Mwezi
Mupya nciindi cakwiinduluka kulyaaba cakumaninina kuli Yahuwah
akulilingula mumoyo wako omukamwini. Inga oobo buzuba bulakonzya
kusekelelwa munzila zyaandeene, kutobelanya ambozyimweendela zyintu
zyakwe muntu azyintu ziyandika mumukwasyi wakwe.

*Muntu
Uuli alikke*

Kumuntu
ooyo uusekelela buzuba oobo kalaalikke, lyoonse mubuzyo uumusikila
inga waba wakuti, Hena Ime ndeelede kwaabamba buti mapobwe aasetekene
aaya? Kristu naakali kulanga mumisela iicizya kumbelaamazuba,
wakabona kuti kunooli bantu banjaanji beenda kabali balikke mumukondo
Wakwe. Walo wakabayumyayumya kwaamba kuti “² aawo
aabungene bobile nanka botatwe, Ime ambeyo nkweli akati kabo.”
Mangwalo atuyubunwida kuti boonse aabo balyaabide kutobela Yahuwah,
balipedwe mungele uubakwabilila kubagaminina lwabo beni. Eelyo muntu
ulaalikke nakanza amoyo uusinizyide kuti, uyandisya kukomba
Sikabumba, mungele ooyo uumukwabilila alimwi uuliko lyoonse munsaa
muntu ooyo, ngoumwi uupa kuti babe bobile amuntu ooyo “kababungene
antoomwe muzina lya [Kristu”, alimwi cisyomyo Cakwe aawo
cilazuzikwa cakwaamba kuti, Awalo Kristu unooliko lyoonse kufumbwa
nkwabede muntu ooyo.

Mbweenya
mbuli Myezi Mipya yoonse, abwalo buzuba butaanzi bwa Mwaka Mupya
bulilesyedwe kujatikana mumakwebo. Muntu ulaalikke inga walijaninna
zileleko zipati kuti wamanizya buzuba oobo kajatikene mukulumbaizya
Mulengi, kulisinsa akulilingula zyintu zyicili mumoyo wakwe. Cintu
cibotu cimwi muntu ncanga wacita mubuzuba butaanzi bwa Mwaka Mupya,
ncakulemba mulongo wazyintu zyoonse nzyalumbaizyila Mulengi eezyo
nzyaakatambula kuzwa mu Buzuba Butaanzi bwa Mwaka Mupya wakainda.
Ibbuku lya Ntembauzyo, lizwide mipailo mibotu iikondelezya loko
yakulyaaba akulipa cakumaninina ku Mulengi. Kubala mubbuku lya
Ntembauzyo inga caba cintu cimwi ciletela ciindi cibotu cakumanizya
buzuba oobu muntu nalaalikke. Kulemba mulongo wazyintu zyamoza /
nanka zyintu nzyolombozya akukanza kuyoocita mumwaka mupya – eezyo
zyintu webo nzyoyanda kuyooyiisyigwa nokuba kwiiya, zyintu nzyoyanda
kuyoozunda kutegwa ukalyaabe cakumaninina ku Mufutuli wako, zyoonse
eezyi ninzila mbonga webo wamanizya buzuba butaanzi bwa Mwaka Mupya
oobo kosekelela Mwaka Mupya koli olikke.

*Mikwasyi*

Mbweenya
mbuli muntu uulaalikke, ayalo mikwasyi yeelede kulanganya Mwaka Mpuya
kuti nciindi cakulyaaba akupa maumi aabo amikwasyi yabo kuli Yahuwah.
Kupaila akulumbauzya Mulengi antoomwe mbuli mukwasyi, ceelede kuba
ciindi ciindene cakuba antoomwe mumukwasyi. Mukwasyi inga wabaa
ciindi cakwiibaluka zileleko nzyowakapegwa mumwaka wakainda, akupa
kutembaula kuli Taata Wakujulu nkaambo kazipego eezyo zyakazwa
Kujulu. Cimwi cintu ciindene cikonzya kucitwa muciindi eeco,
ncakulemba mulongo wazyintu zyamoza eezyo zijatikizya mukwasyi woonse
antoomwe. Mazuba Aasetekene aalo nciindi cibotu cakuswaanganina
antoomwe mumipailo yamukwasyi.

Mipailo
yamukwasyi iliindene amipailo yamuntu nalaalikke, mukuti boonse aabo
bayanda kusangana kupaila antoomwe amukwasyi inga bakonzya kusangana.
Pele eeci tacili cilengwa cakoompolola kupaila bantu boonse aciindi
comwe kusikila ayanda kusinka matwi eeco cicitika mazubaano, nkaambo
inga tookonzya kululamika mizeezo yako mbwaanga bantu bamwi bali
munsi lyako balayobeka. Pele, muntu omwe ulakonzya kutalika mupailo,
mpoonya muciindi cakuti boonse baambe kuti “Akube boobo”, alimwi
umwi ulainduluka kutalika mupailo umwi kaamba cimuminyide kumoyo
wakwe. Eeci inga camvwikaanga kuba cintu ceenzu nokuba kuusisya nsoni
kuli bamwi batazyibide kupaila kuti kacili ciindi cakutaanguna kusola
kupaila boobo, pele kuti mukwasyi waiya akuzyibila kupaila munzila
eeyi, inga caba cintu ciletela zileleko zipati loko! Kuleka buyo kuti
mizeezo yako kiyaa kusabaila eelyo muntu omwe buyo uucipaila
nacilongomona kupaila zyili mumoyo wakwe, webo mizeezo yako inga
wiilulamika kugama cintu comwe eeco ncoomvwa kacipailwa nokuba ceeco
cakubbatamusya mumizeezo yako mbweenya mbuli Moza wa Kristu
mbuukweendelezya mumoyo wako. Kupaila munzila eeyi inga waba mubandi
akataa bantu boonse bakoteme kupailila antoomwe a Taata uuli Kujulu.
Maminiti aali kkumi, nanka makumi otatwe inga caba ciindi ceelede
ncuuutola kupailwa mupailo, kapati eelyo balongwenyina nobabungene
nokuba mukwasyi uuyiya kupaila munzila eeyi. Eelyo bana nobayaa
kulimvwa kabotu akuliiba kupaila munzila eeyi, abalo inga basangana
kupaila, alimwi eeco inga caba cileleko cipati cikondelezya mukwasyi
woonse.

Bantu
bakomba Saatani balanganya buzuba bwakuzyalwa kwamuntu kuti mbuzuba
bupati mukusekelela kwabo mukati kamwaka. Aboobo, kusekelela kwa
Mwaka Mupya inga kwacitwa mukupana zipego ziiminina cintu cili
kumoyo, kuleka zilengwa zyanyika zyamapobwe ateendelegwi; eeci
ncintu ncobakondelwa kapati akusekelela bana.

Eezi
zipego tazyeelede kuba zinjaanji nokuba kudulisya mali manji pe. Pele
cipego eeci cikulwaizya mwana muzyintu eezyo nzyayandisya, nokuba
ceeco cimugwasyilizya kuti akonzye kulimvwa kuti ulayandwa
akubikkilwa maanu mbuli umwi akataa mukwasyi, eeeco inga caba cipego
cikubwene cikonzya kumuletela kukkomana akulanganya buzuba oobo kuti
bulaandeene.

Nkaambo
kakuti ncitu ciyandika kapati kubana kuti bajane kukkomana
mukwaabilana zyintu, tabeelede kwiindwa ambali kuti batole lubazu
mukuula nokuba kubamba cipego cabazyali babo. Kukkomanina kaambo
kakuti abalo balakonzya kupa muntu ngobayanda cipego, inga cabapa
kuti oobo buzuba bube buzuba buyandisi bwiindene kubana aabo; nkaambo
kamyoyo yabo iijisi luyando, nceciindi eeco nobakonzya kulitondezyela
lwabo mbuli mbobayanda kucitila bamwi mukutondezya luyando lwabo.

*Mutubunga
bunga*

Mbweenya
mbuli muntu nalaalikke, amwalo mutubungabunga inga bantu bakondelwa
kubala bbuku lya Ntembauzyo. Kuti mikwasyi yobile nanka minjaanji
yabungana antoomwe, inga kwalombozyegwa kuti mukwasyi omwe omwe
uletelezye Ntembauzyo yakwaabanya eeyo iili kumoyo wamukwasyi ooyo.
Nkabela muntu omwe omwe uuli mumukwasyi ooyo, ulaa ciindi cibotu
cakwaamba ntembauzyo eeyo iili kumoyo wakwe. Nyimbo zyakulumbaizya
akulyaaba azyalo zyeelede kutola busena mukukomba amumipailo. Mbuli
mbobuli buzuba bwakulisetekela kuli Yahuwah, inga caba cintu ceelede
kuswaya bantu bamwi bali munkamu akuyooma ambabo lusyomo akulangila
kwabo mumwaka uucizya.

Kupaila
mumbungano, mbweenya mbuli kupaila mumukwasyi, inga caba cintu
camaanu akukondelezya kuti boonse kabapailila antoomwe, kuleka buyo
kupaila muntu omwe omwe kuzinguluka nkamu yoonse iibungene. Cilengwa
cakuti muntu umwi aumwi kalyaambawida kufumbwa ncayanda mumoyo wakwe
mbuli Moza wa Kristu mbuumukulwaizya (kuleka kulindila kisikila
boonse bamanizya, nanka kuti wasikila mpaluba ncaayandide kwaamba),
ncecintu cibotya ciindi cakupaila muciindi eeco. Kumanizya mupailo
aMupailo wa Simalelo, inga caba cintu cilibotela kapati
cakuswaanganya kabunga nokuba mukwasyi kuti umanizye kupaila.

Buzuba
bwa Mwaka Mupya mbuzuba bulibotela kapati kulangila mwaka uucizya
kumbele akulyaaba muntu lwakwe kuli Yahuwah, akwaaba buumi bwakwe
abwamukwasyi wakwe ku Mulengi Taata Wakujulu.

Mubuzuba
bwakkumi abwane bwa mwezi mutaanzi kumangolezya, ngu Pasika ookwa
Yahuwah. (Bapaizi
23:5)

Pasika
nciindi cimwi ciinda kulemenena mumwaka woonse. Kwiinda buyo kuba
ciindi cakwiibaluka kunununwa kuzwa mubuzike ku Ijipita, nceciindi
cakwiibaluka kunununwa kuzwa kucinyonyoono. Ciindi ca Pasika
nceciindi eelyo Kristu naakafwida nduwe andime mbwaanga Walo ngo
Mwanaambelele ookwa Yahuwah uugwisya zinyoonyono zyanyika. Kunyina
abumwi buzuba mumwaka woonse bulibonya kulampa mbuli bwa Pasika
kumoyo wiibaluka pobwe eeli.

Buzuba
bwa Bbaibbele bwakali kutalikila kubucedo, aboobo woola “lyatatu”
lyabuzuba lyakali kweendelana alyamazubaano lya 9 koloko, naa
akatikati kacifumofumo asyikati. Mangwalo aamba kuti Kristu
wakagagailwa munsaa woola lyatatu. A 9 koloko, ime nkeibaluka
ncaakali kucitilwa Kristu mucibaka cangu, ncintu cindiletela
kulemenena kwa woola eelyo. Mbuli woolya litobela nolizyaabuswena,
nkezyibide kuti Kristu wakali pengede akuciswa mumoyo wakwe nkaambo
kamukuli wazinyonyoono cakuti taakacimvwide akucisa kugagailwa, muntu
inga walibonena ncobeni mbocisofweede kapati cinyonyoono.

Aciindi
ca 11 koloko. Kristu kacili aciciingano. Kacifwekemba kuyoya.
Kacisulaikidwe a Taata Wakwe nkaambo kandime, akaambo kazinyonyoono
zyangu, ncintu ciletela kulyaaba kwamuntu cakumaninina ku Luyando
luli loolu.

Syikati.
Mudima wakavwunikila ciciingano. Mawoola aabuzuba oobu ayaakulelema
kweenda asyoonto syoonto eelyo muntu naibaluka kuti oobu mbobuzuba
bwini Mufutuli naakafwida nduwe!

3
koloko. Kristu wakafwa muwoolya lyafuka lyabuzuba oobo, naa 3 koloko
wamasyikati. Aciindi eeco kufumbwa cakeelede kucitwa munzila
yalufutuko cakacitika. Mwanaa Yahuwah wakazunda cibi. Bulowa
bwakununuzya oobo butuzumizya kuba antoomwe a Yahuwah, bwakasweka.

Nokuba
boobo, Pasika tabuli buzuba bwakwiile kukkede kakwiina cakucita.
Mupobwe lya Cinkwa Citakwe Mimena eelyo litalika buzuba butobela
waawo, mimena yoonse yeelede kugwisyigwa kuzwa mumaanda.

Mimena

Misyobo
ya cakulya cakalaa mimena yakali zyakulya zyibambidwe amaila. Nkaambo
zyakulya zyiliindene akataa masi manji, anzila yakubamba zyakulya
eezyo, ncintu cilaa maanu kubala cilembedwe atalaa civwumbyo eeco
caambilizya zintu zyili muli cakulya eeco.

Mimena
ilakonzya kwiitwa mazina aayindene, kusanganya abumena, mimena
yakubambya cinkwa, lusu lwakufutumizya cinkwa. Mulimo wamimena wakali
wakufutumuzya cakulya kuti cibe cuubauba alimwi cilibonye kuba
cipati. Ncenciceeci mimena nciilanganyigwa mbuli mukonzyanyo
wacinyonyoono mubulemu bwakujulu, nkaambo cinyonyoono kuti canjila
mumuntu woonse ncecipa kucinca ciimo cakwe kuti alitukumune
akuliyandisya. Yoonse mimena iisandaudwe amimena yakukumbya bukoko
(yaambwa kuti mimena yakusanganya muli cakulya) ilabelesyegwa
kanjaanji kusakamuzya cinkwa. Aboobo eeyi mimena yamusyobo ooyu,
tiijisi nguzu zyakufutumuna. Ncintu cili mumaanza aamuntu kuti
alisalile mwini kuti naa eeyo mimena iibikkidwe muli cakulya kuti
cisakamuke naa yeelede kweelebwa. Aabo batalyi nyama bayanda kubamba
pobwe inga babelesya mayi mucibaka camimena.

Misyobo
yazyintu zyisanganyigwa muli cakulya yeelede kulangisyigwa, alimwi
mulongo wazyintu eezyo tuumanini ali zyeezyi zyitobela ansaawa:

*
Zisanganyigwa mucinkwa –antoomwe azisanganyigwa mumabbisiketi,
tunkwa tupapalele atunkwa tubundumene

*
Zinkwa: yoonse misyobo yazinkwa nokuba cibundumene, cipapalele,
civwukumene, cikokobele, cibbalaikidwe azimwi zinjaanji.

*
Maila aaligwa kaatontola

*
Tunkwa tuyumu tubumbuluka

*
Zyilweela: makkekke, mabbisiketi azimwi.

*
Zyakulya zyiyobolwa mucanda: mbuli tunkwa tunona tuubauba, tunkwa
tuteteete tukangidwe aasyoonto azimwi.

kusanganya
a mimena, lusu kwakufutumuzya – kufumbwa eeco cibelesyegwa
kufutumuna busu bukandidwe. Kumukwasyi nanka kumuntu ulaalikke, eezyi
zyintu zyilakonzya kumanizyigwa kalitaninga sika pobwe, nanka
kuyobolwa mukkoce anze.

Nokuba
boobo, kuti muntu naa mukwasyi kuukamantene, kuvwuntauzya ŋanda
yoonse kuyandaula mimena inga caba caambyo citondezya mbuli
mbotweelede kuvwuntauzya maumi eesu kuti tugwisyile anze cinyoonyo
kuzwa mumyoyo yesu. Ncintu cinyandya kubona bunji bwazyakulya zilaa
mimena!

Kumangolezya,
mukwasyi woonse inga wabungana kulya mulalilo wiindene wa Pasika.
Eeco nceciindi aabo beenzuma balaa myoyo iiyandisya kasimpe
nobatambidwe kusangana muciindi cisetekene eeco. Kunyina nzila
iiluleme nanka iitaluleme yakubamba Pasika. Nkaambo, Mwanaambelele
ookwa Yahuwah wakayasilwa kale, kucinyina kujaya mwanaambelele. Bana
bambelele bakali kutondeka buyo ku Mwanaambelele ookwa Yahuwah.
Bulowa Bwakwe lino bulitilidwe kale, pele tuciibaluka ciindi eeco
nicaacitika muluyando lwa kulumba caabilo Cakwe mucituuzyo cipati.

*Kusanzya
matende*

Mulalilo
ooyo Kristu ngwaakatalisya mu Mulalilo ngwaakalya kaindi kasyoonto
akukankaminwa Kwakwe, ninzila mbotu yakukomba muciindi eeco. Kusanzya
matende akwalo ncilengwa cibotu. Kusanzya matende mukonzyanyo
wabulowa bwa Kristu oobo butusanzya zinyonyoono zyesu. Mbuli Yahushua
mbwaakasanzya basikwiiya, aswebo tweelede kusanzyana kuzituta
kutondezya luyando lwa Kristu mumyoyo yesu, oolo lutukulwaizya kucita
zintu zibotu akucitila umwi aumwi zibotu.

Nokuba
kuti muntu katakwe muntunyina wakuti basekelele pobwe eelyo antoomwe,
kunyina kaambo walo ncatakonzyi kulisanzya matende aakwe mwini. Tee
kayi, nciibalusyo cakusanzyigwa ooko Kristu nkwatucitila umwi aumwi
wesu. Imwi mikwasyi ilasekelela kwiinda mukwiimba nyimbo eelyo
kabamanide kusanzyana kumatende.

*Mulalilo
wa Pasika*

Bantu
baindene balaa nzila ziinjaanji zyakusekelela Pasika kuti ube
wamaanu. Imwi mikwasyi iyandisya kulya buyo eezyo zyilembedwe mu
Mangwalo aciindi ca Pasika. Akataa zyakulya “mumulalilo” kuli
musinza wamasaansa, cisyu mani cilula, cinkwa citakwe mimena, munyo
amwakusunsa cinkwa. Eezyi nzyintu zyakulabila buyo pele kutali
kuligwa mumulalilo. Imwi mikwasyi, kapati eeyo ilaa bana basyoonto,
iyandisya kulya mulalilo, akusanganya zyakulya eezyo zyakali kujanwa
muzyiindi zya Bbaibbele. Kunyina nzila iiluleme naa iitaluleme
yakusekelela Pasika. Kaambo keni nkakujana nzila eeyo iikubelekela
amukwasyi wako alimwi eeyo iikwiibalusya Kristu, Pasika wesu
wamasimpe.

*
Musinza wasaansa: wiiminina bulowa bwa Kristu oobo butusanzya kuzwa
kuzyinyonyoono zyesu.

*
Cisyu mani cilula: mukonzyanyo wakulula kwacinyonyoono eeco cakapa
kuti Mufutuli wesu atufwide. Cisyu citeteete nceceelela kubelesyegwa
aawo, pele kuti kakunyina ciliko, acalo cakagaigwa kuba lusu nokuba
caampidwe inga cajata mulimo. Ceelede kulula ncobeni mbuli mululwe
nanka musampizya, nkaambo cintu ceelede buyo kulabilwa amulaka kuleka
kuligwa. (Kuti mukwasyi wasala kucita boobo, bana basyoonto beelede
kucenjezyegwa kabataninga labila. Aawa kaambo keni nkakuyiisya,
kuleka kulizya mwana pe.) “Cisyu mani cilula” cilakonzya kubambwa
kwiinda mukutendaula matuvwu aacisyu ciligwa lyoonse amukwasyi,
kufumbwa cisyu, akucivwelanya amusinza wamalemani amunyo. Mulalilo
nuuligwa, zyoonse eezyi inga zyapandulwidwa kubana basyoonto
ncozyiiminina alimwi musalo uukubwene inga watola busena akataa baabo
babungene.

*
Cinkwa citakwe mimena: Mukonzyanyo wa Bbaibbele wamimena kwiiminina
cinyonyoono weelede kupandulwidwa beenzu abana babungene akataawo.
Cinkwa citakwe mimena cakaligwa abana ba Isilayeli mangolezya
kabataninga yaamuka Ijipita. Bakagwisya mimena yoonse mumaanda aabo
kabataninga nununwa. Munzila njeenya eeyi, bantu bamusela wamamanino,
abalo beelede kulilingula mumyoyo yabo, kwiinda mubulowa bwa
Mwaanambelele, akugwisya cinyonyoono cili coonse kuzwa mumyoyo yabo
akulibambila kunununwa kupati kuzwa munyika yacinyonyoono eeyi.
Cinkwa citakwe mimena cilainda kubota kuti cabambwa abusu bwacinkwa
bwamaila aatakwaapwidwe busenga. Ncintu cuubauba kubamba busu bunono
oobo.

*
Munyo:/ Munyo wiiminina misyozyi yakweempwa. Eelyo muntu kamvwide
cinyonyoono mbocilula, kuumbulizyigwa ooko kuli muli Kristu
kulamusikila, akumutamba kuti alyaabe cakumaninina kutegwa anjile
mukukkomana amuluumuno luzyila kuli Yahushua. Aabo bayanda kulya buyo
mulalilo wazikonzyanyo, katiba kajisi munyo inga kakayaa kutambikwa
kuli umwi aumwi kuti abweze kasyoonto amunwe kuti alabile. Tutiba
tusyoonto tulaa munyo inga twabikkwa munsaa muntu omwe omwe uubungene
munkamu. Munyo uuzyila mulwizi mubotu kapati kuti muntu kakonzya
kuujana .

*
Cakusunsa: eeco cakusunsa cinkwa ncintu cilweela. Mumulalilo
wamamanino kataninga fwa Kristu, eelyo Johani wakacengamina kuli
Yahushua akumubuzya cigaminina kuti nguni uyoomwaaba Walo, Kristu
wakamuvwiila kuti ooyo uusunsila aciindi comwe anguwe muli cakusunsa
ngonguwe uumwaaba. Cakusunsa, zimwi ziindi cakali kwiitwa kuti
charoset/haroset, ncikandi cibambidwe kuzwa kumicelo miteteete nanka
yaampidwe: mbuli nkuyu, masaansa aakayuma ayimwi micelo. Misyobo
yanzubo zinjaanji ilacibamba munzila ziindene, kweendelanya amicelo
iijaninwa mumabazu aanyika oomo mukkalwa.

Mumikwasyi
iilombozya kulya mulalilo uukkwene mbuli muziindi zya Bbaibbele,
zyakulya zimwi zyilidwa antoomwe amulalilo zyili mbuli musinza
wanyungu, mafuleenke, masaansa, nkuyu ayimwi micelo iitazyidwe
mucitonga. Cisyu mani cilula, amimena yasenke ileelela kulida
antoomwe acinkwa.

Kuli
baabo balisalila kulida mulalilo uukkwene antoomwe a Pasika, eelyo
wamana mulalilo nokusika cintu cini cilaa maanu mangolezya aayo:
mulalilo ulalilgwa cinkwa citakwe mimena akwaabana nkomeki yokwa
Yahushua. Nokuba kuti cinkwa citakwe mimena cakali cibeela
camulalilo, alumwi lubango lwacinkwa eeco luleelede kubambilwa
cilengwa camulalilo cini. Ooyo uutambula beenzu, mbuli mbucaabede,
nguupa cakubala mumangwalo, kanjaanji kuzwa aawo mpokulembedwe
mulalilo wamamanino. Eeci nciindi cisetekene.

Kwaabana
nkomeki yakunywida Yahushua, ncecintu ceebeka mangolezya aayo. Kuti
mukaintu ulaamunzi kajisi nongo nokuba nsuwa mpati, nanka kulomba
kuli yooyo uujisi, ncecipa kuti nkomeki yokwa Yahushua ibe yaandeene.
Kristu wakaambila basikwiiya kuti, “Kamucita oobu mukwiibaluka
Ndime.” Eeci nciindi ciciliko kubatobeli Bakwe.

Muntu
omwe ulatalisya kunywa kuzwa munkomeki, ulapukuta mpaali kunywida
akalembo kapedwe kakupukutya akutambika muntu uumutobela. Mbweenya
oobo Yahushua mbwaakaambila basikwiiya, “Kamunywa eeci inywe
nyoonse,” aboobo kunyina weelede kwiindwa ambali kunywa “bulowa
bwa masaansa” nkaambo eeco ncecikonzyanyo cabulowa bwa Kristu oobo
bwaatililwa zinyonyoono zyesu. Mikwasyi minjaanji ilisalila kuti bana
balindile kusikila kabala myaka yakuzyalwa iili kkumi ayibili eelyo
nobanga batola lubazu kulya mulalilo akunywa munkomeki, nkaambo mwaka
wakkumi ayibili ngomwaka ooyo mwana nakonzya kubaa milandu mubuzumi
bwakwe kuli Yahuwah.

Eelyo
mulalilo wamana kuligwa, mupailo wakulyaaba weelede kupailwa alimwi
boonse beelede kutola lubazu mumupailo ooyo, kabalumba Yahushua
cituuzyo cipati Cakwe, aluyando lwa Taata lupati boobo mukuyandisya
kupa mwana Wakwe kuti anunune babisyi. Kuli nzila zinjaanji
zyakumanizya ciyanza eeci, kubikkilizya akuleleka baabo babungene
waawo, kabalelekwa amusololi, uutambula beenzu, bazyali, bana
baswaya. Eeci cinga caba cibalo cizwa mu Bbaibbele nokuba majwi aakwe
buyo mwini. Mangwalo aamba kuti eelyo mulalilo niwaamanizya kuligwa,
Yahushua abasikwiiya bakaimba lwiimbo akuunka anze. Oolu tiilwakali
lwiimbo lwamalila pe, lwakali lwiimbo lwakukkomana. Kristu
wakalikkomene naakali kuyeeya bantu banjaanji, amiya minjaanji
iyoofutulwa kwiinda mucituuzyo Cakwe. Mazubaano, nokuba kuti swebo
tucoomokela zinyonyoono zyesu eezyo zyakapa kuti Kristu atupe
cituuzyo cipati boobo kutegwa atununune, tulikkomane kuti Kristu
wakazunda alimwi tulakonzya kunununwa kwiinda mukusyoma bululami
Bakwe

*Zintu
zinga zyacitwa:*

Muntu
umwi aumwi, mukwasyi nanka kabunga keelede kwaanguluka kubamba ciindi
eeci kuti cibe ciindi ciindene bulemu alimwi ciiminina zinjaanji
kapati kuli mbabo. Bantu bamwi bakkomanina kuyala ngubo zyamisyobo
misyobo ansi akusomba cakulya mumitaanga iikwakwabele. Bamwi
bakkomanina kubelesya mitiba atulembo ooto ntobayandisya kumoyo.
Kuyasya nkandela cipa kulibonya kabotu zyintu, kufumbwa cibelesyegwa
nanka tugabba twa kkulusitolo, nanka mabbodela alambaidwe misyobo
yiindene.

Pobwe
lya Cinkwa Citakwe Mimena litalisyigwaa mipailo yiindene lyoonse
mubuzuba bwa Nsabata, oobo busikila muli bwakkumi abwane bwamwezi
mutaanzi, nkakaambo aako ncoliitwa kuti Ninsabata Mpati.

Ndipobwe
litola mazuba aali ciloba, kusikila muli bwamakumi obile abumwi
bwamwezi ooyo. Kuli milazyo yeelede kutobelwa eeyo iigaminina buyo
pobwe eeli. Muciindi eeci, kunyina pe mimena yeelede kuligwa. Kwiinda
buyo kuba Pasika, eeli pobwe lisekelela kunununwa kwabana ba
Isilayeli kuzwa mubuzike alimwi, akunununwa kwesu kuzwa
kucinyonyoono. Pobwe lya Cinkwa Citakwe Mimena tacili ciindi ca
kuleka kubeleka milimo, pele lilakonzya kuba ciindi ciindene cakuba
aamukwasyi antoomwe, ziindi zya mukwasyi kubeda antoomwe, muziindi
zyakukomba azyakusekelela.

Mu
Pobwe lya Cinkwa Citakwe Mimena, kuli zyintu zyotatwe zipati : (1)
buzuba butaanzi bwa Pobwe lya Cinkwa Citakwe Mimena mbuzuba bwa
Nsabata Mpati muli bwakkumi abwasanu; (2) buzuba bwabili mbuzuba
bwakutuuzya Maila Aakuzumbaanya, alimwi bwiitwa kuti Pobwe lya Micelo
Mitaanzi (oobo mbuzuba Yahushua naakabuka kuzwa kubafu, muli bwakkumi
acisambomwe); (3) buzuba bucaalizya bwa Pobwe mbuzuba “busetekene,”
muli bwamakumi obile abumwi abwamakumi obile abubili bwamwezi
ngweenya. [Woonse mazuba aaya abalwa kubelesya kkalenda lyoka Yahuwah
litobelezya Mwezi-azuba antoomwe.]

“Eelyo
inywe mwaakunjila munyika eeyo Ime njeekamupa, alimwi mwaakutebula
butebuzi bwanyika eeyo, nkabela mukalete musunta wamaila wabutebuzi
bwenu ku mupaizi, mpoonya walo uyoozumbaanya musunta ooyo kunembo
lyokwa Yahuwah, mubuzuba butobela Nsabata.” (Bapaizi 23:9)

Paulu
wakazumina kuti cinkonzya cakubuka kwa Yahushua mu Pobwe lya Micelo
Mitaanzi eelyo walo naakati:

Pele
lino Yahushua wakabuka kuzwa kubafu, alimwi wakaba micelo mitaanzi
kuli baabo bakoonede. . . . Nkaambo mbweenya mbuli kwiinda muli Adamu
boonse mbobafwa, mbweenya akwiinda muli Yahushua boonse mbobayooba
bazumi. . . . Yahushua walo ngomicelo mitaanzi; mpoonya kutobela aabo
bakwe aciindi cakuboola Kwakwe Yahushua. (Langa 1 Bakolinto 15:20,
22-23.)

*Buzuba
butaanzi bwa Pobwe lya Cinkwa Citakwe Mimena*

Akataa
Nsabata zyoonse mumwaka, Buzuba Butaanzi bwa Pobwe lya Cinkwa Citakwe
Mimena bulainda kubaa bulemu. Mbuzuba bwiibalusya buzuba oobo Kristu
naakalede kucuumbwe. Ma! Butalilampili buzuba oobo eelyo muntu
naibailuka basikwiiya mbubaalisukete akugwitila kulilila mucamba
mumyaka minjaanji eeyo yakainda! Tiibakateelede kuti Mesiya wakalaa
mulimo wakufwida banji, cakuti eelyo naakafwa, kutunuka abuumba,
kumyongwa mwida kwabuusu akutyompokelwa kwabajata akubaminya mumyoyo
yabo.

Mbuli
mawoola aabuzuba bwaciibalusyo oobo naayaa kwiinda, muntu inga
taaleka kuyeeya, lyoonse alyoonse, kupyopyongana, buumba akubulila
lyo bulangizi ooko nkubaalimvwide mumyoyo yabo basikwiiya. Oobu
mbuzuba bwakwiibaluka kupyopyongana amalilwe woonse aangaa
kaazambaide nyika yoonse kuti nilwatali luyando lwa Taata lwakainda
akati. Nciindi citontomeka moyo eelyo muntu nasola kweezyeezya
mbocicisa cinyonyoono.

Mulawo
ookwa Yahuwah mulondo. Ncecintu cilembedwe eeco citondezya mizeezo
yambwalimvwide Ooyo Uutamani. Kucinca mulawo ooyo inga kwaba kuzumina
kuti kuli kampenda muli Yooyo ulaa ciimo caambwa mumulawo ooyo.
Ncencico eeci mulawo uusetekene ookwa Yahuwah ncuuli mulawo wa
Luyando, Luyando Lutamani lwakajana nzila yakunununa babisyi:
cituuzyo cini ca Luyando Lutamani ncakutwaabila Mwana kuti atubbadele
mulandu wesu tobabisyi.

Saatani
kujulu wakasulaikide Kristu nkaambo kalubazu ndwaakapedwe munkuta
zyakujulu zyokwa [Yahuwah]. Wakali kucimwa akaambo ka Nguwe kapati
eelyo naakatandwa kuzwa kujulu. Wakacimwa nkaambo ka Yooyo wakalyaaba
kuti Lwakwe uyoonununa mukowa wababisyi. Pele munyika eeyo Saatani
mwaakalidundauka kuti nguuyendelezya, [Yahuwah] wakazumizya Mwana
Wakwe kuti aboole, kali mwana muvwanda uutajisi awumugwasya, kakonzya
kuciswa akubula nguzu mbuli bantu boonse baansi aano. Walo
wakamuzumizya kuti anjile muntenda zyabuumi ansaano mbuli bantu
boonse, akulwana nkondo mwanaa bantu uli woonse njalwana, akuba
muntenda yakwaalilwa kucita ncakaboolela akusweekelwa zyoonse.¹

Yakali
nkondo iini eeyo Kristu njaakanjila alimwi eeyo Walo njaakali kunga
waalilwa kuzunda. Kuti Kristu, nokaba kaindi komwe buyo, nokuba
mumizeezo yakwe buyo, naakazumina kucita cinyonyoono, amwalo
mumizeezo Yakwe naakaalilwa kuzunda nkondo eeyo. Saatani
naakamuzunda, alimwi cinyonyoonyo nicakayambukila mulengalenga
woonse. Kristu a Taata bakalisungula kubikka buumi bwa Kristu bwini
mukulwana nkondo eeyi. Kuti Kristu naakabisya, naakatambula bulumbu
bwacinyonyoono: kufwa kutamani.

Moyo
wabuntu ookwa Taata ulalangila mwanaakwe. Walo ulalanga mubusyu
bwamwanaakwe musyoonto, akukankama nkaambo kantenda zyabuumi. Walo
ulangila kuti asitilile muyandwa wakwe kuzwa kunguzu zya Saatani,
kumukwela akumulesya kunjila masunko aakulwana. Pele kutegwa akeelele
kunjila munkondo iilula boobu, antenda iiyoosyela limwi, [Yahuwah]
wakapa Mwanaakwe alikke, kutegwa nzila yabuumi ibambilwe baabo
bacilli bavwanda. “Ndoolu luyando” Amukankamuke nomajulu!
Konyandwa webo Onyika!²

Taata
wakalisungula zyoonse kuti atununune swebo. Iswe tatubwene mbocilaa
butongo cinyonyoono. Pele teekayi tobanji tucikkede cakuliiba
mucinyonyoono. Eeco ciibalusyo cili muNsabata, ncakutuletela cintu
citwiibalusya muulo ooyo Eloah a Mwanaakwe ngwaakabbadela kuti swebo
tufutulwe. Kristu kwiina pe ncaakabwene kumbelaa mazuba kwiinda
acuumbwe. Kulemenwa zinyonyoonyo antoomwe amilandu kwakamulemena
kapati cakuti Walo wakalimvwa aanga kunyina pe alimwi nanga
kayootambulwa kuboola kabili kunembo lya Taata. “Nkokulemenwa
zinyonyoono ooku, kwakapa kuti eeyo nkomeki yabukali bwa Taata ali
Nguwe mucibaka cababisyi, kuti imululile boobo, akupa kuti moyo Wakwe
Mwanaa [Yahuwah] uuse cakuti wakakosoka.”³

Luyando
lwa Singuzuzyoonse, Taata Uutamani alimwi Uusetekene lwakali lwakuti
Walo wakali lisungwide kusweekelwa cili coonse kuti anunune babisyi
aabo bakeenwa akunjizyigwa mucinyonyoono. Mukulyaaba kwantenda mpati
kudulisya kapati boobu, luyando lwa Kristu lwakali lupati cakuti
wakalilyaabide kusweekelwa buumi Bwakwe bwakukkala lyoonse kutamani a
Taata Wakwe. Kuumuna kuti zi, amanyongwe aakacitika buzuba oobo
Kristu naakali mucuumbwe, ncintu cisyoonto buyo cakali kutondezya
nyika yoonse mbwiinga yalimvwa kuti kakunyina Mufutuli wayo.

Luyando
lwamusyobo ooyu, ndupati kapati alimwi lulasalala; nuuba moyo muyumu
aanga ndibbwe nkaambo kacinyonyoono inga weetela kuluyando lwamusyobo
ooyu. Mbuli muntu eelyo nalibonena bulamfu abufwaafwi bwaluyando
lulyaaba boobu, Luyando lwabulemu bwakujulu, walo inga wabona kuti
ncintu cilaa maanu kulyaaba cakumaninina kukweendelezyegwa aLuyando
oolo, akulisalila kuleka kupona mucibaka cakwe, kwiinda kuti walo
apone kakwiina mufutuli uulaa luyando luli boobo.

*Ndoolu
Luyando*

Ndoolu
luyando – lupati mbuli lwaanje,

Lubomba
lwaluyando luli mbuli zambangulwe!

Eelyo
mwanaa mwami wabuumi,

Cinunuzyo
cesu, ooyo waatilila ndiswe

Bulowa
Bwakwe buyandisi.

Nguni
uunga Luyando Lwakwe talwiibaluki?

Nguni
uunga waleka kwiimba kutembaula Nguwe?

Walo
kunyina nanga walubwa

Mumazuba
aajulu woonse aatamani .

Amulundu
wakukankaminwa

Tusensa
tupoomoka bulamfu akukwazamuka.

Kwiinda
mumilyango yamazambangulwe

Aalubomba
lokwa Yahuwah, kwakakunka

Akukunka
guwe lyaluse.

Luse
aluyando mbuli milonga mipati

Kalupoomoka
akutaleka kuzwa kujulu!

Aluumuno
lwakujulu

Abululami
bukkwene

Bwakamyonta
nyika ilaa mulandu.

 
*Ndoolu
luyando: (audio)*

*Zimwi
zinga zyacita:*

Pobwe
lya Cinkwa Citakwe Mimena inga lyaba ciindi cibotu camukwasyi kubeda
antoomwe. Kukomba mumikwasyi inga cagamika maanu kuluyando lwa Taata
oolo ndwatutondezya mubuumi bwa Yahushua. Ciindi cibotu cakubikka
ambali zyintu zyakucita mumukwasyi, inga zyapa kuti eeyi ibe mvwiki
yiindene mumaumi aabana akukwelela myoyo yabo munsaa bazyali babo
akubaangilila antoomwe muluyando. Nokuba kuti mazuba aapobwe taakali
Nsabata woonse, pele buzuba bucaalizya ni Nsabata, nokuba kuti
busikila mubuzuba bwa Kulibambila. Aboobo, kumanizya Pobwe lya Cinkwa
Citakwe Mimena ncintu ciletela muntu Nsabata Zyobile buyo zyitobela
mumazuba obile mumwaka woonse.

—————————————————————–

¹ Ellen G. White, Desire of Ages, p. 49.

² Ibid.

³ Ibid., p. 753.

Maila
Aakuzumbaanya acalo nciindi cakukkomana muziindi zyoonse ziibalukwa
nokusyuuka malubaluba! Mbobuzuba eelyo Mufutuli naakabuka kuzwa
mucuumbwe! Walo wakabusyigwa nkaambo Walo wakali cituuzyo cikkwene
citakwe cinyonyoono alimwi nkaambo kacituuzyo Cakwe, iswe inga
twapona lyoonse kutamani muli Nguwe. Mumazuba woonse eelyo luyando
lwesu akulumba nokweelede kugamikwa ku Mufutuli wesu a Taata wesu
uuli Kujulu, oobu buzuba bweelede kuba ciindi cakusekelela, akupa
kulumba abulangizi. “Ooyo watakalesya mwana Wakwe, pele
wakamulekela Walo mucibaka cesu, mbubuti mbwanga taatupa zyintu
zyoonse kakwiina muulo?” (Baloma 8:32, NKJV)

Bukombi
bwamituni oobo buli mukusekelela Isita wamazubaano mbobwaasolweda
bantu banjaanji kuti bauntuluzyile buzuba bwa kubuka kwa Kristu.
Bulemu bwa Pasika bweelede kubambwa mbuli mbobweelede. Kakunyina lufu
lwa Kristu, iswe inga katunoonyina lugwasyo abulangizi buzwa kujulu.
Kwiinda mukubuka Kwakwe kuzwa kubafu, antoomwe abuumi Bwakwe
bulondokede, ijulu lyoonse lili julidwe kuli ndiswe: kuti tutambule
lugwasyo lwesu, akukulwaizyigwa kwesu abuponi bwesu ansi aano,
antoomwe akukona kuteeli kukabe kutamani lyoonse. Kuzunda kwamusyobo
ooyu kweelede kwiibalukwa lyoonse. Yahuwah wakazunda ncobeni. Mulawo
Wakwe Uusetekene wakasunkwa, aboobo Walo wakacikonzya kucita eeco
ncaakali kulombozya kucita: kunununa babisyi aabo bakeenwa
akusolwedwa mucinyonyoono.

Pobwe
lya Kuzumbaanya Maila nciibalusyo cilangide musyule akunembo kutamani
eelyo nyika niyoobambululwa kiili mpya alimwi kiitajisi cinyonyoono
alimwi nokunoonyina babisyi. Eelyo mulimo Wakwe walufutuko akunununa
niwaamanizya kubelekwa, Yahushua wakalyookezya mucuumbwe mu Nsabata.
Kwamyaka iili zyuulu cisambomwe, bantu baliminidwe kunsaa mukuli wa
Saatani acinyonyoono. Eelyo cinyonyoono caakumana, basalali banunudwe
bayoosekelela Nsabata munkuta zyakujulu. Pobwe lya Kuzumbaanya Maila
lili mubuzuba butaanzi bwa mvwiki nkaambo mbuzuba bwakubambulula,
ciindi cakupiluluka kutalika alimwi. Kubuka kuzwa kubafu kuli
mubuzuba bwa Pobwe lya Kuzumbaanya Maila, buzuba butaanzi bwa mvwiki,
bulangide kumbele kuciindi citamani kuzinguluka lyoonse kukabe
kutamani, eelyo basalala banoonunudwe nobayootembaula Taata a Mwana
nkaambo ka cipego Cabo citeezyekwi caluyando lutamani.

Pobwe
lya Kuzumbaanya Maila nkusekelela kwakulumba. Tatweelede kulekezya
kupa kulumba kwesu kuli Kristu nkaambo kabuumi bwesu bupya kwiinda
mulufu walo ndwaakatufwida swebo. Tweelede kulumba Nguwe nkaambo
kamaumi eesu cino ciindi, azileleko antoomwe a buumi bwa moza Walo
mbwalengulula mukati kamyoyo yesu. Maleele aakukomena kwanseke
iifwide, ncaano cabuumi bupya muli ndiswe swebo notwakafwide
muzinyonyoono zyesu akusotoka mulawo. Mbuli mbwakaamba Paulu, “Ime
ndakakankaminwa a Kristu; Nsyeli Ndime uupona, pele ngu Kristu uupona
muli Ndime; alimwi buumi mbwepona lino munyama ndibupona mulusyomo
lwa Mwanaa Yahuwah, ooyo wakandiyanda akulipa Lwakwe kuli ndime.”

(Bagalatiya
3:19)

Pobwe
lya Kuzumbaanya Maila nkusekelela nguzu zyiteeli zyaluyando
lwabulemu.

Kondisimpa
mbuli caando caluyando amoyo Wako,

Mbuli
caando akuboko kwako;

Nkaambo
luyando nduyumu mbuli lufu . . .

Meenda
manjaanji taakonzyi kuzima luyando,

Nanka
mazambangulwe taakonzyi kulunyikizya pe.

Kuti
muntu wapeda luyando,

Buvwubi
boonse buli muŋanda yakwe,

Inga
bwasulaikwa citaambiki.

(Lwiimbo
lwa Solomoni 8:6, 7)

Mbokuli
luyando luli boobu kaluvwunguluka kunembo lyesu, swebo tweelede kuya
kumbele munkondo kulwana sinkondoma alimwi akukkomana kutola mulumbe
ookwa Kristu akuboola Kwakwe linolino anyika eeyi iiwide.

Nguni
uunga watwaandaanya kuzwa kuluyando lwa Kristu? Hena mapenzi, naa
nkupyopyongana, naa nkutundululwa, naa ninzala, nanka mantanda, nanka
ntenda, noliba cceba? . . . Muli zyeezyi zyintu zyoonse tulainda kuba
bakomi kwiinda muli Nguwe ooyo wakatuyanda. Nkaambo Ime
ndikulaizyidwe kuti kutali lufu nanka buumi, nobaba bangele, nanka
nguzu, nokuba zyintu zyiliko cino ciindi nokuba zyintu zyiciboola,
nokuba bulamfu naa bufwaafwi, nanka cili coonse cilengedwe, inga
tiicakonzya kutwaandaanya kuzwa kuluyando lwa Yahuwah ooyo uuli muli
Yahushua Uunanikidwe Simalelo wesu. (Baloma 8:35-39)

*Zyintu
zinga zyacitwa:*

Mbuli
cilengwa, misunta yamaila yakali kubunganyigwa kuti iletwe kunembo
lya Mulengi kuti ibe cituuzyo ca Kuzumbaanya Maila. Nkaambo kabantu
banjaanji aabo bakkede mumadolopo nokuba muzyooko zimwi, eeci tacili
cintu cikonzyeka kucitwa. Nzila iimwi yakubona maleele aakukomena
kwazyintu njakunyika nseke zyamimena. Mazuba masyoonto buyo
kabutaninga sika buzuba bwa Kuzumbaanya Maila, nkunyika mimena ya
maila nokuba nseke zyamusyobo umwi mumeenda kazyibalidwe zuba. Nyungu
zyitola buyo mazuba otatwe kuti zyimene. Aciindi cakukomba Pobwe lya
Kuzumbaanya Maila, eezyi zyeelede kwiimpulwa mumupailo mbuli
zinkonzya zya buumi bupya oobo mbotupedwe eelyo iswe notulisalila
kuti tufwe kuzinyonyoono zyesu. Nyungu zyipatipati, inga
zyakondelezya bana kuti baiye ciiyo. Mboobu mbocicitwa: Kotesya
kapepa akukabikka mukati kabbodela libalangala. Koselemuna nseke
zyanyungu mukati kabbodela eelyo. Kobambilila kuti aaka kapepa
kaliyeeme kumabalibali aabbodela, alimwi kobikka bbodela eelyo
mumpulungwido aawo zuba mpolikonzya kubala. Kobikka nseke zya nyungu
akataa kapepa abbodela. Koya kumbele kutesya kapepa kutegwa nseke
zyisonsa kazyilaa meenda. Eelyo nyungu zyatalika kusonsa, bana
beelede kunoolangilizya citola busena, inga balibonena maleele
aabuumi kaacitika mumeso aabo munseke eeyo yakafwide kutegwa
kulibonye buumi bupya.