Mangwalo
ndibbwe amusemo walusyomo lwa bana Kristu ooyo uutakonzyi kwaandauka
nokuba kubaa lwaanzi pe. Njenzila yini eeyo Yahuwah njaakayoyela muya
Wakwe, iitozya kubuumi butamani. Boonse aabo basyomeka mumyoyo yabo,
kabatandila Yahuwah a bululami Bakwe, ciyooba cilengwa cabo kubala
Bbaibbele akuyobozya majwi aabuumi mumizeezo yabo. Kumuka kubala
nokuba kutonkela ambali kubala jwi lyokwa Yahuwah, inga caambilizya
kusala lufu atalaa buumi. Inzya ncintu cilemu boobo, nkaambo kuti
swebo twaleka kweenda mumumuni wajwi Lyakwe, nkokuti inga twacaala
mumudima ooyo uuyaa kwiindila kusiya mbi katukkede mucimvwiide
calufu.

Muciindi
camanyongwe aakumamanino aanyika aayo aali afwaafwi kulangana
andiswe, lusyomo lwabantu bokwa Yahuwah luyoosunkwa kapati kwiinda
mbolwakasunkidwe kale muciindi cakainda kusyule lyesu. Eelyo
kupenzyegwa kwaakusikila mpokululila limwi ncobeni, alimwi zintu
zyaakutalika kucitika cakavwumbu mumbali lyesu, aabo batasimpidwe mu
Mangwalo, bayooleka kulangila cili coonse akukukulwa kabaya kooko
kulaale. Atukonkezye kuyobozya zyisyomyo zyokwa Yahuwah mubutala
bwamizeezo yesu obuno buzuba, nkaambo ambweni kuti twalindila cifumo
inga twaakuzundwa.

Twaambo
Tuli Lusele Swebo Ncotweelede Kuyobozyela Mangwalo mu Mizeezo Yesu

1. Yahuwah
   utwaambila kuti tweelede kusoma jwi Lyakwe akuliyobozya mumizeezo
   yesu.
2. Yahushua
   awalo wakali kuswata Mangwalo.
3. Kuswata
   Mangwalo ncintu cilengulula mizeezo yesu akutugwasya kupona buumi
   bwakuteelela akutobela Taata wesu uutuyanda Yahuwah.
4. Kuswata
   Mangwalo cituletela kubaa nguzu ziyandika muziindi zyamasunko
5. Kuswata
   Mangwalo citupa kuti swebo tukonzye kupa bumboni kuli baabo
   basweekede.
6. Kuswata
   Mangwalo citugwasya kuti tukonzye kukulwaizya akuumbulizya bamwi
   mbotusyoma limwi.
7. Kuswata
   Mangwalo cituyubunwida kuyanda kwa Taata Yahuwah eelyo notutonkomana
   kuyeeya Nguwe mumyoyo yesu.
8. Kuswata
   zisyomyo zya Mangwalo inga catugwasya kuti tukonzye kwiimikila nji
   katulaa nguzu eelyo notulangana amasunko amanyongwe aakumamanino
   aaciindi.

---

1.
Yahuwah, kwiinda mubashinshimi abaapositolo Bakwe, utwaambila kuti
swebo tweelede kuyobozya jwi Lyakwe mumizeezo yesu.

Kuti katuyanda kubaa buumi
mbotukkala kuti kabuswaangene ciindi coonse a Taata wesu Yahuwah,
swebo tweelede kusongwaala akuteelela kwaambilwa kuti katubala;
tweelede kuswata akubikka majwi Aakwe mumoyo katwaazyi lyoonse.

Kosongwaala
kubala akulitondezya kuti webo uli muntu uutambulika kuli Yahuwah,
similimo uutakwe cintu cimuusya nsoni, uuyiisya akupandulula jwi
lyakasimpe cakulomya. (2 Timoteyo 2:15)

Koswiilila
webo, O Isilayeli: Yahuwah Elohimu wesu, Yahuwah ngumwi! Webo weelede
kuyanda Yahuwah Elohimu wako amoyo wakwo woonse, amuya wako woonse,
alimwi anguzu zyako zyoonse. Alimwi aaya majwi ngekulailila
buno buzuba ayelede kuba mumoyo wako. Webo ukalomye kuyiisya
bana bako alimwi, ukaambaule majwi aaya eelyo nokkede muŋanda yako,
eelyo noyenda munzila, eelyo nolede ansi, eelyo nobuka. Webo
uyokwaangilila majwi aaya kuti cibe citondezyo kujanza lyako, alimwi
akabe ankumo yako akataa meso. Webo uyokwaalemba mumbalaa mulyango
waŋanda yako amumilyango yalubuwa lwako. (Ciibalusyo 6:4-9)

Amulekele
jwi lya Kristu likkalilile akuvwula muli ndinywe mubusongo boonse;
kamuyiisyanya akukulwaizyanya mubusongo boonse, amuntembauzyo,
munyimbo zyakulumbaizya Yahuwah, nyimbo zyamuuya, kamuzwide kulumba
mumyoyo akwiimbila Yahuwah mumyoyo yenu. (Bakolose
3:16)

2.
Yahushua awalo wakali kuswata Mangwalo.

Yahushua,
naakacili anyika, lyoonse aabo bakali kuswiilila Nguwe, wakali
kubatondekela ku Mangwalo. Ciindi aciindi, Walo wakali kubelesya
Mangwalo kuti akulwaizya basyomeka akulesya kubula luzyibo kwabaabo
bakamukaka kuti Walo ngo Kristu.

Yahushua
wakati kuli mbabo, Hena tamuninga balide mu Mangwalo,
Ibbwe eelyo bayaki ndyobaasowela kumbali, ndyeenya lyakaba bbbwe
lipati lyamusemo kwiinda woonse: eeyi micito yokwa Yahuwah, alimwi
ncintu ceebeke amumeso eesu? (Mateyo
21:42)

Yahushua wakabavwiila
akubaambila kuti, Inywe mulalubizya, mukutazyiba Mangwalo,nokuba nguzu zyokwa Yahuwah.(Mateyo
22:29)

Muwoola
ndyeenya eelyo Yahushua wakaambila makamu aabantu kuti, Hena
mwandiboolela mbuli bantu bayandaula kabwalala kamujisi macceba
ankoli kuti mundijate Ime? Ime ndakali kukkala abuzuba akati kenu
nkeyiisya mutempele, pele kunyina nimwaandijata. Pele coonse
eeci caacitika, kutegwa Mangwalo aabashinshimi azuzikwe.
Mpoonya basikwiiya bakwe boonse bakamumwaika, akubweza lubilo,
kwaimpana tukokola (Mateyo 26:55-56)

Mpoonya
wakabwezelezya anguwe basikwiiya bali kkumi ababili, akubaambila balo
kuti, Amulange, lino tuya ku Jelusalema, alimwi zyoonse zintu
zyakaambilizyigwa abashinshimi eezyo zijatikizya Mwanaa
muntu, ziyoozuzikwa. (Luuka 18:31)

Mpoonya
wakati kuli mbabo, Nobafubafuba nywebo, nkaambo nzi ncomulelema boobo
kusyoma zintu zyoonse eezyo bashinshimi nzyobakaambilizya:
Hena Kristu taakeelede kupenga zyintu zyoonse eezyi, akunjila
mubulemu Bwakwe na? Alimwi wakatalikila kuli Mozesi
akubashinshimi boonse, walo wakabasanzawida mumangwalo woonse eezyo
zyintu zyaambilizya kugaminina Nguwe Lwakwe. (Luuka 24:25-27)

Alimwi
walo wakati kuli mbabo, Ngaaya majwi ngeekamwaambila inywe, eelyo
neekali andinywe, kuti zyintu zyoonse zyeelede kuzuzikwa, eezyo
zyakalembwa mumulawo ookwa Mozesi, amubashinshimi, amuntembauzyo,
eezyo zyaambilizya ndime. (Luuka 24:44)

Kunyina
muntu uunga waboola kuli Ndimwe, pele buyo kuti Taata ooyo
wakanditumina wamweeta lwakwe kulindime: alimwi Ime njoomubusya
mubuzuba bwamamanino. Cililembedwe mubashinshimi, Alimwi
bayooyiisyigwa a Yahuwah. Aboobo muntu uuli woonse ooyo wakamvwa,
akumuzyiba Taata, kaboola kuli ndime. (Johani 6:44-45)

Kuti
katuyanda kukkala muluyando lwa Mufutuli, swebo tweelede kucita
mbweenya mbuli Nguwe muzyintu zyoonse, kusanganya aciyanza
cakusanyangula Mangwalo amoyo woonse.

Pele
kufumbwa ooyo uubamba jwi Lyakwe [Yahushua], muli nguwe ncobeni
luyando lwa Yahuwah lulilondokede: mbombubo oobo mbutuzyi kuti tuli
muli Nguwe. Ooyo waamba kuti ukkede muli Nguwe awalo weelede
kweenda, mbweenya mbwaakali kweenda aWalo. (1 Johani 2:5-6)

3.
Kuswata Mangwalo kuyakulula mizeezo yesu akutugwasya mubukkale
bwakupona katulondokede kutobela Taata wesu Yahuwah uutuyanda.

Ijwi
Lyako Ime ndakaliyobola mumoyo wangu, kutegwa Ime nditakucitili
cinyonyoono. (Intembauzyo 119:11)

Mbubuti
mwana musankwa mukubusi mbwanga wasalazya nzila yakwe? Kwiinda
mukuteelela akweendela mujwi (Intembauzyo 119:9)

Ijwi
lya Yahuwah lilaa nguzu zyakusandula maumi akulengulula mizeezo
yakasiya kuti mbi nkaambo kacinyonyoono.

Alimwi
mutabi bantu beendelana azyanyika eeyi: pele amusanduke nywebo
kwiinda mukulengulula mizeezo yenu, kutegwa inywe
mukalizyibile mbocibede cintu cibotu, citambulika, alimwi akuyanda
kwa Yahuwah. (BaLoma 12:2)

Eelyo
Mangwalo naabalwa mumuya wakupaila, ayubununa zibaka zyaciimo cesu
cibulide nguzu, akuvwununa mizeezo yesu, akutusalazyila ciimo cini
camyoyo yesu mubusyu bwa Julu lyoonse:

Nkaambo
jwi lya Yahuwah ndifwamba, alimwi lilaa nguzu, alimwi lilabosya
kwiinda cceba lili lyoonse likwengedwe kumabazu obile, lilayasa
kusikila lyakwamuna akataa mubili amuya wamuntu, akwaandaanya
aswaanganina zifuwa amooma, alimwi lilakonzya kuzyiba mizeezo
amakanze aamoyo. (BaHebulayo 4:12)

Mangwalo
atupa nguzu zya kumvwisya, kutegwa swebo kwiinda mu Muya Uusalala
tulete “muzeezo uuli woonse kuti weendelane akuteelela Kristu.”

(Nkaambo
zilwanyo zyankondo yesu tazyili zyilwanyo zyanyama yabuntu, pele
zilaanguzu kwiinda muli Yahuwah cakuti inga zyawola akudilimuna zintu
ziyumu nta;) Nkaambo tulanyonyoona mizeezo iilubide yoonse acintu
cili coonse cisumpulwa kuti cikazyanye aluzyibo lwa Yahuwah;
alimwi tulazunda mizeezo yoonse akwiicita kuti imvwide Kristu
(2 Bakolinto 10:4-5)

4.
Kuswata Mangwalo citupa nguzu zyitweelede muziindi zyamasunko.

Yahushua,
Mwana wa Singuzuzyoonse uunyina cinyonyoono, lyoonse wakali kubelesya
Mangwalo kuti alwane masunko. Mbubuti swebo, muciimo cesu cuubukide
alimwi cisofweede akunjomba muntimba yacinyonyoono, mbotweelede
kuzyibila kubelesya cceba eeli libosya koonse-koonse? Kuti
katuyanda kuzunda, tweelede kulizyiba jwi lya Yahuwah mumyoyo yesu
mbolibede bwini katweendela antoomwe andilyo.

Mpoonya Yahushua
wakeendelezyegwa aMoza kuya munkanda kuti akasunkwe adyabooli. Alimwi
naakaliimya kulya kwamazuba aali makumi one, asyikati amasiku,
wakafwa nzala. Aciindi eeco, Sikusunka wakaboola akumwaambila
kuti: “Ikuti naa uli mwana wa Yahuwah, ambila mabwe aaya kuti abe
zinkwa.” Pele wakaingula kuti: “Kulilembedwe kuti: ‘Muntu
teelede kuponena acinkwa calo, pele weelede kuponena amajwi oonse
aazwa kumulomo wa Yahuwah.’ ” Mpoonya Diabolosi wakaunka
anguwe kumunzi uusalala, waakumwiimika atala abwaanda
bwakazingulukide tempele akumwaambila kuti: “Ikuti naa uli mwana wa
Yahuwah, koliwaala ansi, nkaambo kulilembedwe kuti: ‘Uyoolailila
bangelo bakwe kutegwa bakakukwabilile, alimwi bayookutemba amaanza
aabo kutegwa utakabi nolinontola kubbwe.’ ” Yahushua
wakamwiingula kuti: “Alimwi kulilembedwe kuti: ‘Utasunki Yahuwah
Leza wako.’ ” Alimwi Diabolosi wakamutola kucilundu cilamfwu
kapati akumutondezya malelo woonse aamunyika abulemu bwangawo
akumwaambila kuti: “Zyoonse eezyi ndilakupa ikuti wafwugama
akundikomba.” Mpoonya Jesu wakamwiingula kuti: “Kozwa aawa
Saatani! Nkaambo kulilembedwe kuti: ‘Ngu
Jehova Leza wako ngoyelede kukomba, alimwi ngonguwe alikke ngoyelede
kubelekela mulimo uusetekene.’ ” Mpoonya Diabolosi
wakamusiya, eelyo bangelo bakaboola akutalika kumukutaukila.
(Mateyo 4:1-11)

5.
Kuswata mangwalo citupa nguzu kuti tuba bumboni bulomede kuli baabo
basweekede.

Pele
amulemekezya Yahuwah Elohimu mumyoyo yenu: mumyoyo yanu amubone
Kilisito kuti Mwami akuti ulasalala, kamulibambilide lyoonse
kuliiminina kumuntu uuli woonse uukonzya kumubuzya kaambo kajatikizya
bulangizi mbomujisi, pele amucite boobo amoyo mubombe alimwi abulemu
kapati. Amuzumanane kuba amizeezo mibotu; ikutegwa kufwumbwa
nobamwaamba zyintu zibi, kuti muli bantu bacita zisofweede, aabo
bamwaamba zyintu zibi bafwe nsoni akaambo kabukkale bwanu bubotu
mbomuli basikutobela Kilisito. (1 Petulo 3:15)

Kuti
katuyanda kuzuzika mulimo mupati, swebo tweelede kubikkila maanu
muzyintu zyoonse mumyoyo yesu, zyoonse eezyo Yahuwah aMwanaakwe
nzyobakatulailila swebo.

Aboobo
kamuya mukayiisye bantu bamisyobo yoonse kuba basikwiiya,
akubabbapatizya muzyina lya Taata alya Mwana alya muuya uusalala,
kubayiisya kubamba zyintu zyoonse nzyondakamulailila. Alimwi amubone!
Ndili andinywe mazuba woonse mane kusikila kumamanino aabweende
bwazyintu oobu.” (Mateyo 28:19-20)

6.
Kuswata Mangwalo citugwasya kuti tukonzye kuyumya akukulwaizya bamwi
mbotusyoma limwi.

Mangwalo
nkasensa kamalailile aabululami alimwi alusyomo lutakonzyi kuwida
ansi.

Magwalo
woonse akayoyelwa amoza wa Yahuwah, alimwi alagwasya mukuyiisya,
mukusinsa, mukululamika, mukulaya cabululami, kutegwa muntu wa
Yahuwah ayelele ncobeni, kalibambilide cakumaninina kubeleka mulimo
mubotu uuli woonse. (2 Timoteo 3:16)

Kubikka
jwi lyokwa Yahuwah mumyoyo yesu citugwasya kuti tukonzye kukomezya
basazima abacizyi besu mulusyomo.

Amucenjele,
bakwesu, kuti kutabi muntu akati kanu uuba amoyo mubi;ooyo uunyina
lusyomo kwiinda mukulizandula kuli Yahuwah uupona; pele amuzumanane
kukulwaizyanya abuzuba, kufwumbwa kuti kabucaambwa kuti ndi “Sunu,”
kutegwa kutabi muntu naba omwe akati kanu uuyumya moyo akaambo
kakweenwa anguzu zyacibi. (BaHebulayo 3:12-13)

Alimwi
tutanooleki kuswaangana antoomwe, mbuli bamwi bajisi ciyanza eeci,
pele katuyumizyanya umwi amweenzinyina, alimwi
atuzumanane kucita boobo ikapati mbomubwene kuti buzuba bwaswena
afwaafwi. (BaHebulayo 10:24-25)

7.
Kuswata Mangwalo kutuyubunwida kuyanda kwa Taata Yahuwah,
akutonkomana kuyeeya Nguwe mumyoyo yesu kuti cibe cintu kugeme maumi
eesu

Kukutandila
musyini uutafwi, ncintu ciyandika kuti swebo tubikke jwi lyoka Taata
kunembo lyesu lyoonse.

Ime njootonkomana
kuyeeya milazyo yako, alimwi njoolemeka nzila zyako. Ime
njookkomanina milazyo yako: Ime nsyekalubi jwi lyako
(Intembauzyo 119:15-16)

Meso
aangu andilesya kubona masiku woonse, kutegwa Ime ndikonzye
kuyeeya jwi lyako (Intembauzyo 119:148)

Ijwi
lyako ndilambe kumaulu aangu, alimwi mumuni munzila yangu.
(Intembauzyo 119:105)

Kutonkomana
kuyeeya jwi lya Yahuwah ncecijuzyo cakuvwuba akuzwidilila muzintu
zyoonse.

Eeli
bbuku lya mulawo talikaatuki kuzwa mukanwa lyako; pele webo
weelede kuyeeyela mundilyo syikati amasiku, kutegwa webo
ukakonzye kucita zyoonse zyilembedwe muli ndilyo: nkaambo eelyo
webo uyoobamba nzila yako kuti ibaa buvwubi, alimwi webo uyoobaa
kuzwidilila (Joshua 1:8)

8.
Kuswata zisyomyo zya Mangwalo citupa kuti twiimikile nji katulaa
nguzu eelyo notulangana masunko amanyongwe aamamanino anyika.

Kopobola
kusekelela nkaambo ka zisyomyo ziyandisi zyokwa Yahuwah buno buzuba,
kutegwa webo ukaimikile kolaa nguzu mumasunko aacizya kumbele!

Ooyo
uukkede akuyusila muli Sijulu wamajulu, uyoolyookezya mucimvule ca
Singuzuzyoonse. Kuli Yahuwah waamba kuti, “Nduwe matijilo
acikwabilizyo cangu, nduwe ngwesyoma.” Nguukuvuna kuzwa kukakole
kateyedwe, nguukuvuna kuzwa kucuumo. Ulakuvumbilila amapepe aakwe,
webo ulayuba kunsi aamababa aakwe. Ntobo acikwabilizyo cako
nkusyomeka kwakwe. Tokayoowi ziyoosya masiku, mivwi niibilima sikati
tiikakuyoosyi. Tokayoowi nikuba kuti kukaboole mwiika mumudima,
niciba cuumo cinyonyoona ciindi caacilungu-lungu. Kumbali
lyako bantu bali cuulu balawa, kujanza lyako lyalulyo bantu
balizyuulu zili kkumi balawa, pele yebo lwako tacikakugumi pe. Yebo
lwako uyoolangilide buyo, uyoobona kusubulwa kwabasofweede. Kuti
Sijulu wamajulu waba ngamayubilo aako, ooyo Mwami Yahuwah uuli
ngamatijilo aako, masimpe taakwe ciyookucisa, taakwe mapenzi
ngoyoobona munsi aanduwe kuŋanda yako. Nkaambo Yahuwah uyoolailila
bangelo bakwe kuti bakukwabilile, kuti bakucingilizye munzila zyako
zyoonse. Bayookujata kukunyamuna mumaanza, kuti utafumpuli cituta
cako abbwe. Uyoolyataula syuumbwa ankombola, uyoolyataula cipile
asyuumbwa wabutambo, ayalo nzoka nkali uyooilyataula. Lino mukuti
ulandiyanda alimwi ulizi zina Lyangu, njoomukwabilila. Aakundiita
njoomuvwuwa, mumapenzi aakwe njooba aanguwe, njoomuvuna akumulemeka.
Njoomucita kuti akoongole, ndiyoomufutula. (Intembauzyo 91)

Ngomuntu
ooyo uuyookkala mujulu, uuli aacitijilo ciyumu mbuli cilundu.
Unooyoopegwa zyakulya, maanzi taakamumanini pe. (Izaya 33:16)

Pele
aabo balangila mu Mwami Yahuwah uyoobabukulusya akubapa nguzu.
Bayoouluka mbuli basikwaze, bayoozuza pele tabakawizuki, bayooyenda
pele tabakakatali. (Izaya 40:31)

Mutayoowi
nywebo; nkaambo Ime ndili aandinywe. Mutatyompwi kayi ndime Elohimu
wanu. Ndiyoomuyumya-yumya, akumugwasya, ndiyoomujatilila ajanza
lyangu lyalulyo liluleme. Boonse bamulwana bayoofwa nsoni,
bayoousigwa. Basinkondonyoko bayooba cintu buyo, bayooloba. Nokuba
kuti mukayandaule basinkondo tamukooyoobabona pe. Aabo bamulwana
bayooba bantu buyo. Mebo nde Mwami Yahuwah wanu ndime eejisi maanza
aanu aalulyo. Ndime ndimwaambila kuti, ‘Mutayoowi pe,
ndilamugwasya.’ (Izaya 41:10-13)

Pele
lino mboobu mbwaamba Mwami Yahuwah, ooyo wakakulenga O Jakobo, ooyo
wakakubumba O Isilayeli. “Utayoowi, nkaambo ndime ndakunununa.
Ndakakwiita azina Lyangu, uli Wangu. Waakwiinda mumaanzi, ndinooli
aayebo, alimwi waakuzabuka milonga tiikakukwempuli. Waakwiinda
mumulilo, tokooyoopya pe. Kuvwilima kwamulilo takukakuulubi. Ndime
Mwami Yahuwah wako Uusalala wa Isilayeli, Mufutuli wako. Ndaaba
Ijipiti kuti ibe cinunuzyo cako. Ndaaba Kusyi a Seba mubusena bwako.
“Ndapa misyobo yoonse kuti ikabe cinunuzyo cabuumi bwako, nkaambo
uleebeka kulindime, ndakuyanda alimwi ndakulemeka. Utayoowi, ndili
aayebo! Njooleta lunyungu lwako kuzwa kujwe akumubunganya kuzwa
kumbo. (Izaya 43:1-5)

Kuti
katuyanda kuyoojanwa katulibambide eelyo Simalelo wesu aakuboola,
swebo tweelede kuzuzya ziyumwido zyesu lyoonse kazizwide
mungwimba “Aboobo tutooni mbuli mbobacita bamwi. Katulanga
akubatama.” (1 Batesalonika. 5:6)

Mwanaa
Muntu aakuboola mubwami bwakwe ciyooba mbuli cakacitika kuli
banakalindu aabo bakaunka kuti bakacingauzye sibwiinga: “Nkabela
bulelo bwa Kujulu inga bweelekwa abanakalindu bali kkumi, aabo
bakabweza malambe aabo, akuunka kuyoocinga sibwiinga. Muli baaba,
bosanwe bakali bafuba-fuba, pele bamwi bosanwe bakalicenjede. Ciindi
bafuba-fuba nibakabweza malambe aabo, taakwe nibakabwezelezya mafuta
aakuyobozya ambali. Pele basongo bakabwezelezya nsazi zyamafuta
aamalambe aabo. Nkaambo kakuti sibwiinga wakamuka kuboola,
boonse bakafukula boona. Lino akati kamasiku kwakamvwigwa kuyobeka
kwakuti, ‘Amuswiilile sibwiinga waboola! Amuzwe mukamucinge!’
Aboobo basimbi aabo boonse bakabuka, bayasya malambe aabo. Nkabela
basimbi bafuba-fuba bakati kubasongo, ‘Amutwaabile aswebo kaka
mungwimba nkaambo kayi malambe eesu azima!’’Pele basimbi basongo
bakaingula kuti, ‘Ambweni kuti twamwaabila tatutizulile. Nkaako
kamuya kubasambazi mukalyuulile.’ Nkabela kabacuula, sibwiinga
wakasika. Mpawo aabo bakalibambilide bakanjila anguwe mupobwe
lyabwiinga, eelyo mulyango wakajalwa. Lino musyule aabo basimbi
bakasika abalo, bamwaambila sibwiinga bati, ‘Mwami, Mwami
tujulile.’ Walo wakabaingula kuti, ‘Ncobeni, nsimwizi
pe.’”Yahushua wakati, “Mulindilile nkaambo tamuzi ciindi Mwanaa
Muntu nayooboola.” (Mateyo 25:1-13)

Toonse, kwiinda muluzyalo lwa Taata, atulyaabe kubala abuzuba ijwi Lyakwe
lipa buumi , kutegwa swebo tukakonzye amoyo uusyomeka kwaamba mbuli
Joobo kuti,

Kunyina
pe Ime neekadilika musyule kuzwa kumulawo wamulomo wakwe; Ime
ndakalanganya majwi aamulomo wakwe kuti alainda kuyandika kwiinda
cakulya. (Joobo 23:12)