Saatani wiitwa kuti ngu
“Wisi wa lweeno.” Yahushua Lwakwe wakati dyabooli “mujayi kuzwa kumatalikilo,
alimwi takwe kasimpe nkaambo kwiina cili masimpe muli nguwe. … mubeji, alimwi
ngowisi wakubeja.” (Johane 8:44, KJV) Kuunina, Kweena naa Kubejela, nciimo
cakubula nguzu. Tacikonzyi kubaa nguzu zijisi Masimpe. Kubeja komwe lyoonse
kulaalilwa kukkwanya kucenga. Saatani ulicizyi eeci kabotu, ncencico
ncapindawida kubeja akuvwelanya kasimpe. Kufumbwa kuti kubeja kwaswenesya
kukoyaanga nkasimpe, mbombubo mbokwiindila kweena uswiilila.

Saatani ilizyi kuti
Mulawo nguutondezya ciimo ca Yahuwah cisetekene. Nkabela kasimpe takapindauki
mbweenya awalo mbwabede Uupa Mulawo Lwakwe. Saatani uyanda kuti bantu batyole
Mulawo uusetekene wa Yahuwah. Kutegwa cicitike eeci, wakabacenga kuti bayeeye
kuti mulawo wa Yahuwah wakacincwa naa kuti tuucili mulawo uuyandika kubamba
ooyu. Taakwe uukonzya kusyoma kubeja kuti nikwatali vweledwe  antoomwe akasimpe. Nkabela Saatani
ulayinduluka kwaambilizya cili mu Mangwalo kutegwa “ayumye” kubeja kwakwe.
Efeso 2:15 ncibalo cibalwa kanji kuti mbobumboni bwakuti Mulawo wabulemu
wakamana. Kwamana boobo takali kaambo kakkwene aaka kuti wabala waawa buyo.
Mabala  obile biyo aamvwugwa buteelede
akutabilila kubeja kwa Saatani.

…kazundide amubili
wakwe businkondo , nkokuti Mulawo waajisi milazyo yabupaizi, kutegwa
aswaanganye nkamu zyobilo kuti zibe muntu mupya omwe akuleta
luumuno….(amulange Ba Efeso 2:15)

Ncintu citaluleme
kweezyeezya  kuti Taata waMalawo
wabululami inga wamwaya Mulawo Wakwe 
Uusetekene! Takwe mfulumende yabantu iitakwe milawo. Mbubwenya
amfulumende yabulemu ayalo. Paulu awalo inga waba ucaalizya kwaamba kuti mulawo
“wakamwayigwa” aciciingano nkaambo walo lwakwe , wakati:

“Aboobo Mulawo
ulisetekene, amalailile alisetekene, uliluleme alimwi mubotu.” (Ba Loma 7:12,
KJV)

Yahushua taakaboolela
kumwaya mulawo pe! Wakaamba kuti:

“Mutayeeyi kuti ndakaboolela kumwaya Mulawo
naa zyaalembwa abashinshimi.Tiindakaboolela kujaya mulawo pe, pele Ndakaboolela
kuuzuzika. Ncobeni ndimwaambila kuti, kusikila julu
anyika zikamane, taakwe kabala komwe kasyoonto nokaba kabeela kasyoonto
katikazwe ku Mulawo, kusikila mane zyintu zyoonse eezyi zikazuzikwe. Aboobo kufwumbwa
uutyola nouba omwe wamilawo miniini eeyi akuyiisya bantu kucita oobo, takeeleli
pe mumunzi wakujulu. Pele kufwumbwa uutobela akuyiisya milawo eeyi, uyooba
mupati mumunzi wakujulu.” (Mateyo 5:7-19, KJV)

Yahushua wakaluuzyi
kabotu Mulawo wabulemu. Lyoonse naakali kubamba Mulawo wabulemu, wakali
kutondezya bantu boonse nzila yakutobela.

“Yahushua wakapengela
ndiswe, akutusiila nzila, njotweelede kutobela mumatende aakwe: Walo
watakabisya ….” (1 Petulo 2:21-22)

Mangwalo lyoonse
atuyiisya kuti Mulawo wabulemu tuumani. Weelede kubambwa lyoonse, Kujulu
aaNyika, kutamani akutamani. Kufumbwa kampango ka Bbaibbele kabelesyegwa
“kutondezya” kuti mulawo “wakagagailwa
aciciingano” nkupindula caamba
Mangwalo mukutabilila kubeja kwa Saatani kwakuti Mulawo wabulemu tuukonzyi
kubambwa. Kampango Efeso 2:15 inga kateelelwa kabotu kuti cibalo coonse cabalwa
mubwini.

Kaindi twakali kweenda
munzila zyanyika, mbuli sikuungilila wamuluwo, ooyo weendelezya bantu
batateeleli…

Pele Yahuwah uuzwide
lubomba, muluyando Lwakwe lupati kuli ndiswe, nitwakaciyuminide muzibi,
wakatukubulusya antoomwe a Yahushua, (mwakafutulwa mulubomba lwakwe;)
Alimwi wakatubusya antooomwe akutukkazyika antoomwe aYahushua mumasena
aajulu:…

Nkaambo Ngo luumuno
lwesu, nguwakatuswaanganya, akumwaya bwaanda bwakatuzandwide akati kesu;
Wakamanya businkondo kwiinda mumubili Wakwe, nkokuti Mulawo waajisi milazyo
yabupaizi, kutegwa aswaanganye nkamu zyobilo kuti abe muntu mupya omwe akuleta
luumuno; Kutegwa answaanganye bobile Yahuwah mumubili omwe kwiinda
muciciingano, akujaya businkondo bwaaliko: Akuboola kuzyookambauka luumuno kuli
ndinywe inywe nomwakali kulaale, akuli baabo bakali munsimunsi. (amulange Efeso
2:2, 4-6, 11-17.)

Aawa Paulu ulembela
bantu ba masi, akubaibalusya kuti, kabatanaba Basyomi, bakali “kweenda munzila
zyanyika eeyi” (kampango 2). Nzila zyanyika eeyi nzilengwa zyabantu zigamika
mukuzandaulwa akusulaikana. Bana Isilayeli bakali bantu bamwi baasulaikidwe
anyika. Yahuwah wakakanzide kuti Isilayeli abe “mumuni wanyika.” (Mateyo 5:14,
KJV) Pele, Isilayeli wakalisumpula,akutandila anze bantu ba masi. Paulu wakali
kwaamba kujatikizya kusulaikana akataa bantu naakati: “Kaindi mwakali kweenda
munzila zyanyika eeyi,  mbuli
sikuungilila wanguzu zyamuluwo.” ( Efeso 2:2) Lyoonse mulimo Saatani ngwacita
ngwakuleta kucimwa, kuyeeyelana zibi, kusulaikana akuzandaulana akati kabantu.
Eeyi “njenzila yanyika.” Yahushua wakaboolela kuleta lukamantano kwiinda
muluyando lwabulemu. Wakaliliibide akutambula uli oonse nokuba mumaanda
aabacete beni, mbweenya mbuli Naakali mumaanda aabavwubi. Yahuwah  “tasalululi muntu pe”: Pele kufumbwa cisi
ciyoowa Nguwe, akucita bululami, cilatambulwa kuli Nguwe.” Incito 10:34, 35 )
Aaka kaambo kaabakatazya  nobaba
Basikwiiya batumwa kuti bakateelele. Kusikila Petulo naakalota ciloto cizwa
kujulu pele ndendilyo eelyo naakabweza ntaamu yakunjila mumaanda aabantu batali
ba masi, pele kumbele lyawaawo wakatobela bana Isilayeli bamwi bakamusinikizya
nkaambo bakacili kusalulula.

“Kusyule lyawaawo bamwi
baalumi bakazyila kuli Jakobo, eelyo Petulo wakalikulya antoomwe abantu ba
masi: pele nibaasika munsimunsi wakalekezya kulya abantu aaba akusosoloka munsi
lyabo, kayoowa baabo bakapalwidwe.” (Galatiya 2;12, KJV)

Naakabona caali kucitika
Paulu wakafwambaana kucilesya cilengwa eeci. Ibbala lya “milazyo” ndyaakali
kwaambilizya Paulu naakali kwaamba “mulawo uuli mumilazyo” (Efeso 2:15) uzwa
kubbala lya “dogma” (#1378). “Nzye zilengwa zyabasilutwe” nzyaakali kwaamba
Yahushua Naakabuzya kuti, ‘Nkaambo nzi ncomutyolela mulawo wa Yahuwah nkaambo
kazilengwa zyenu?” (Amulange Mateyo 15:3) Imulawo a milazyo njaakali kwaamba mu
Efeso 2:15 Paulu tiiwali mulawo wabulemu ngwaakazuminide kuti
ulisetekene alimwi mubotu. Paulu wakalikwaamba zilengwa zyabantu, zilemena nzibaali
kuyaabukulaika bantu bapaizi abasilutwe liya kabayiisya bantu kuti beelede
kubeleka kuliyandawida nzila yakuya Kujulu kwiinda mukutobela tulengwa twabo.
Ootu tulengwa twakulesyalesya bantu ntotwaaletelezya kusulaikana, kuyeeyelana
zibi, kucimwa, akuzandaulana akataa bana Isilayeli abantu ba masi. Eeyi milawo
yatulengwa twabantu njiyaaleta “bwaanda buzandula” akataa bana Isilayeli abantu
ba masi. Kaambo nkaakali kwaamba Paulu mu Efeso 2 nkakuti Yahushua wakaboolela
kunununa bantu boonse bali koonse nkobabede. Yahushua taakamvwanya muntu a
Yahuwah alikke, pele wakamvwanya muntu amuntunyina. Tiikwakacili caandaanya
Isilayeli abantu ba masi, mwaalumi amwanakazi, uufutudwe awutafutudwe.

Pele lino muli Yahushua
Uunanikidwe inywe nomwaali kulaale lino mwaleta munsimunsi kwiinda mubulowa bwa
Uunanikidwe. Nkaambo Ngo luumuno lwesu, nguwakatuswaanganya, akumwaya bwaanda
bwakatuzandwide akati kesu; Wakamanya businkondo kwiinda mumubili Wakwe,
nkokuti Mulawo waajisi milazyo yabupaizi, kutegwa aswaanganye nkamu zyobilo
kuti abe muntu mupya omwe akuleta luumuno,” ( Efeso 2:13-15)

Yahushua ngowaazwide
bwini bweelede kuba mulawo wabulemu. Aboobo, Waamwaya milazyo yazilengwa
zyabantu zyakusulaikana nzibaabikkide bantu bamaanu masyoonto. Kuzuzikwa kwini
kwa Mulawo Nduyando.

“Nkaambo mulawo
ulazuzikwa mubbala lyomwe, ndilyo eeli; Yanda mweenzinyoko mbuli mboliyanda.”
(Galatiya 5:14, KJV)

“Luyando taluciti
cibyaabi kumweenzinyina: aboobo luyando nkuzuzika mulawo.” (Loma
13:10,KJV)

Muli Yahushua boonse
baliswaangene muluyando. Efeso 2 basekelela lukamantano lupya aluyando
lwabusazinyina ndwaakaleta Yahushua akubamba Mulawo  uutamani, uusetekene, uululeme uutamani
alimwi wabulemu.

Muli YAH taakwe Kujwe naa Kumbo,
Kumusanza naa Kunyika;
Pele kuli buyo kumvwana kupati kwaluyando
Munyika yoonse.

Muli Nguwe myoyo yakasimpe ili koonse
Iyoojana kulyookezya;
Mulimo Wakwe mbunweba bwagolide,
Bwaanga antoomwe mukowa wabantu.

Amujatane, mumaanza, nobasyomwa,
Kufumbwa musyobo wenu!
Ooyo uubelekela Taata wangu mbuli Mwana Wakwe
Mweenima ncobeni kuli Ndime.

Muli YAH Kujwe aKumbo kwaswaana lino
Muli Nguwe Kumusanza aKunyika kwaswaana
Boonse bana Kristu bali bomwe muli Nguwe
Munyika yoonse.

Milawo
ili Kkumi = Cikonzya Ciimo ca Yahuwah Citapindauki:

• ULULEME: Yahuwah – Loma
  3:26; Mulawo Wakwe  Loma – 7:12.
• WAMASIMPE: Yahuwah-
  Johane 3:33; Mulawo Wakwe – Nehemiya 9:13.
• UUTAKWE KAMPENDA:
  Yahuwah- 1 Johane 3:3; Mulawo Wakwe- Intembauzyo 19:7, 8.
• MUMUNI: Yahuwah-1 1
  Johane 1:5; Mulawo Wakwe – Tusimpi 6:23.
• UUSYOMEKA: Yahuwah- 1
  Kolinto 1:9; Mulawo Wakwe- Intembauzyo 119:86.
• MUBOTU: Yahuwah – Nahamu
  1:7; Mulawo Wakwe – Loma 7:12, 16.
• WAMOZA: Yahuwah – Johane
  4:24; Mulawo Wakwe – Loma 7:14.
• UUSETEKENE: Yahuwah –
  Izaya 6:3, 1 Petulo 1:15; Mulawo Wakwe – Kulonga 20:8, Loma 7:12.
• MASIMPE: Yahuwah- Johane
  14:6; Mulawo Wakwe – Intembauzyo 119:142, 151.
• BUUMI: Yahuwah- Johane
  14:6; Mulawo Wakwe – Mateyo 19:17.
• BULULAMI: Yahuwah –
  Jelemiya 23:6 ; Mulawo Wakwe – Intembauzyo 119:172.
• UULONDOKEDE: Yahuwah-
  Mateyo 5:48; Mulawo Wakwe – Jakobo 1:25.
• UUTAMANI: Yahuwah-
  Johane 8:35; Mulawo Wakwe- Intembauzyo 111:7, 8.
• LUUMUNO: Yahuwah- Izaya
  9:6; Mulawo Wakwe  Intembauzyo 119: 165.
• NZILA: Yahushua – Johane
  14:6; Mulawo Wakwe – Intembauzyo 119:30-32.
• WANCOBENI: Yahuwah- 2
  Timoteo 2:19; Mulawo Wakwe- Intembauzyo19:7, 111:7, 8.
• UUTAPINDAUKI: Yahuwah-
  Malakayi 3:6; Mulawo Wakwe- Intembauzyo 111:7, 8.
• UULWEELA: Yahuwah-
  Intembauzyo 34:8; Mulawo Wakwe- Intembauzyo: 19:10, 119:103
• WABUSONGO: Yahuwah-
  Intembauzyo 111:10; Mulawo Wakwe – Intembauzyo 19:7.
• UUTWIIMININA: Yahuwah –
  Intembauzyo 63:6; Mulawo Wakwe- Intembauzyo 1:2.
• MUBETESI: Yahuwah-
  Intembauzyo 50:6; Mulawo Wakwe- Jakobo 2:12.
• UUTUPA KUTEELELA:
  Yahuwah- Intembauzyo 18:27; Mulawo Wakwe -19:8.
• LUYANDO: Yahuwah- 1
  Johane 4:7, 8; Mulawo Wakwe – Loma 13:8- 10.
• UUSALALA: Yahuwah –
  Intembauzyo 19:9; Mulawo Wakwe – Ezekiya 22:26.
• UULELEKEDWE: Yahuwah –
  Intembauzyo 28:6; Mulawo Wakwe – Kulonga 20:11.
• UUKONDA: Yahuwah-
  Intembauzyo 37:4; Mulawo Wakwe – Intembauzyo 1:2.
• MUBOTU: Yahuwah – Izaya
  9:6; Mulawo Wakwe- Intembauzyo 119:18.
• LWAANGULUKO: Yahuwah-
  Izaya 61:1; Mulawo Wakwe- Jakobo 1:25; Intembauzyo 119:45
• KUKKALA KABOTU: Yahuwah-
  Intembauzyo 23:4; Mulawo Wakwe- Intembauzyo 119:50.
• LWIIMBO LWESU: Yahuwah-
  Ciyubunuzyo 15:3; Mulawo Wakwe- Intembauzyo 119:54.
• WALUBOMBA: Yahuwah –
  Kulonga 34:5; Mulawo Wakwe- Intembauzyo 119:58.
• LUZYIBO: Yahuwah- Izaya
  11:2; Mulawo Wakwe- Intembauzyo 119:66.
• BULANGIZI: Yahuwah-  Intembauzyo 130:7; Mulawo Wakwe- Intembauzyo
  119:74.
• BUUMI: Yahuwah-
  Intembauzyo 36:9; Mulawo Wakwe- Tusimpi: 3:1, 2.
• NYIMBO: Yahuwah- Tusimpi
  8:13, 14;  Mulawo Wakwe- Intembauzyo
  119:80.
• KUMVWISISYA: Yahuwah-
  Intembauzyo 147:5; Mulawo Wakwe- 119:99.
• KUKKOMANA: Yahuwah-
  Intembauzyo 146:5; Mulawo Wakwe- Tusimpi 29:18.
• LUKONDO: Yahuwah-
  Intembauzyo 16:11; Mulawo Wakwe- Intembauzyo 119:162.

“Mutayeeyi kuti [Yahushua] Ndakaboolela kumwaya
mulawo, nokuba bashinshimi:
Nsyeekaboola kumwaya pele kuzuzika.”
(Mateyo 5:17,
KJV)