzwa ku
Buzuba bwa Mwezi Mupya. Eeci caambilizya kuti Mwezi Uuzwide kumweka
uliswaangene abuzuba bwa Pasika mubuzuba bwakkumi abwane bwa Abibu (buzuba
bwakukankaminwa kwa Yahushua) alimwi a Pobwe lya Cinkwa Citakwe Bumena muli
bwakkumi wabasanu bwa Abibu. Mwezi uuzwide kumweka  wakasikide mu Mukubwe Kaangala 25 mu 31 A.D.
– mubuzuba bwamazubaano bwa Wednesday. Mufutuli taakali kukonzya kukankaminwa
mu Friday mu 31 A.D.

Intembauzyo 81:3-4 Lizya impeta muciindi ca
Mwezi Mupya, amuciindi ca mwezi uuzwide kumweka, amuuzuba bwa pobwe lyesu
lisetekene. Nkaambo ooyu ngomulazyo wa Isilayeli, mulawo ookwa Eloah wa Jakobo.

8.POBWE LYA PASIKA: Pasika lyoonse usikila mubuzuba bwacisambomwe bwamvwiki alimwi
mbweenya buzuba oobo mbwakkumi abwane bwamwezi, lyoonse mumwaka omwe omwe.

Bapaizi / BaLevi 23:5 Mubuzuba bwakkumi abwane bwamwezi mutaanzi kumangolezya ndipobwe lya
Pasika lyokwa Yahuwah.

Great Controversy, p. 399: Kuyasila mwanaambelele wa Pasika
cakali cimvwule citondezya lufu lwa Kristu. Mboobu mbwaamba mwaapositolo Paulu:
‘Kristu Pasika wesu wakayasilwa ndiswe.’ 1 Bakolinto 5:7 . . . . Eezyi
zikonyanyo zyakazuzikwa, kutali buyo zyintu zyaacitika, pele muciindi ceelede.
Mubuzuba bwakkumi abwane bwamwezi mutaanzi waba Juuda, mubuzuba bwini amwezi
ndeenya eelyo, mwanaambelele wa Pasika naakali kuyasilwa kwamisela iili kkumi
ayosanwe, awalo Kristu naakamanide kulya Pasika abasikwiiya Bakwe, wakatalisya
pobwe eelyo kuti asekelele lufu Lwakwe mbuli mbwali “Mwanaambelele ookwa
Yahuwah, ooyo uugwisya zinyonyoono zyanyika.”

Langa amu: Desire of ages, p. 571,
amu Selected Messages, Vol. 3, p.225.

9.WOOLA LYA KUKANKAMINWA:

• Wakagagailwa akwaanzikwa
  aCiciingano muwoola lyatatu mafumofumo aabuzuba 
  oobo ( 9:00 A.M.):

  Maako 15:25-26 Lino lyakali woola lyatatu cifumofumo, nkabela bakamugagaila.

• Mudima atalaa nyika yoonse
  akataa woola lyacisambomwe awoola lyafuka Masyikati (12:00 masyikati & 3:00
  P.M.): Mateyo 27:45-46 Lino kuzwa muwoola
  lyacisambomwe kusikila muwoola lyafuka kwakaba mudima utaambiki kusiya mbi
  atalaa nyika yoonse.

  Maako 15:33-34 Lino nilyaasika woolwa lyacisambomwe, kwababa mudima atalaa nyika
  yoonse kusikila muwoola lyafuka.

  [Yahushua] – The Final Hours, Ellen
  White: Zilengwa leza azyalo zyakafwida kweetela
  kulangilizya cakali kutola busena. Izuba lyakali kubala kusikila acilungulungu,
  mpoonya lyakaide kubaanga lyasinkililwa akuvwumbwa mudima. Koonse koonse
  kwakali mudima uusiya mbi mbuli kuti mpaakati kamasiku. Ooyu wakali mudima
  uutali wazilengwa leza nanka wakubbila zuba buyo pe cakuti wakatola mawoola
  otatwe.

• Yahushua Wakafwa muwoola
  lyafuka lyakumazuba (3:00 P.M.):

  Mateyo 27:46-55 Ciindi kacilondelela kuwoola lyafuka, Yahushua wakoongolola kuti:
  “Eli, Eli, Lama sabakitani?” Ooku nkokwaamba kuti, “Yahuwah wangu, Yahuwah
  wangu, ino wandilekezyela nzi?” Nobakamvwa boobo, bamwi akati kabaabo bakaimvwi waawo bakatalika kwaamba kuti: “Ooyu
  muntu wiita Elija.” Mpoonya aawo umwi wabo wakabalika akuleta nsinsa
  akwiinyika muwaini uulula, eelyo wakaibikka kulutete akumusyonkela kumulomo
  kuti anywe. Pele bamwi bakati: “Komuleka! Atubone naa Elija ulaboola
  kumufwutula.” [Mwaalumi umwi wakabweza sumo akumuyasa mumabambo, mpoonya
  kwakazwa bulowa amaanzi.] Alimwi Jesu wakoongolola ajwi pati,
  mpoonya  wakafwa. Mpoonya mulembo
  wamutempele wakayauka akati, kuzwa atala mane kusikila aansi, alimwi nyika
  yakazungaana, amyala yakaandauka. Aboobo zyuumbwe zyakajaluka alimwi
  mibili minji yabasalali bakafwide yakavwukkuka akulibonya kubantu
  banji.(Eelyo bantu bakali kuzwa kunamaumbwe naakabusyigwa bakanjila mumunzi
  uusalala.) Pele silutwe wabasikalumamba alimwi abaabo mbaakali limwi
  nibakali kulindilila Yahushua, eelyo nobakabona kuzungaana kwanyika azyintu
  zyakali kucitika, bakayoowa kapati akwaamba kuti: “Ncobeni ooyu wali Mwana wa
  Yahuwah!”

  Spirit of Prophecy, Vol. 3, p. 165: Muwoola lyafuka mudima
  wakayaamuka kuzwa atalaa bantu, pele wakacili vwumbilide ali Mufutuli mbuli
  cikobela. Indabo zyakalibonya aanga zyakali kuwaalilwa ali Nguwe eelyo walo
  naakaanzikidwe aciciingano. Ndendilyo eelyo Walo naakapozomoka kulila: “Mpoonya
  mudima wakayaamuka kuzwa aciciingano, alimwi mujwi limvwikisya, mbuli kulila
  kwa myeembo, eelyo lyakamvwika aanga lilainduluka kuyaa kumvwika muzilengwe
  zyoonse, [Yahushua] wakoompolola: “Cacitika.” Johani 19:30

  Luuka 23:46 Taata,
  mumaanza aako Ime ndatula muuya wangu: naakamana kwaamba boobu, wakazaya. KJV [Yahushua]
  – The Final Hours By Ellen White: Mumuni wakazinguluka ciciingano,
  alimwi busyu bwa Mufutuli bwakamweka mbuli kumweka kwazuba. Mpoonya
  wakacengamika mutwe wakwe acamba Cakwe akufwa. Inkamu yakaimwvi munsimunsi
  akulangilila yakatontwedwa mumagondo, akwiile kucaala kuti zi kunyina akuyoya
  eelyo nibaalangide aMufutuli. Alimwi mudima wakabunganinna atalaa nyika, alimwi
  kwakamvwika  kuzuma kutaambiki.
  Kwakatobelwa akuzungaanisya kwanyika kupati loko. Bantu bakayuulwa
  akubunganyigwa mumilwi mwilwi akuzungaana kwanyika ooko. Kwakaba kwaampalika
  akuzingwa kapati akucencema. Mumalundu aakali munsimunsi, makomwe aamabwe
  akaandauka akudadaulwa, kayaabukolomoka kuya munselelo mumisena iili aansaa malundu.
  Zyuumbwe zyakakwamauka akulibonya mukati, alimwi banjaanji bakafwide
  bakazikkidwe mukati oomo bakatapawidwa anze. Zilengwa leza zyoonse zyakalibonya
  aanga zyiyanda ku pwayaukila mutubeela beela twabungu. Bapaizi, baleli,
  basikalumamba, abantu bakaliko ciindi eeco, bakaile kubaanga bala cimaama
  kuyoowa kwalo, kabaalabene akuvwuntamika masyu aabo ansi.

  Aciindi calufu lwa Kristu, bamwi bapaizi
  bakali kukutauka mutempele ku Jelusalema. Bakamvwa kuzungaana kwanyika,
  alimwi  ndeenya eelyo bakabona mulebo
  wamutempele kuuyauka, ooyo wakali kwaandaanya busena busalala kuzwa kubusena
  busalalisya; wakayaka muzibeela zyobile kuzwa mujulu kusikila ansi ajanza
  ndeenya lyatakakwe bulowa eelyo lyakalemba mabala aakuti bwamweelela Belishaza
  abwaanda bwaganda mwaakali kupobweda. Busena busalalisya bwacikombelo caanyika
  tiibwakacili busena busetekene pe. Mwanaa ookwa [Yahuwah] naakafwa, wakaba ngo
  muyasilo wazinyonyoono zya nyika.

  Eelyo Kristu naakafwa aciciingano ca
  Kalivali, nzila yabuumi mpya yakajulilwa kuba Juuda abantu banamsi antoomwe
  mbweenya buyo. Saatani wakaomwa, alimwi wakalizyi kuti bulelo bwakwe
  bwakasweekela lyo.

10.POBWE LYACINKWA CITAKWE
BUMENA LYATALIKA: Eeli pobwe litola mazuba aali
ciloba litalikila mubuzuba bwa kkumi abwasanu bwa Mwezi wa Abib; lyoonse buzuba
oobu busikila mubuzuba bwa ciloba bwa Nsabata, mumwaka uli woonse.

Pobwe
lya Cinkwa Citakwe Bumena litalikila mubuzuba bwa kkumi abwasanu bwa mwezi wa
Abib, alimwi litola mazuba aali ciloba akumanina kumamanino aabuzuba bwamakumi
obile abumwi, oobo bwalo mbuzubba bwacisambomwe bwa mvwiki alimwi bwiitwa kuti
mbuzuba bwa Pobwe lya Nsabata. Buzuba bwamakumi obile abumwi ndi Pobwe lya
Nsabata alimwi buzuba butobela bwamakumi obile abwabili ni Nsabata yamvwiki
amvwiki mweenya mumwezi wa Abib.

Kulonga 12:18 Mumwezi mutaanzi, mubuzuba bwakkumi abwane bwamwezi ooyo
kumangolezya, muleelede kulya cinkwa citakwe mimena kuzwida kumangolezya
aabuzuba bwakkumi abwane bwamwezi mutaanzi kusikila kumangolezya aabuzuba
bwamakumi obilo abumwi bwamwezi ngoonya ooyo. Kwamazuba aali ciloba kunyina pe
mimena yeelede kujanwa mumaanda eenu, mbwaanga kufumbwa kuti umwi akati kenu
akalye cinkwa cilaa mimena muciindi eeco, ooyo muntu uyoozandulwa kuzwa akataa
bana ba Isilayeli, kunyina makani naa muzwakule naa muzyale wacisi.

Patriarchs and Prophets, p. 539: Pasika wakali kutobelwa amazuba aali ciloba aapobwe lyacinkwa
citakwe bumena. Buzuba butaanzi bwapobwe eelyo abuzuba bwaciloba akali mazuba
aasetekene aambungano kuti ikombele antoomwe, mumazuba aayo kwakanyina mulimo
wakeelede kubelekwa. Mubuzuba bwabili bwapobwe, micelo mitaanzi yabutebuzi
bwamwaka ooyo yakali kuletwa kunembo lya [Yahuwah]. Maila aa (barley) ngaakali
mataanzi ciindi eeco kubizwa mu nyika ya Palesitaini, alimwi kumatalikilo
aapobwe akatalikide kaindi kubizwa.

11.KULYOOKEZYA MUCUUMBWE
ANSABATA MPATI:Eeyi Nsabata yakali Nsabata Mpati,
nceciindi eelyo Nsabata iili mukati kapobwe nitalisya pobwe nokuba kumanizya
mvwiki mubuzuba bwa Nsabata, mbuli mbokubede aawa mu Pobwe lya Cinkwa Citakwe
Bumena mubuzuba bwaciloba bwa Nsabata, oobo lyoonse buli muli bwakkumi abwasanu
bwamwezi ooyo kubala kutalikila a Mwezi Mupya. (Amubikkile maanu kuti eeyi
nimvwiki njeenya yakali Kumalengelo aya Busena Busalala.) Kkalenda lina
Juliyasi lilaa mazuba aali lusele tiilyaaninga bikkwa amulawo akataa
baHebulayo, pele eeci caacitika eelyo nibaasweekelwa lwaanguluko lwacisi cabo.

Mateyo 28:1-2 Lino niyakainda Nsabata, eelyo buzuba butaanzi bwamvwiki
nibwaatalika kuyaa buca, Maliya Magadalena aMaliya umwi bakaboola kucuumbwe.
Mpoonya amulange, kwakaba kuzungaana kwanyika kupati loko; nkaambo mungele wa
Yahuwah wakaseluka kuzwa kujulu, alimwi naakasika wakakunkulisya bbwe kuzwa
kumulyango wacuumbwe, alimwi wakakkala atalaa bbwe eelyo.

Maako 16:1-3 Lino
Nsabata niyakainda, maliya Magadalena, Maliya banyina Jakobo, a Salomi bakaleta
tununkilizyo, kuti bazyoonanaike mubili ookwa Yahushua kucuumbwe. Kubucedo
kwini mafumina, mubuzuba butaanzi bwamvwiki, bakaboola kucuumbwe eelyo zuba
nilyaapasukide kale. Alimwi bakabandika akati kabo kababuzyana kuti, “Nguni
uyootukunkulisyila bbwe kuzwa kumulyango wa cuumbwe swebo?”

Johani 19:31-32 Aboobo, nkaambo bwakali Buzuba bwa Kulibambila, kutegwa mibili yabo
itacaali kiicili aciciingano mu Nsabata nkaambo eeyo Nsabata yakali Nsabata
Mpati, bama Juuda bakalomba Pilato kuti maulu aabo akompoolwe, alimwi kutegwa
batolwe kooko.

Desire of Ages, p. 769: Mpoonya [Yahushua]
wakalyookezya . . . Wakalyookezya mumawoola woonse
aasetekene aabuzuba bwa Nsabata . . . Kumatalikilo Taata a Mwana bakalilyookezyede
mu Nsabata nibaamanizya kubeleka mulimo wabo wakulenga, eelyo jilu anyika
nizyaamanizya kulengwa . . . Lino mbocalibonya boobu atalaa buzuba oobu
[Yahushua] mbwaakalyookezya mucuumbwe, nkukuti buliswaangene lyoonse akutamani
abuzuba  bwa Nsabata bwaku malengelo . .
. Nsabata yaku malengelo, buzuba oobo [Yahushua] naakalede mucuumbwe cokwa
Josefa, bucinooli buzuba bwakulyookezya akusekelela lyoonse.

12.CITUUZYO CAKUZUMBAANYA MAILA ABUZUBA BWA
KUBUKA KUZWA KUBAFU: Oobu mbobuzuba butaanzi
bwamvwiki yakatobela alimwi busikila muli bwakkumi abwacisambomwe bwamwezi
kabutobela Nsabata yabuzuba bwaciloba, mumwaka uli woonse.

Bapaizi / BaLevi 23:9 Eely mwaakunjila munyika eeyo Ime njeekamusyomezya akumupa
nywebo,  alimwi mwaakutebula munyika
eeyo, mpoonya  mukalete musunta wamicelo
mitaanzi yabutebuzi bwenu kumupaizi, alimwi walo uyoozumbaanya musunta ooyo
kunembo lyokwa Yahuwah, cifumo kayiindide Nsabata.

Maako 16:9-16 Lino eelyo naakabusyigwa
mafwumofwumo mubuzuba bwakusaanguna bwamwviki, Walo wakasaanguna kulibonya kuli
Maliya Magadalena ooyo ngwaakagusya madaimona aali ciloba. Eelyo walo
wakaunka kuyooambila aabo bakali a Nguwe, aabi bakacili koomoka mubuumba
akulila. Pele balo nobakamvwa kuti wakabusyigwa akuti wakamubonwa
anguwe, tiibakasyoma. Kunze lyaboobo, nozyakacitika zyintu eezyi wakalibonya
muciimo cimbi kuli basikwiiya bakwe bobilo nobakali kweenda kuya muminzi. Alimwi
bakajokela akwaambila batumwa bamwi boonse. Aaba abalo tiibakabasyoma pe.
Kumane wakalibonya kuli bali kkumi aumwi nobakakkede kabalya kutebulu,
wakabasinsa akaambo kakubula lusyomo kwabo akuyuma myoyo yabo nkaambo
tiibakabasyoma aabo ibakamubona kabusyidwe kubafwu. Mpoonya wakabaambila kuti: “Kamuya munyika yoonse
mukakambauke makani mabotu kuzilenge zyoonse. Ooyo uyoosyoma akubbapatizyigwa
uyoofwutuka, pele ooyo uutakasyomi uyoonyonyoonwa.

1 Bakolinto 15:20-22 Pele lino
Kristu wakabusyigwa kuzwa kubafu, alimwi wakaba ngomicelo mitaanzi yabaabo
bakali mukoona. Nkaambo mbweenya  mbuli
lufu mbulwakaboolela kwiinda mumuntu, alimwi mweenya mu Muntu mumwakaboolela kubuka
kuzwa kubafu. Nkaambo mbweenya boonse mbobayoofwa muli Adamu, alimwi
mbweenya amuli Kristu boonse mbobayooba bazumi.

Great Controversy, p. 399: Musunta
wamicelo mitaanzi, ooyo muciindi ca Pasika wakali kuzumbaanyigwa kunembo lya
[Yahuwah], wakali mukonzyanyo wakubuka kuzwa kubafu kwa Kristu. Paulu waamba
kuti, mukwaambilizya kubuka kuzwa kubafu kwa [Simalelo wesu] akubuka kwa bantu
Bakwe boonse: “Kristu wakali micelo mitaanzi; mpoonya kuyoomutobela baabo  bakwe Kristu aciindi ca Kuboola Kwakwe.”

1 Bakolinto 15:23 Pele
mbuli musunta wamaila wakuzumbaanya, ooyo wakali maila mtaanzi kubungikwa
muciindi cakubizwa maila kakutanaba kutebula, Kristu uuli njemicelo
mitaanzi  yabutebuzi bwabaabo batakafwi
alimwi aabo bayoonununnwa  mukubuka kuzwa
kubafu kucizya alimwi bayoobungikilwa mulubaya lwa [Yahuwah]. . . Mbuli
mukonzyanyo wamusunta wakuzumbaanya [Simalelo] wesu wakabusyigwa kuzwa kubafu
mubuzuba bwatatu, “micelo mitaanzi yabaabo bakali mukoona,” mukonzyanyo wabaabo
bakabusyigwa kabaluleme, aabo “mibili yabo iibolede” iyoosandulwa, akuba “mbuli
mubili Wakwe wabulemu.

Desire of Ages, p. 794: . .
.mubuzuba butaanzi bwamvwiki yakatobela bakalijana kabatajisi mubili Wakwe,
alimwi bakatamikizyigwa kuti bakabba mubili Wakwe akuusisa kutegwa bakeene
bantu.

Ootu tusimpe tuli kkumi atubili ncipego ca Kujulu kubantu
bamazubaano. Tutweetela masimpe aayo, kuti ateelelw akumvwisyigwa kabotu,
aakonzya kututondezya buzuba bwini bululeme bwa kukankamina kwa Kristu alimwi
aboobo abuzuba bwa Nsabata yamasimpe abwalo antoomwe.

4.Kukosozya Makani

Kuzwa “mutusimpe tuli kkumi atubili” swebo twatambula makani aayeeme
akukamantana kapati kuciindi cakukankaminwa kwa Kristu akusowela kooko
makkalenda woonse abubeji nokuba kutaminina kwamusyobo uli buti. Catusalalila
lino, kuti ootu “tusimpe tuli kkumi atubili” ntotwaambo tulikke tuswaangene
akkalenda lyamasimpe lyokwa Yahushua lyaku Malengelo. Mbuli ndembela yuunga
mujulu muluwo, ootu twaambo twaambilizya bulemu akulemekezya ooko Walo nkwapede
atalaa kkalenda Lyakwe litobezya mwezi azuba. Ikuti ootu “tusimpe tuli kuumi
atubili” nitwali kukonzya kukamantana akubbataikwa  mukati kakkalenda lina  Juliyasi nanka lina Gregory, nitwakapedwe
kale mazuba eeni notwaacitika kakwiina kusiya cimvwule cakudonaika. Pele
mumusela wakkumi amyaka ciloba, ooyo wakatobezya kuzwa ciindi cakali kupona
Yahushua anyika, Balemekwa ba Isaac Newton nibakalemba cintu ncibaajana lwabo
mukusanyangula makani aaya, Poopo waku Loma wakasinikizya kuti kuyandaulwe
mwaka uumbi uukonzya kuswaanganya tusimpe tumwi 
ootu ntotwali kwiiya atala aawa kuti tukonzyeke kubbataikwa mukati
kakkalenda lya Katolika waku Loma. Ooyu 
ngomusela ngotupona lino alimwi ngamakain aakacitika aaya myaka yakainda
misyoonto nobamwi kamutaninga zyalwa. Ncenciceeco asunu Cikombelo ca Katolika,
antoomwe azyikombelo zya Basikukazya, ncobayiisyila kuti Yahushua waakankaminwa
mumwaka wa A.D. 33 kuleka mumwaka wa A.D 31. Aaka takali kaambo kasyolela
mulomo pe nkaambo kalaa makani aamana mate akuyumya mukanwa kujatikizya buzuba
nokomba, ayooyo ngokomba webo.

Ambweni webo ulimvwide kuti Ellen White taakayiisya kuti kkalenda
lyoonse lyakali mwaidwe akubikkwa mucibaka calyo kkalenda lina Gregory, mpoonya
webo ulimvwa  kuti aaya makani inga
kaatali aamasimpe.

Nokuba kuti Ellen White wakalipedwe kasimpe a Mufutuli wesu
Yahushua kuti buzuba bwaciloba mbuzuba bwa Nsabata, hena inga cakonzyeka kuti,
kwakali kweezyeezya kuti oobo buzuba bwakali kwaambwa kuti mbuzuba bwaciloba
bwa Nsabata, bwakali buzuba bwamazubaano bwa Mujibelo  oobo bujanwa mukkalenda lina Juliyasi nanka
lina Gregory na? Nokuba  boobo,
tacilibonyi kuti Ellen White walaiteelelede kuti William Miller a Samuel Snow
bakabelesyede kkalenda limbi liimpene a kkalenda lina Juliyasi naa lina
Gregory, nkaambo eeli ndekkalenda lilikke walo ndyaakazyibide mbuli bunji bwesu
mazubaano. Kuti kakuli boobo, nkaambo nzi Yahushua ncaataka mululamika?

Hena ingwa mwati Yahuwah wakali kuyobweda kuyubununa kkalenda
liluleme kuti likabbukizyigwe kumamanino aaciindi na? Hena inga eelyo kkalenda
lyakali kunooli cintu caandaanya bantu bokwa Yahushua basyaalizi?

Mucilembedwe citobela eeco cakalembwa mubbuku lya Early
Writings, p 255, Muka White wakazwaa kupandulula zyintu zyakacitika eezyo
zyakajatikizyide mwaka wa 1844, akutyompokelwa kupati, pele  ambweni nkaambo kamizeezo yesu njotujisi
kale, lyoonse twakali kuyeeya kuti ootu tumpango tutobela twakali kwaambilizya
bantu bamumusela wakwe. Nokuba boobo, amubikkile maanu kuti mweengwe mutaanzi
waambilizya bantu basyaalizi aabo batobela Yahushua Mubusena Busalalisya . Bantu bajanika mbazumi
mumwaka wa 1844, bakalaa ciindi cibotu cakuba basyaalizi, pele mbuli mbotuzyi
swebo eeli bbala lya “basyaalizi” lyaamba bantu basyomeka kumamanino kwini
aaciindi, eeco cintu ncibatakabede pe. Katujisi kasimpe aaka mumizzeezo yesu,
atubikkile maanu acibeela aawo nibaalibona kuti balo (basyaalizi) bakali
kulyatauka mulawo wane, akubamba buzuba oobo mbobaapegwa abakomba mituni
batamuzyi  Yahuwah alimwi abantu
babupoopo, kuleka kubamba buzuba oobo mbwakasetekanya akusalazya Yahuwah. Hena
ncintu cikonzyeka kuti Mujibelo, kusanganya aNsondo yamazubaani, abwalo mbuzuba
bwakatusikila mazubaano kuzyaakuletelwa abakomba mituni abasyaa bupoopo?

Cakatondezyegwa kuli ndime kuti aabo basyaalizi (the
remnant )bakatobela [Yahushua] mu
Busena Busalalisya, bakabona bbokesi, a cuuno caluzyalo cabwami, alimwi
bakaankamana abulemu bwazyintu eezyo. [Yahushua] wakavwununa cimvwumbyo
cabbokesi eelyo, alimwi amulange! mukati kwakali mabwe aapapalele, amilawo iili
kkumi (Ten Commandments )
kiilembedwe ali ngawo. Bakabala kuyaansi lyamilawo yabuumi; pele bakakankamana
kabacencema eelyo nibakabona kuti mulawo wane ucili muzumi akataa milawo iili
kkumi iisetekene, alimwi kwakali mumuni uumwekesya wuungilila atalaa mulawo
ooyo kwiinda atalaa milawo imwi iili fuka, kuli mumuni uuzingulikila mulawo
ooyu . . . . Walo wakalembwa mbweenya mbuwaamvwugwa ciya ciindi niwakaambwa
amulomo ookwa [Yahuwah] mujwi lisinizyide alimwi abulemu buyoosya atalaa
mulundu, eelyo nokwakali ndabo zyakali kukwisauka amizumo yakali kuzuma, alimwi
eelyo mulawo ooyu niwaalembwa amunwe wakwe uusetekene atalaa mabwe aapapalele.
. . Bakaankamana eelyo nibakabona kubambililwa kwaapedwe ku Milawo iili Kkumi.
Bakabona milawo kiibikkidwe munsimunsi lya Yahuwah, mucimvwule cakukwabilila
akusetekana bulemu Bwakwe.

Balo (basyaalizi) bakalibona kuti bakali kulyatauka mulawo
wane wamu Mangwalo, nkaambo bakali 
kubamba buzuba oobo bwakapedwe abakomba mituni, kuleka buzuba
mbwaakasalazya Yahuwah.

Bakalitolaansi lwabo kunembo lya [Yahuwah, akulilauka kusotoka
mulawo nkobaacitide musyule lyaciindi. Ime ndakabona tununkilizyo mubusi
bwacuumpilizyo eelyo [Yahushua] naakali kutuuzya kulilekelela kwabo amipailo
yabo kuli Taata wakwe.

Mpoonya nibwaali kkunduluka kuya mujulu, mumuni uumwekesya
wakalibonya atalaa [Yahushua], alimwi atalaa cuuno caluzyalo cabwami; alimwi
aabo basyaalizi bakasinizyide, kabapaila, aabo bakapenga mumyoyo yabo nkaambo
baalibona kuti bakali bantu basotoka mulawo ookwa [Yahuwah] bakalelekwa, alimwi
masyu aabo akamwetamweta abulangizi akukkomana.

Bakasangana kubeleka mumulimo wa mungele watatu, bakoompolwesya
majwi aabo akwaambilizya kucenjezya cakusinizya. Pele kwakali buyo basyoonto
bakautambula mulumbe wabo, nokuba kuti bakazumanana canguzu koompolola makani
aamulumbe wakucenjezya.

Nkabela Ime ndakabona banjaanji aabo bakatambula mulumbe wa
mungele watatu, alimwi  abalo bakayungizya
majwi aabo kuli aabaabo bakataanguna koompolola mulumbe wakucenjezya, alimwi
bakasumpula [Yahuwah] akumulemekezya mukubamba Buzuba Bwakwe bwa Kulyookezya.

Banjaanji aabo bakatambula mulmbe wamungele watatu tiibakaninga
mvwide milumbe yabangele bataanzi bobile pe. Saatani wakalizyi kabotu makani
aaya, alimwi meso aakwe aazwide bubyaabi ageme kulanga alimbabo kuti abazunde;
pele mungele watatu wakabatondekela ku Busena Busalalisya, alimwi aabo
bakamvwide milumbe yabangele bobile bataanzi abalo bakali kubatondekela
kucikombelo cakujulu.

Banjaanji bakabona mulongo uulondokede wakasimpe mumilumbe
yabangele, alimwi bakaitambula milumbe eeyo. Bakiitambula mumulongo ngweenya
mbuyaapegwa, akutobela [Yahushua] kwiinda mulusyomo lwabo mucikombelo cakujulu.
Eeyi milumbe yakandeetelwa mebo mbuli cintu cakuti mubili ujatilile. Mbuli
bantu nsini nobatambula kuteelela milumbe eeyi balakwabililwa kuzwa kulucengo
lwa Saatani lwiindeneyindene. Early Writings, p. 255.

Koyibaluka kuti, cijuzyo cakujanya Nsabata yamasimpe cili
mukubelesya kkalenda liluleme lyamu Mangwalo. Nsabata yamasimpe ya Mulengi wesu
tiikonzyi kujanwa kubelesya kkalenda lyabubeji nokuba kkalenda lyabu poopo.
Aboobo, kkalenda linyongene = nsabata iilubide. Mbombubo mbocibede oobo!

Munzila njeenya, kuti wakalijanina nzila yakujana zintu ziyandisi
eeyo iikutola kuzingulula nyika kwiinda atalaa lwizi, kuyoojana buyo kuti
kwakwiinda myaka minjaanji kovwuntauzya akusweekelwa zyoonse zyintu zyili
kumoyo wako, eeyo nzila njookali kutobela yakali nyongene. Mbuli mbozyi kabotu,
nzila eeyo yeelede kubaa cijuzyo cakujanya zyintu ziyandisi, alimwi aawa nzilaeeyo ndikkalenda lyakuyandauzya Nsabata yamasimpe iiyandika ya Mulengi wesu.
Lyomwe buyo kkalenda ndeliluleme, kakuli limwi lilinyongene.  Lyomwe kkalenda lilakonzya kutondezyagwa mu
Bbaibbele, mumisela alimwi amuzilengwa leza. Kujanza limwi, kuli kkalenda
lyakaanzwa amuntu mugaminina kunyansya Mulengi Yahuwah alimwi eelyo kkalenda
talyeendelani akkalenda lyamu Bbaibbele lyakali kubelesyegwa muciindi ca
kukankaminwa.

Hena ncintu cikonzyeka kuti kkalenda litobezya mwezi azuba lya
Mulengi abuzuba bwaciloba bwa Nsabata inga bwateelelwa akukumbatilwa
abasyaalizi bokwa Yahuwah mbuli “kasimpe kakasweekede” kumamanino aaciindi
kwini? Ambweni muciindi cakasalwa aaba bakamboni basyomeka bakoompolola
kucenjezya ndeenya buyo aciindi eelyo nyika yoonse yaakunamatila “Kkalenda lya
Nyika Mpya.” Hena ncintu cikonzyeka kuti kkalenda lyokwa Yahuwah eelyo
litobezya mwezi azuba a Nsabata yabuzuba bwaciloba inga kazyili musunko wamamanino
kubantu bokwa Yahushua na? Ncobeni ncenciceeco ceendelana aceeco ncaakaamba
Ellen White kuti Nsabata inooli musunko wamamanino.

Kunyina mulawo uumbi ngwaakapa a Yahuwah wakubamba buzuba bumwi
kuti bulisetekene kuleka buzuba baciloba bwa Nsabata ya Mulengi wesu. Munzila
njeenya buyo, kunyina pe nikwakabede malailile kumukowa wabantu aakubamba nzila
mpya yakujanya ciindi kunze lyayeeyo Walo njaakabamba kale kumalengelo. Aboobo,
musunko wamamanino kubasyaalizi bokwa Yahuwah ulibonya aanga musunko mupati
kwiinda buyo kulisalila akataa Mujibelo naa Munsondo. Kumamanino aabo bakomba
Mujibelo nanka Munsondo bayoolibonena, kacimanide kale ciindi, kuti bakali
kulubazu lomwe boonse. Nkondo yamamanino, nkondo ya mo’ed (Armageddon) ilibonya
kuti inooli nkondo yakulwanina makkalenda, kkalenda lya Mulengi naa lyamuntu.

Nguni webo ngoyoosala? Nguni
webo ngoyookutaukila?