Casika ciindi lino cakubambulwida limwi zyoonse zinyonyoono zya bwaamu. Ŋanda yakazekelo iyanda kujalwa. Inga kwaba kufubaala kubana Kristu mazubaano kuti tiibabelesya zilwanyo zyoonse mukulwana nkondo yakavwumbu ya bwaamu.
Kakwiina kuleyaleya, swebo tweelede kuzuunyana kubambulula
bwaamu buli akati kesu muciindi cisyoonto ciceede cino cakuzekelwa. Saatani
uluukwete kulengelezya nkondo iiyoosya kapati yakulwana bantu baluulwa bokwa
Yahuwah, kutegwa bacaale kabacicedwe mukooze kaluunyaunya, kucenka zifwanikiso zitondwa
mumabbuku, muzifwanikiso zitondezya mantanda azitondwa, muzipekupeku zyabwaamu,
kulyana nkwela, akulalika. Twakacenjezyegwa kale Mujwi Lyakwe kuti aabo bacita
zinyonyoono zyabwaamu bayoosinganyigwa. (1 Bakolinto 6:9-10; Bagalatiya 5:19-21). Munkamu ya WLC, tuluubwene musyobo wankondo eeyi Saatani
njalwana bantu bokwa Yahuwah munzila eeyi, atalaa nyika yoonse. Nokuba boobo,
kunyina muntu weelede kulimvwa kubula nguzu nokuba kwaalilwa kujana lugwasyo
munkondo eeyi. Alilubaizyigwe Zina Lyakwe nkaambo kakasimpe kakkomanisya aaka.
 |
|
Iswe tuyandika kubweza ntaamu zilamfu ncobeni munkondo zyesu akuyandisya kubelesya kufumbwa cilwanyo eeco Julu ncolitupede cakuti tukonzye kuzunda bwaamu. |
Iswe tuyandika kubweza ntaamu zilamfu alimwi zipati ncobeni
munkondo zyesu akuyandisya kubelesya kufumbwa cilwanyo eeco Julu ncolitupede
cakuti tukonzye kuzunda bwaamu. Yahushua wakapa kucenjezya kuti, ” Aboobo
kuti janza nanka kuulu kwako kakukulebya, kokukosola, akukusowela kulaale
anduwe: cilainda kubota kuti webo ukanjile mubuumi kokosokede naa koli cilema,
kwiinda kuti ukasowelwe mu Gehena muyaka mulilo kolaa maanza naa maulu obile.”
(Mateyo 18:8-9). Musazima wesu Mupati, Yahushua, utulailila kuti tweelede
kucengulukila limwi akuleka kucita cinyonyoono, nkokuti tweelede kuyandisya
kucita kufumbwa cikonzya kutupa kuzwidilila munkondo iitayozyiyozyi eeyi.
Atutozye kugama kooko lino; swebo tuyanda kumwaabila
mulongo wazilwanyo zili lusele eezyo nzyayelede kubelesya muna Kristu uuli
woonse ooyo uuzingaidwe mucilengwa cabwaamu camusyobo nuuba buti. Swebo
tiitwabikka zilwanyo eezi mumulongo wini mbozibeleka. Zyoonse zyeelede kubelesyegwa antoomwe kutegwa muntu alomye
kuzwidilila akuzunda cilengwa cimuzambaide, kwiinda muluzyalo Lwakwe:
Cilwanyo #1: Kotaanguna Kulungulula Cilengwa
Cikuzingaide.
Eeci lyoonse ncintu cikatazya kucita, nkaambo kuyandisya
bwaamu ncintu cuusisya nsoni, alimwi bantu bazingaidwe cilengwa eeci kanjaanji
tabaangulukide kwaambila bantu cilengwa eeci. Nokuba boobo, kwaambila bamwi
inga caba cintu cikugwasya mukulyaangulula cintu cikudyaaminide boobo mumoyo
wako. Kabunga ka Bacakolwa Batazyibene
kakalizyi kwaciindi cilamfu ncokuyandikila kwaambila bamwi bweende
bwako, alimwi aabo bali mukabunga aako, bakali kukulwaizyana kuti bajane
lwanguluko kuzwa kuziyanza zyabo kwiinda mukwaambila muntu ngobaangulukide
kwaambila.
Mulazyo wa Bbaibbele waambilizya cilwanyo eeci, ujanwa
mubbuku lya Jakobo 5:16: ” Aboobo, amulyaambilile zibi zyanu
caantangalala kuli umwi amweenzinyina, alimwi amupaililane kutegwa muponesyegwe.
Mupailo akukombelezya kwamuntu mululami kulaa nguzu kapati alimwi kulabeleka.”
Nokuba kuti bamwi bantu, basandulula kampango aaka kuti
kaamba kulilekelela zinyonyoono zyako kuli umwi aumwi, pele Calvin upandulula
bwiimpene mbwateelela kampango aaka:
“Bantu banji aboobo bayeeya kuti Jakobo
aawa waamba nzila yakulilekelela zibi kumuntunyonko, nkokuti kuzumina
ncoolubizyila muntunyoko. Pele mbuli mbocilembedwe, aawa [Jakobo] walo wakageme
kaambo kaimpene; nkaambo walo wakasanganyide mipailo yabantu antoomwe akweempwa
kwaantangalala; eeco walo ncaamba kuti ceelede kweenda munzila eeyo nobeempwa
bantu boonse antoomwe kuli … [Yahuwah] kwiinda mumipailo yabasazima; nkaambo
basazima mbabazyi nzyotubulide, alimwi balakulaizigwa kutupailila kutegwa
bakonzye kutugwasya; pele aabo batazyi malwazi ngotuciswa, balalelema
kutuletela lugwasyo.”
Kukombelela kwankamu ya WLC: Koliyumyayumya akuzunda nsoni zyako abweemya bwako alimwi
kolyaambilila mapenzi aako kuli baabo mbokonzya kusyoma, kutegwa bakusongole
cikuyaside mumoyo webo kwiinda mumupailo wakulombelesya nguzu. Webo ulayandika
kupegwa lugwasyo luli loonse munkondo eeyo njolwana omwini, nkondo
yakutontomana kucita bwaamu, alimwi eeci cilwanyo inga cakugwasya akukusyomezya
kuti abamwi bantu mbosyoma inga basangana anduwe kabapaila abalo mipailo
yakukombelezya.
Cilwanyo #2: Kocinca Lubazu Lukweetela Musunko.
Koleka kuula zipekupeku kapati cipekupeku camuŋanda
cakubbadela amwezi, kosowa zyoonse zicili munsi lyako, koleka kulijana koli
olikke masikati nokuba masiku, kosinkila zifwanikiso azipekupeku zitondwa kuti
zitasiki mukkompyuta yako, alimwi koleka kubbadelela zyoonse zikweetela luunyaunya.
Eezi ninzila zisyoonto buyo nzyokonzya kutaanguna kubweza akulesya sunko eelyo
kusikila nduwe. Muntu uli woonse uuzambaidwe mucilengwa cakucita bwaamu
uyandika kugwisyila limwi zyoonse zimusunka mubuumi bwakwe eezyo nzyaswaanganya
zimweetela bwaamu kumeso amizeezo yakwe. Webo weelede kuba muntu uulwana
akukosweda limwi zyoonse zisangene mubwaamu, eezyo nzyabelesya Saatani kulwana
nduwe. Kobala kabotu kabotu aaya majwi aamalailile ookwa Simalelo wesu Yahushua:
“Mwakamvwa kuti kwakaambwa kuti: ‘Utaciti mamambe.’Pele ncobeni ndamwaambila kuti kufumbwa muntu uulangisisya mukaintu cakuti
wamunyomenena, wacita kale mamambe anguwe mumoyo wakwe. Lino kuti liso
lyako lyalulyo eelyo kalikulebya, linonkole akulisowa. Nkaambo ncibotu kulinduwe
kuti usweekelwe cizyo comwe kwiinda kuti mubili wako woonse ukasowelwe mu
Gehena. Alimwi kuti janza lyako lyalulyo kalikulebya, likosole akulisowa. Nkaambo
ncibotu kulinduwe kuti usweekelwe cizyo comwe kwiinda kuti mubili wako woonse ukasowelwe
mu Gehena. (Mateyo 5:27-30)
Utanikweenkeli kulwana cinyonyoono cako cakuzumanana kucita bwaamu. Webo ulwanina buumi bwako alimwi cibeela cako mubuumi buteeli cili muntenda. Mulilo utamani weelede kusiigwa alimwi, Ijulu ndelyeelede kutambulwa.
|
Pele kufumbwa ooyo uuyoobisyila bana baniini aaba basyoma muli
ndime, ncibotu kuli nguwe kuti waangilwa mundomba waziyo musingo akulwaalilwa
mulwaanje. Maawe kunyika akaambo kazilebyo! Inzya, zilebyo zileelede kuti
ziboole, pele maawe kumuntu ooyo uubelesyegwa kuba cilebyo! Lino kuti janza naa kuulu kwako kulakulebya, kukosole akukusowa; nkaambo ncibotu
kuti ukanjile mubuumi kokosokede naa kolemene kwiinda kuti ukasowelwe mumulilo uuvwilima
kojisi maanza naa maulu obilo. Alimwi ikuti liso lyako kalikulebya, kolino-nkola
akulisowa; ncibotu kuti ukafwutuke koli sicimbolyo kwiinda kuti ukasowelwe mu Gehena muyaka mulilo kojisi meso obilo. (Mateyo 18:8-9)
Kukombelela kwankamu ya WLC: Utanikweenkeli kulwana cinyonyoono
cako cakuzyibila kucita bwaamu. Webo ulwanina buumi bwako alimwi cibeela cako
mubuumi buteeli cili muntenda. Mulilo utamani weelede kusiigwa, alimwi Julu
lyeelede kutambulwa. Hena toyelede kubelesya cilwanyo cili coonse ncokonzya
kujata mukulwana nkondo ya Saatani abangele bakawa basofweede, eelyo Yahushua nacituzekela
Mubusena Busalalisya? Kobambulula bweende bwako abuzuba alimwi kotantamuka masena woonse oomo mokonzyela
kujana ciindi cakunjila musunko, alimwi kokakatila lyoonse kutaba olikke.
Cilwanyo #3: Kokwabilila Mulyango wa Meso Aako.
Koiya kuzwa kuli Joobo, mbokonzya kukwabilila mulyango
wameso aako.
Ime ndakabamba cizuminano ameso ookwaangu;
nkaambo nzi lino Ime ncenga nkeyeeyela mukaintu? Joobo 31:1
Mutobeli ookwa Yahuwah uli woonse uyandika kubamba
cizuminano ameso aakwe, akukonkezya kunembo lyoka Yahuwah kuti meso aakwe
kunyina naati kalange naba ni
aluunyaunya. Eeci cizuminano ceelede kwiindulukwa muwoola lyomwe lyomwe
lyabuzuba, kusikila meso aako alilemeka akulanga ziluleme. Eeyi inooli nkondo yakavwumbu
ncobeni nobantu yakusunga meso aako akwaayiisya kutalanga caluunyaunya, nkaambo
meso ngaazangide ncobeni mukaambo aaka alimwi alalanga caluunyaunya kufumbwa
uunga wacitwa limwi mamambe. Kuti Joobo, mululami, kali wakali kuyandika
kubamba cizuminano ameso aakwe, hena mutobeli wa Yahuwah uli woonse uucipona buno
buzuba, tayelede na kubamba cizuminano eeco ameso aakwe na?
Kukombelela kwa nkamu ya WLC: Utanikweenkeli mukusoleka kwako kunyona meso aako kuti atanikulangi
muntu umwi muluunyaunya. Kufumbwa nocilampa buti ciindi ciyootola kuyiisya meso
aako, kozumanana kulomba lugwasyo lwabulemu bwakujulu kumwi kokanzide kuzwidilila
akuba Joobo wamazubaano, mukuyiisya meso aako.
Cilwanyo #4: Komukakila Kucita Cinyonyoono Saatani
akoompolola kuti “PEEPE NSYEYANDI!”
Eelyo Saatani nakusunka kucita cinyonyoono mumizeezo yako,
komukakila kubusyu bwakwe mujwi lilimvwikisya kuti “PEEPE”. Utayoowi kuti bamwi
bali munsi lyako inga bayeeya nzi eelyo bakumvwa webo nkoompolola kuti “PEEPE.”
Ijwi lizwa mumulomo wako lilakkomanisya Julu lyoonse, alimwi mungele ulatumina
kuli nduwe kuzyookugwasya. Nceeci Paulu ncatwiibalusya eeco caambilizya mulimo
wesu wakoompolola kuti “PEEPE” kufumbwa ciindi notusunkwa:
Nkaambo luzyalo lwa Yahuwah oolo luleta
lufutuko lwalibonya, kubantu boonse. Lutuyiisya kukaka bukkale busofweede bwa kutayoowa Yahuwah azisusi
zyanyika akuti tweelede kupona cakulibatamika, cabululami alimwi acakubelekela
Yahuwah cakulyaaba mubweende bwazyintu oobu, notucilindila bulangizi
bukkomanisya akulibonya kwabulemu kwa Yahuwah wesu mupati alimwi akwa Mufutuli
wesu, Kilisito Yahushua, (Langa Tito
2:11-12.)
Kukombelela Kwa Nkamu ya WLC: Nkaambo nzi ncotayandili kuti Julu likutumine mungele
wakukugwasya eelyo webo nonjide musunko?
Eelyo webo noompolola kuti “PEEPE” kumasunko ookwa Saatani, webo uzuzika
cisyomyo eeci citobela mpeenya aawo: Mungeleo ookwa Yahuwah ulibazingulukide
mumbali lyabo aaabo bamuyoowa.”
(Intembauzyo 34:7)
Cilwanyo #5: Kobaa mulimo Wakucitila Bamwi Zintu.
Eeci ncilwanyo cipati kapati mubuumi buno ankondo yalufu
yakulwana bwaamu, alimwi ciliswaangene acilwanyo #1. Ncintu ciyandika kujana
mwaalumi nokuba mwanakazi ooyo ngomulwana limwi nkondo eeyo, ooyo nkonga webo
kozulilwa bweende bwako. Kuzulwa amuntu ngosyoma caamba kuti webo
konikwaambilana nguwe aawo mpobulide nguzu, alimwi akumusandulwida kaambo keni ncookakilwa
musunko comwe comwe ciindi. Webo weelede kulyeempa lyoonse eelyo waalilwa
kubamba cizuminano kuli nguwe, nokuba nootatobela malailile aakwe. Mu Bbaibbele,
tulajana busena bwa cilwanyo cipati eeci mubbuku lya Mukambausi 4:9-12:
Bantu bobile balainda kubaa nguzu kwiinda
omwe; nkaambo balakonzya kujana bulumbu mumulimo wabo antoomwe. Nkaambo kuti
baalilwa, umwi inga wanyampula mweenzinyina akumwiimikizya: pele maawe kuli yooyo ulaalikke eelyo nadilika
mucinyonyoono; nkaambo kunyina umwi wakumugwasya kwiimikila alimwi. Alimwi,
kuti bobile balala antoomwe, balakasaazyana: pele mbuti ulaalikke mbwakonzya
kulikasaazya? Alimwi kuti umwi wamuboolela, bobile inga bamuzunda; alimwi ntambo yoosedwe atunweba totatwe
tiikonzyi kufwamba kukosoka.
Alimwi, nkeenya kaambo aaka kaliinduludwe kwaambwa amuli Jakobo
5:14-15:
Mamambe ncinyonyoono ciinda kusofwaala alimwi ncilijazyo cipati abulwazi bwalufu kwiinda malwazi aamubili woonse. Malwazi asolweda mubili kukunyonyooka alimwi kumamanino akufwa kwamubili. Pele mamambe kuti alekelwa kusikila aalila kusilika, inga caba cintu cijaya mubili amuya wamuntu antoomwe.
|
Sena kuli uupenga akati kanu? Azumanane
kupaila. Sena kuli uukondedwe? Aimbe ntembauzyo. Sena kuli uuciswa akati kanu?
Aite baalu bambungano, eelyo abamupailile akumunanika mafwuta muzina lya
Simalelo. Eelyo mupailo walusyomo ulamuponya ooyo uucisidwe, alimwi
Simalelo ulamubusya. Kunze lyaboobo, kuti naa wakacita zibi, ulalekelelwa.
Mamambe ncinyonyoono ciinda kusofwaala alimwi ncilijazyo
kapati kwiinda malwazi aamubili woonse. Malwazi asolweda mubili kukunyonyooka
alimwi kumamanino akufwa kwamubili. Pele mamambe kuti alekelwa kusikila aalila kusilikika,
inga caba cintu cijaya mubili amuya wamuntu antoomwe. Aboobo, eelyo swebo
notuciswa calufu katuyandisya kuponyegwa, Jakobo utulailila kuti tweelede kwiita
lugwasyo kubaalu bacikombelo cakasimpe
kuti batupailile. Mbubuti mbwanga ooyo uutonkomene nkwela abwaamu mbwanga
taayanda lugwasyo lwabatumwa basyomeka bokwa Yahuwah eelyo nalwana cinyonyoono
cabwaamu?
Kulisinsa kuli Taata kwiinda mubeenzuma basyomeka, munkondo
yesu yakulwana mamambe, inga catujanya zintu zilibotela zitobela ansi aawa:
- Cilatugwasya kulomya kuzyiba
kuti bamwi balatuyanda nokuba kuti tuli bulide nguzu. - Cilatugwasys kubaa muya
wakulekelela bamwi aabo batucitila cinyonyoono. - Cipa kucesya
luunyaunya lwesu akuyandisya zinyonyoono. - Cilatugwasya
kuponyegwa kuzwa kuzicisa zyakwaalilwa kuzunda musyule lyaciindi. - Inga
catugwasya kuyandisya, kubaa luyando, kukkazyikila camba beenzuma
abalongwema. - Cilatugwasys
kuleka kweelanya bwaamu akuyandana kululeme ooko kukkomanisya moyo. - Cilatugwasya
kuba bazyali babotu.
Kukombelela kwa nkamu ya WLC: Utalelemi kujana muntu ngosyoma omwe nobaba beenzinyoko banjaanji
aabo mbomulwana limwi nkondo, alimwi aabo mbokonzya kuzulana limwi bweende
bwako kuli Taata Yahuwah. Ncintu cizyibidwe kuti muntu uutonkomene mamambe
ulalisisa alimwi tayandide kwaambila bamwi. Pele munkondo yabuumi alufu eeyi,
ooyo muntu teelede kulelema kubelesya kufumbwa cilwanyo ciliko. Mpeenya aawo
nokuba aakale, kufumbwa cisisidwe ciyoolibonya antangalala aali mumuni (Kolanga Luke 8: 17). Hena inga tiicaba cintu cabusongo
kulwanya cilwanyo cilaanguzu eeci akujana lugwasyo luyandika akuleka kuvwunikila
cinyonyoono kunsi kusikila calibonya antangalala kacikugamika kumulilo uuyaka?
Inga caba cintu cabufubafuba kusisa mamambe akukaka lugwasyo luliko akunjizya
miya yesu muntenda.
Cilwanyo #6: Koyandaula Kulaililwa. Koyandaula
Kulaililwa. Koyandaula Kulaililwa.
IBbaibbele lizwide malailile aancokuyandikila kutambula
kulaigwa kuli bamwi. Ntootu tumpnago twa Bbaibbele tumwi tutabilila makani
aaya:
Nkaambo kakubula kulaililwa cisi cilawa,
pele kakuli balailila banji kuzunda nkokuli ncobeni. (Tusimpi 11:14)
Kakwiina kulaililwa, makanze
alatyompokelwa: pele mukulaililwa kunjaanji alaimikila nji. (Tusimpi 15:22)
Kufumbwa
muzeezo ulaimikila kwiinda mukulaigwa: alimwi mukulaigwa kubotu
ulakonzya kulwana nkondo. (Tusimpi 20:18)
Nkaambo kwiinda kukulaililwa kwabusongo
webo ulakonzya kulwana nkondo yako: alimwi mubalailizi banjaanji kunyina
ntenda. (Tusimpi 24:6)
Ncintu cakutondezya kubaa nguzu kuleka cakubula nguzu, kuti
muntu uuzyibide kucita mamambe wayandaula kulaililwa kuzwa kubalailili bana
kristu, nokuba bapati bakwe.
Kukombelela kwa nkamu ya WLC: Eelyo notulangana abulwazi bwalufu, tuunka kumusilisi kuti
tukagwasyigwe akulaililwa. Kanjaanji tulaunka kubasili banjaanji kutegwa
tulomye kuzyiba citola busena. Hena inga mutumwa wa Yahushua uuluulwa, ooyo uuciswa
bulwazi bulaantenda ncobeni bwakucita bwaamu, inga walilekaleka akutayanda
kulaililwa kuzwa kubaalu bayoowa Yahuwah? Inga caba cintu cabufubafuba kuleka
kuyandaula lugwasyo; alimwi inga caindila kuti muntu uutalaigwi kaya kumbele
kukazya ncaambilwa a Taata Yahuwah, mbuli mbokutondezyedwe mutumpango atala
aawa. Alimwi tamukomba nomuzambaidwe mucibi cakucita bwaamu kuti muyandaule
lugwasyo, akuluyandaula cakubinda.
Cilwanyo #7: Kobelesya Nguzu zya Zina lyokwa
Yahushua eelyo Nosunkwa
Kuli nguzu ziteeli muzina lyokwa Yahushua, Simalelo wesu. Eelyo
nosunkwa a Saatani, koompolola cakumvwika zina lyokwa Yahushua.
Twakasyomezyegwa a Yahushua Lwakwe mwini kuti, kuti
twalomba cintu muzina Lyakwe, tuyoocitambula.
Ncobeni, ncobeni, Ime ndamwaambila kuti,
Ooyo uusyoma muli ndime, milimo njecita awalo uyooicita; alimwi walo uyoocita milimo
yiinda waawo; nkaambo Ime ndaunka kuli Taata. Alimwi kufumbwa inywe
ncomukumbila muzina lyangu, eeco Ime njoocicita, kutegwa Taata akapegwe bulemu
kwiinda mu Mwana. Kuti inywe mwakumbila cintu cili coonse muzina Lyangu, Ime
njoocicita. (Johani 14:12-14)
Eelyo muntu uuzyibide mamambe nasunkwa, kuti waamba majwi
aaya, “Yahushua, kondigwasya mebo”, kasyoma ncobeni
kuti kuli nguzu muzina Lyakwe, nguzu zya luunyaunya mumusunko ooyo inga mpeenya
aawo zyamwaika. Inzya, kuli nguzu zitapanduluki mukwaamba Zina Lyakwe eezyo
zikonzya kumwaya musinze akutonkela Saatani azyeelo zyakwe kulaale.
Kwiinda mukutambika janza lyako kuti
uponyegwe; akuti zitondezyo amaleele acitigwe muzina lyamwanaako uusetekene
Yahushua. (Milimo 4:30)
Kukombelela kwa nkamu ya WLC: Eelyo nosunkwa, utalelemi nokaba kaindi kasyoonto buti koompolola
cakumvwika kuti “Yahushua, ndigwasye mebo” kulwana sunko eeli, alimwi
kolikankaizya mucisyomyo cakuti “Ime ndakonzya kucita zintu zyoonse
kwiinda muli Kristu ooyo uundipa nguzu ” (Bafilipo 4:13). Kunyina sunko
eelyo litakonzyi kuzundwa kuti webo koita ncobeni zina Lyakwe calusyomo.
Kolizyibizya kwiita Zina Lyakwe cakoompolola eelyo nosunkwa, mpoonya lugwasyo
lunooliko ncobeni mpeenya aawo kuti ugwasyigwe.
Cilwanyo #8: Koswata Mulongo wa Mangwalo
Aakubelesya Lyoonse Nosunkwa.
Nkooku kulailila kwa Davida kutabilila cilwanyo cilaa nguzu
kapati eeci:
Mbubuti musankwa mukubusi mbwanga
wasalazya nzila yakwe? Kwiinda mukuteelela jwi lyako. Ime amoyo wangu woonse
ndakakuyandaula: O nditaingaili kuzwa kumilawo yako. Ijwi Lyako Ime ndakalisisa
mumoyo wangu, kutegwa Ime nditakucitili cinyonyoono webo. (Intembauzyo
119:9-11)
Kucinyina ciindi cakulelema. Ŋanda yakazekelo ilajalwa lino lino, alimwi webo uyandika kulikulaika lugwasyo luli loonse kutegwa ukonzye kuzunda misyobo yamamambe yoonse. Ijulu lyoonse liliimvwi kalilibambide kuboola kuzyookugwasya webo, pele webo weelede kulitondezya kuti ulilibambide alimwi ulayandisya kulwana nkondo yakavwumbu eeyo. Lugwasyo lwa Bulemu bwa Kujulu luyoobasikila aabo bayandide kugwasyigwa.
|
Kukombelela kwa nkamu ya WLC: Talika cino
ciindi kulemba mulongo watumpango
twa Bbaibbele ntoyanda kuswata alimwi koinduluka kwaamba tumpango ooto
abuzuba, kapati eelyo nosunkwa. Alimwi mbweenya mbokuli nguzu zikonzya kujanwa
mukwaamba zina Yahushua, kuli nguzu zijanwa mukwiinduluka kwaamba tumpango twa
Mangwalo. Tee kayi mbombuboobu Yahushua [Lwakwe mwini] mbwaakamulwana Saatani mumasunko?
Kukosozya makani :
Twamukulwaizya nyoonse nobantu bokwa Yahuwah kufumbwa
nkomubede ankomukkala, nywebo nomulwana amisyobo
yamamambe aali akati kenu, kuti mutalike cino ciindi kubelesya milazyo iili
lusele eeyi. Eezi zilwanyo nozibelesyegwa antoomwe, ziyoomusolweda kukuzunda
kukkalilila ciindi cilamfu, kuzunda bwaamu oobo buujizi kupenzya batobeli bokwa
Yahuwah banjaanji mazuba aano. Mutasali nzila zimwi akusiya imwi akataa
zibelesyo eezyo. Eelyo nomulwanina buumi bwenu abuumi bwamukwasyi wenu
uupengede, amwiibaluke kuti comwe comwe cazibelesyo eezyo ciyootola lubazu
mukuzunda masunko eenu akuzwidilila kuzunda. Kunyina ciindi cakulelema lino
pe. Ŋanda yakazekelo iyanda kujalwa, alimwi nywebo mweelede kulikwabilila
alugwasyo kufumbwa ndomukonzya kujana kutegwa muzunde misyobo yamamambe yoonse.
Ijulu liliimvwi kalilibambide akulindila kugwasya ndinywe, pele nywebo mweelede
kulitondezya kuti mulilibambide akuyandisya kwiilwana nkondo yakavwumbu eeyi. Lugwasyo
lwa Bulemu bwa Kujulu, luyoobasikila aabo bayandide kugwasyigwa.
Mu nkamu ya WLC, swebo tupailila mwaalumi amukaintu uuli
woonse uulwana nkondo eezi, alimwi tulapaila kuti busongo bwabulemu bwakujulu
bukabasikile aabo bamakaintu, baalumi, basazinyinaa, bacizyi, bazyali, abamwi
bamukwasyi kuti bakagwasyilizye, kujatilila akweendela antoomwe abaabo balwana
nkondo eeyo.
Taata Yahuwah amunikile Busyu Bwakwe ali ndiswe toonse,
eelyo notukakatila kuba mbuli Mwanaakwe Yahushua. Akube boobo.
