Kasimpe ka Bbaibbele Kazwisya Moyo

Tusimpe twa Mangwalo ntupati ncobeni alimwi tujatikizya
zinjaanji; tuzwide busongo alimwi toonse tuleendelana antoomwe. Zimwi ziindi,
tumpango tumwi inga twalibonyaanga tulakazyana atumpangonyina tumwi nkaambo
buyo kakutamvwisyigwa kabotu nokuba kubulila luzyibo lujatikizya kampango aako.
Cimwi cibeela ciletela kuzingwa mizeezo nca bulumbu bwabasofweede. Mangwalo
ayiisya kuti, “Bafwide kunyina ncobazyi pe.” ( Langa Mukambausi 9:5, 6.) Nokuba
boobo, Bbaibbele liyiisya kuti kuli mulilo uutamani uuyaka alimwi uutazimiki.
Kasimpe aako kaswaanganya twaambo tobile ootu tukoyaanga tulakazyana, nkasimpe
kalibotela alimwi kayumya lusyomo lwamuntu woonse.

Bbuku lya Izaya lijisi cijuzyo cakubambuluzya kaambyo
kazinga mizeezo aaka. Libuzya mubuzyo wakuti: “Basimilandu bali mu Ziyoni
baliyoowede; buyoofu bwanyandya basikuupaupa ameso. Nguni akati kesu uuyookkala
antoomwe amulilo wuumpa? Nguni akati kesu uuyookkala antoomwe akuumpa
kutamani?” (Izaya 33:14, KJV) Munzila imwi, ooyu mubuzyo ubuzya kuti, nguni
uunga wakkala antoomwe kagumene amulilo uuvwilima kuyaka akupya? Kampango
katobela keni kalaa bwiinguzi:

Ooyo weenda cabululami alimwi waambaula
ziluleme, Ooyo uusulaika kujana mpindu mukutundulula bamwi, Uutambaika amaanza
akwe, akukaka kucengelelwa, Ooyo uulesya matwi aakwe kuswiilila baabo batila bulowa,
alimwi ooyo uufwinya meso aakwe kuti ataboni cibyaabi:

Ooyo uukkala mujulu; Busena Bwakwe
bwakulikwabilila buyooba ciyubilo camabwe; Cinkwa uyoopegwa, meenda Aakwe
anooliko ncobeni.

Meso aako ayoobona Mwami mububotu Bwakwe;
Ayoobona nyika eeyo iili kulaale. (Izaya 33:15-17, NKJV)

Mbantu baluleme aabo bayoopona akusekelela munsi lya “kuyaka
kuteeli”. Balikke bantu basetekene mbabakonzya kukkala a Eloah Uusetekene,
“Nkaambo Eloah wesu mulilo wuumpa.”  (BaHebulayo 12:29)

Yahuwah nguupa buumi boonse. “Muli Nguwe swebo tulapona
akweendeenda akubaa buntu bwesu.” (Milimo 17:28) Nguzu zisalala zyizwa kuli Nguwe
kazyikunka lyoonse kakwiina kulekaleka. Kuli buyo ziindi zyongaye mu Mangwalo
eelyo Yahuwah Lwakwe mpabede naapandululwa. Comwe comwe caziindi eezyo, Walo ulibonyaanga
aawo mpabede mpaazyila mumuni uusetekene, abuumi anguzu zyipandululwa kuti
“mulilo.”

Kataninga wida mucinyonyoono, Lusifa wakali gelebbemu
lyacivwumbilizyo. Kwakali mumuni anguzu zyakali kukunka lyoonse kuzwa ku
Mulengi eezyo zyakali kumunika ali nguwe kakwiina zuba buzuba boonse. Mbuli
gelebbemu lyacivwumbilizyo, Lusifa wakali kukkala mumililo iitamani ya
Singuzuzyoonse munsi Lakwe. Walo wakali kweendeenda katapyi mumabangabanga
aamulilo uuvwilima.

“Webo nduwe gelebbemu linanikidwe eelyo
livwumbilide; alimwi Ime ndakakubikka 
kuti webo ube boobo: webo wakali amulundu uusetekene ookwa Elohimu; webo wakali kweendeenda ooku akooku akataa
mabwe aamulilo.

Webo wakali londokede munzila zyako kuzwa
buzuba oobo mbookalengwa, kusilila busofwaazi nibwaajanwa muli nduwe.” (Ezekiya
28: 14 a 15.)

Mucilengaano, mushinshimi Daniele wakalelekwa kuzwezya
kubona cuuno cabulemu ca Kujulu aawo aakali kukunka bulemu buzwa kuli Yahuwah,
alimwi oobo bulemu bwakali kulangikaanga mulonga uukunka mulilo:

Ime ndalanga akubona zyuuno nizyakasowelwa
ansi, alimwi Ooyo Wansiku wakakkala, Ooyo uula cikobela cituba bu mbuli canda,
alimwi masusu aamutwe wakwe akali mbuli boya bwambelele butavweledwe: cuuno
cakwe cakali mbuli mabangabanga aamulilo uuyakisya, alimwi mavwili aakwe akali
mbuli mulilo uuyaka.

Mulonga uukunka mulilo uuyaka, wakali
kukunka alimwi wakali kuletezya kuzwa kuli Nguwe: Bali zyuulu
azyuulu bakamukutaukila Walo, alimwi bali zyuulu kkumi zyisika zyuulu kkumi
bakaliimvwi kunembo lyakwe: lubeta lwakatalika, alimwi mabbuku akajulwa. (Daniele 7:9 a 10, KJV.)

Awalo,Yahushua katanazyalwa anyika, wakali kulibonya
muciimo Cakwe cakujulu kubantu, zimwi ziindi walo wakali kulangikaanga mulilo
uumwekesya akutowa mumeso cakuti muntu inga wabaya meso aakwe nabona mulilo
ooyo.

Lino Mozesi wakali kweembela matanga
aabamakwe bakwe ba Jethro, bapaizi baku Midiyani. Nkabela wakabinga lutanga
akulutozya munkanda, kusikila waakusika kumulundu wa Holebu, mulundu ookwa
Elohimu. Mpoonya mungele ookwa Yahuwah wakalibonya kuli nguwe mumabangabanga
aamulilo kuzwa akataa kasanzu. Nkabela walo wakalanga, akubona, mukasanzu kakuvwilima
mulilo, pele aako kasanzu tiikakali kuyaka nokuba kupya lwako. (Kulonga 3:1, 2)

Mpoonya Yahuwah wakaboola Lwakwe amulundu wa Sinai kuti azyikwaambilizye
mulawo Wakwe, Walo wakasika mumulilo wabbalabala cakuti aayo mabunga aabantu
bakali kulangilizya, bakabonaanga mulundu woonse wakali kuyaka mulilo: “ Lino
mulundu wa Sinai wakalimaninide kubbilila mubusi, nkaambo Yahuwah wakaselukila
ali nguwo mumulilo. Busi bwamulundu ooyo, bwakasuka akwiimpauka mbuli busi
bwabbibi lyamulilo, alimwi mulundu woonse wakazungaana kapati.” (Kulonga 19:18)

Nkaambo Yahuwah Lwakwe mulilo wuumpa, kufumbwa muntu uuswenena
munsi Lyakwe, uswenena munsaa kuyaka kutamani. Naakamanizya kakkede mazuba aali
makumi one munsaa bulemu bwa Yahuwah atalaa mulundu wa Sinai, busyu bwakwe
Mozesi bwakalangikaanga mbulemu bwa Yahuwah oobo mbwaakali kulanga  kwamazuba woonse aayo naakali mumulundu;
bwakali kumwekesya akutowa mumeso, cakuti bantu cakabayoosya kumulanga kubusyu
bwakwe nkaambo busyu bwakwe bwakali kubala kwiinda zuba nolili acilungulungu.

Lino cakali boobo, eelyo Mozesi
naakaseluka kuzya ansi kuzwa atalaa Mulundu wa Sinai . . . kuti Mozesi taakazyi
kuti cikanda cabusyu bwakwe cakatalika kumweka akutowa eelyo naakali kwaambaula
Anguwe. Aboobo Aloni abana ba Isilayeli 
boonse bakamubona Mozesi; Amulange, cikanda cabusyu bwakwe cakali kutowa
akumweka, nkabela bakayoowa kuswenena kuboola munsi lyakwe.

Mpoonya Mozesi wakabaita balo, alimwi . .
. wakalivwumbilila akasani kubusyu

 Pele kufumbwa ciindi eelyo Mozesi naakali
kuunka munsaa Yahuwah kuti akaambaule Alakwe, walo wakali kulivwumbula kasani
aako kusikila wazwa munsi Lyakwe naakamanizya kwaambaula; mpoonya wakali
kuzwida anze akubandika kubana ba Isilayeli kufumbwa eeco ncaakalaililwa .
Alimwi kufumbwa eelyo bana ba Isilayeli nibaabona busyu bwa Mozesi, kuti
cikanda cabusyu bwakwe kacibatowa kumweka mumeso aabo, mpoonya Mozesi wakali
kulivwumbilila alimwi akasani, kusikila ciindi citobela naakapiluka
kuyoobandika Anguwe. (Kulonga 34:29-31, 33-35)

Aawo aali Yahuwah Lwakwe kumugama, kuli mulilo uutamani
alimwi balikke baluleme mbabakonzya kukkala aawo. Kufumbwa busena aali
cinyonyoono kuti kaali munsimunsi lya Yahuwah, ooyo mulilo uutamani uusetekene ulacuumpa
kusikila cinyonyoono eeco camanina kwiida akuba twe, pele ooyo mulilo tuuzimi
wamanizya kuumpa cibi. Bantu balaa myoyo iitasalazyidwe balayoowa kuba munsaa
mulilo ooyo uuteeli. Eelyo Yahuwah naakali kwaambaula kuzwa atalaa Mulundu wa Sinai,
bantu bakalibilika akuyoowa kuswena munsimunsi.

Alimwi boonse bantu bakabona mizuzumo,
andabo, akulila kwa mweembo, amulundu ooyo kuusuka busi; nkabela eelyo bantu
nibaabona boobo, bakatantamuka akwiimina kulaale. Mpoonya bakati kuli Mozesi,
Webo kotwaambila swebo, ncakwaambila, tulakumvwa: pele Elohimu ataambauli
andiswe, nkaambo inga katuyoofwa. (Kulonga 20:18, 19)

Cilikke cintu cipya mumulilo ookwa Yahuwah ncinyonyoono-
ababisyi, kuti kabalisalila kulamatila kucinyonyoono. Eeci ncintu caalibonya mumakanaa
Nadabu a Abihu, bana bokwa Aloni, eelyo omwe omwe wabo naakabweza cuumpilizyo
akubikka mulilo muli ncico, akuumpilizya tununkilizyo munzila iitasalali kuli
Yahuwah, kakuli Yahuwah wakabalailide kuti bataciti boobo. Aboobo mulilo
wakazwa kuli Yahuwah akubaumpa, mpoonya bakafwa aawo kunembo lya Yahuwah.”
(BaLevi 10:1, 2)

Nadabu a Abihu bakali balombwana balemekwa mucisi ca
Isilayeli. Bakali salidwe, awisi wabo aŋanda yawisi, kuti bakutaukile Yahuwah
mbuli bapaizi bakwe. Pele oobo bulemu mbubaapedwe, tiibwakabapa kulilemeka,
luyando nokuba kuyoowa munsi lya Yahuwah. Pele nkaambo kakunyansya caali
akutyola malailile aamulawo uusetekene ookwa Yahuwah, bakajaigwa amulilo ooyo
wakazyila kuli Yahuwah. Pele Mangwalo ajisi makani aakondelezya aayubununa mililo
iiyaka akutamani. “Mpoonya Mozesi wakaita Mishayeli a Elizapani, bana ba
Uziyeli, acisyanyina wa Aloni, alimwi wakati kuli mbabo, ‘Kamuzya munsimunsi,
amubabweze, mubatole kooko basazinyoko kuzwa mucikombelo akuzwa mulukwakwa.’
Aboobo bakaunka munsimunsi akubabweza
kubajatila kuzikobela zyaatala akubakwelela anze lya munzi, mbweenya mbuli
mbwaakabaambila Mozesi.” (BaLevi 10:4, 5)

Kukondelezya cintu cikankamya eeci! Aaba balombwana
“bakaumpwa” “amulilo” ooyo wakazyila kuli Yahuwah pele zyikobela zyabo tiizyakapya
nokuba asyoonto pe! Kuti muntu umwi wakudomeka mulilo kwaciindi cilamfu cakuti
webo inga wafwa, mbuti mboyeeya kuti zikobela zyako inga zyalangika webo
wamanina kuyaka? Tee kayi inga zyavwilima ncobeni kakwiina kuzimwa webo
kotaninga talika akuyaka, nkaambo mubili wako uzwide meenda!

 Aaka kaambo kaindwa
mumbali ziindi zinjaanji, nkaambo kapa muzeezo uutuzyibya mbokubede munsaa
Yahuwah, mumbali lyakwe kakuli kuvwilima kuteeli. Mulilo ookwa Yahuwah tuuli
mulilo uusuka busi mbuli mililo njotukunka mumaanda eesu pe. Eelyo ba
Shaduleki, Misheki, a Abediniko, beenzinyina a Daniele, nibakasinganyigwa kuya
kulufu lwakuumpwa mubbibi lyamulilo, nkaambo bakakakila Mwami Nebbukadinezala
kukotamina ansi kumbelaa cibumbwa cakwe, akucikomba, eeco cibumbwa ncaakabumbide
mumusena waku Dura, bakafusilwa mumulilo kabasamide zikobela zyabo: “Aaba
balombwana bakaangwa kabasamide majansi aabo, zikobela zyakunsi, amazyeete
aabo, azimwi zikobela, mpoonya bakafusilwa akataa bbibi lya mulilo uubbebba kuvwilima
akuyakisya.” (Daniele 3:21, KJV)

Pele comwe buyo cintu eeco cakapya akunyeka  akati kabo:
nintambo eezyo nzyibakaangidwe anzyizyo; zyakanyeka cakuti zyakasungunuka
akuloka kuzwa mpuzyakabakaangide. Aaba balombwana lwabo taakwe nokuba asyoonto
pe nobakalicisa nokuba kusyukutwa mulilo. Nozyiba zyikobela zyabo zyoonse
tiizyakapya nokuba kununka busi bwamulilo ooyo!

Mpoonya ba Shaduleki, Misheki, a Abediniko,
bakasokomoka kuzwa akataa mulilo uuvwilima boobo. Bana babami, beendelezi,
abapati balumamba, balailili ba mwami, boonse bakabungana antoomwe , nibakabona
balombwana aaba, mulilo nguwakaalilwa kuumpa, nokuba kasusu kabo komwe
tiikakaumpilizyigwa pe, alimwi zikobela zyabo tiizyakatentwa amabangabanga
aamulilo pe, nokuba kununkilila busi bwa mulilo ooyo wakabavwumbilide mumabangabanga
aavwilima. (Daniele 3:26 a 27, KJV)

Maseseke aabalombwana aaba balaa camba boobu, bakomi ba
Kujulu, akatondezyegwa munzila ngubauba: bakaimvwi munsaa Mwanaa Yahuwah!

Mpoonya aaba balombwana, ba Shaduleki,
Misheki, a Abediniko, bakawida akataa bbibi lyamulilo mucikko kabaangidwe.

Mpoonya Mwami Nebbukadinezala
wakaankamana; wakanyampuka cakufwamba akutalika kukanana, kaamba kubalailili
bakwe kuti, “Hena tiitwafusa balombwana botatwe bapombaidwe ntambo akataa bbibi
lyamulilo?”

Balo bakamuvwiila mwami kuti, “Inzya
masimpe aayo, O Mwami.”

“Amulange!” wakabaingula, “Ime ndibwene
balombwana bone bataangidwe , kabeendeenda akataa mulilo; alimwi kunyina cintu
cabacisa, alimwi umwi akati kabo ulangikaanga Mwanaa Eli.” (Daniele 3:23-25)

Boonse aabo balekela kuyanda kwabo kuluyando lwabulemu
akupona maumi aabo kabeendelana amulawo wabulemu, balakonzya kupona, kakwiina
cintu cibacisa, akataa mililo ya Singuzuzyoonse munsi Lyakwe. Mukuteelela
Mulawo ookwa Yahuwah, aaba bayandwa botatwe bakakonzya kukkala munsi lya mililo
iiyaka kuteeli, amililo iiyaka cakuvwilima akusuka busi eeyo yakaalilwa kubaumpa nokaba kasusu komwe amibili
yabo.

Mililo iiyaka kuteeli yokwa
Yahuwah munsi Lyakwe, ilaumpa cinyonyoono coonse akuliyanda kwabuunyu.
Cinyonyoono lyoonse cilisangene a 1) Bubeji a 2) Kusinikizya canguzu nokuba kukonga
kujaya nokuba kucisa (mbuli mbwacita Saatani). Saatani ngowisi wakubeja koonse,
pele kasimpe, kasimpe katamani lyoonse kazyila kuli Yooyo uukkede mumulilo
wuumpa, kalanyonyoona Bubeji boonse. Kusinikizya kulazundwa aaluyando
lwabulemu. Muya Uusalala
 ngo Kasimpe a
Luyando lwabulemu. Mubuzuba bwa Pentekkositi, Muya Uusalala wakazulila kunjila muli
baabo bakabungene kabasyoma antoomwe, “Mpoonya kwakalibonya kuli mbabo milaka yaandukide mpuli mpanda iikoya mabangabanga aamulilo,
yakamwaigwa atalaa mitwe yabo akati kabo, alimwi muntu umwi aumwi wakakkalwa
mulaka wamulilo, eelyo boonse bakazula Muuya Uusalala alimwi bakatalika kwaambaula
mumyaambo yiindene-indene mbubonya muuya mbowakali kubazumizya kwaambaula..” 
(Milimo 2:3, 4, KJV) Aaba basyomi tiibakasyukutwa amulilo wabulemu pe.
Aboobo, bakali kamantene muluyando alimwi bakatola mulumbe wa Bulelo bwa Kujulu
kunyika yoonse.  

Lwiiyo lwakuti kuli mulilo
uutamani uuyaka lyoonse oomo musowelwa babisyi,  ndwiiyo lwakubeja alimwi luyeeme abulangizi
bwalweeno: bulangizi bwakuti Adamu a Eva bakalipedwe buumi butamani
Kumalengelo. Aboobo, mbokaamba kaambo aako, eelo nibakabisya akupegwa cisubulo,
Yahuwah taakajisi cakusala pele buyo kubatandila kubuumi butamani mumililo
yamulilo uutamani. Oolu lusyomo talujanwi mu Mangwalo pe. Mukupandulula Yahuwah,
Timoteo mubbuku lyakwe mukampango 1 Timoteo 6:16,  kulilembedwe cakutaleyaleya kuti: “Nguni
uulaa buumi butamani, ooyo uukkede mumumuni uutakonzyi kusikwa munsimunsi
amuntu; ooyo uutanabwenwe amuntu, alimwi uutakonzyi kubonwa amuntu: kuli nguwe
akube bulemu anguzu ziteeli.”

“Yahuwah ngoluyando.”  (1 Johani 4:8)  Walo ukkomaninabululami.

Mboobu mbwaamba Yahuwah, “Muntu
atalipeekezyi kulisumpula mubusongo bwakwe, alimwi  muntu ulaanguzu atalisumpuli munguzu zyakwe,
nokuba muntu muvwubi atalisumpuli mubuvwubi bwakwe;

“Pele ooyo uulisumpula muli ceeci,
kateelela akuzyiba kuti mebo Ndime Yahuwah, uupa, uulaa lubomba lwaluyando,
mbeta, abululami munyika yoonse. Nkaambo muli zyeezyi Ime ndakkomana” mbwaamba
Yahuwah.  (Jelemiya 9:23 a 24.)

Mbuli mbwali Eloah wa bululami a luyando, Yahuwah taakali
kuyanda kupa buumi butamani kumuntu uuli woonse eelyo nacili muciindi
cakuzekelwa, kalibambila kusala kunyonena Nguwe nokuba kusangana a Saatani
mubuzangi bwakwe. Yahuwah  taakali
kuyanda kuti naba similandu wiinda kubaa cinyonyoono, kapenga kusubulwa
kumucisa lyoonse kukabe kutamani. Eeco inga caba cintu calunya akuleka kuba
cintu caluyando nanka cabululami pe!

Buumi butamani ncipego.  Bupegwa buyo kuli baabo balikke bazunda kwiinda mu Yahushua. Cisubulo cabaabo balutide kulamatila cinyonyoono teesyi buumi butamani bwakupenzyegwa pe. Cipego cabo Ndufu.

Buumi butamani ncipegocizwa kuli Yahuwah. Bupedwe buyo luzutu kuli baabo bazunda mumaumi aabo
kwiinda munguzu zyokwa Yahushua. “Nkaambo bulumbu bwacibi ndufu; pele bulumbu bwa Yahuwah mbuumi butamani kwiinda
muli Yahushua Uunanikidwe Simalelo wesu.”  (BaLoma 6:23)  Cisubulo
cabaabo basala kuzuzumbatila cinyonyoono, tabuli buumi butamani bwakupenzyegwa,
peepe. Bulumbu bwabo ndufu. Buumi butamani bupegwa buyo kuli baabo balisalila
kulibombya ku Mulawo walubomba wa Luyando.

 Mangwalo
atuyubunwida mbocicitika eeci:

Aboobo, amulibombye kuli Leza; pele
amumukazye akumutantamuka Diabolosi, eelyo uyoomutija nywebo. Amuswenene
kuli Yahuwah, eelyo awalo uyooswenena kulindinywe. Amusanzye maanza aanu nywebo
nobasizibi, akusalazya myoyo yanu nywebo nobasimyoyo yobilo. Amuungumane,
moomoke akulila. Kuseka kwanu kusanduke kube koomoka, akukondwa kwanu kusanduke
kube kuusa. Amulicesye mumeso aa Jehova, eelyo walo uyoomusumpula.
(Jakobo 4:7, 8 a 10)

Boonse aabo balekela mililo iiteeli kuti ibaumpile
cinyonyoono atombe lyoonse lili mukati muli mbabo, bayoopegwa buumi bweelene
abuumi mbwapona Yahuwah. Mililo yokwa Yahuwah aawo mpakkede, iyooyaka lyoonse
kukabe kutamani. Eeci ncisyomyo ncobeni! “Alimwi munzi ooyo tiiwakabulide zuba,
nokuba mwezi, kuti umwesye muli nguwo: nkaambo bulemu bwa Yahuwah bulamwesya
mukati kamunzi ooyo, alimwi Mwanaambelele ngomumuni wamunzi ooyo alakwe.” 
(Ciyubunuzyo 21:23)  Banunudwe bayakweenda mubuzuba buteeli butakwe zuba,
kabasekelela munsimunsi Lyakwe mpabede Yahuwah. Bayookkala akataa kuyaka
kuteeli nkaambo bakalekela kuyanda kwabo, akulekela cinyonyoono cabo kuti
cisyukutwe mumulilo uusalazya.

Kabunga kabanakalindu aabo bakali
kusanyangula Bbaibbele kakali kubala mubbuku lya Malakayi.  Eelyo
kabunga aaka nikakabala mucaandaano catatu, bamakaintu aabo bakaankamana
acisyomyo eeco ncobaajana cakalaa makani aaya:

Pele nguni ooyo uuyokwiima mubuzuba bwa Kuboola
Kwakwe Alimwi nguni uuyakwiima eelyo Walo aakulibonya?  Nkaambo unooli
mbuli mulilo wabafuzi, acisanzyo cabaabo bafula lubulo: alimwi walo uyookkala
mbuli uufula akusalazya nsiliva… akubanyebulula mbuli golide ansiliva, kutegwa
bakakonzye kwiima akwaabila cituuzyo cabululami kuli Yahuwah. (Malakayi 3:2, 3)

Kutateelela nzila eeyo nsiliva mbwiisalazyigwa, bamakaintu
bakayandisya  kumvwisya kumwi kabaiya kuya
kumbele kutegwa bamvwisisye nzila eeyo iipandululwa mu Mangwalo. Nibakamanizya
kupangana a mufuzi kuti bakamulangilizye eelyo nabeleka kufula akusalazya
lubulo, bakasika aciindi ncibaamvwene anguwe. 

Kajisi kakomwe kansiliva, mufuzi wakakaumpilizya atalaa
mabangabanga aamulilo; eeco, walo mbwaakapandulula mufuzi, eelyo nasalazya
nsiliva, cakali cintu ciyandika kuumpilizya nsiliva akati kamabangabanga
aamulilo aawo mulilo mpowuumpisya, kutegwa lyoonse tombe limanine kunyeka. Umwi
mukaintu wakabuzya kuti naa cili masimpe ncobeni kuti ooyo mufuzi lyoonse
wakeelede kukkala mukati oomo mwabelekela, mumbali lya mulilo, ciindi coonse
eelyo nafula akusalazya nsiliva akataa mabangabanga aamulilo. 

Ooyo Mwaalumi wakaingula kuti, “Inzya. Kuleka buyo kukkala
muno mukati eelyo nengumpilizya nsiliva mumulilo, pele Ime ndeelede kujula meso
aangu zyiindi zyoonse. Kuti Nsiliva yaindila kukkalilila akataa mulilo nokuba
kaindi kasyoonto buyo, inga yanyonyooka.”

Bamakaintu bakaya kumbele kulangilizya kabaumwine, mpoonya
bakabuzya kuti: “Mbuti mbozyiba webo kuti lino nsiliva yasalazyigwa ncobeni
cakumaninina, akubula tombe?”

“Ncuubauba eeco,”  wakamwetamweta, kumwi kacengulula kakomwe
nkaakali kuumpilila mumulilo. “Ime ndilizyi kuti ilisalede eelyo mebo ndatalika
kubona cimbonimboni cangu atalaa nsiliva.”

Yahuwah wakali kutulindila swebo kalangila buzuba oobo
nayoobona cinkonzya Cakwe nociyoolibonya mubana Bakwe alimwi nobakonzya kuboola
kuti bazyookkale mumunzi aNguwe. Kutamba Kwakwe kucitambikidwe kuli baabo
boonse babikkila maanu kuti baswiilile:

KomuyandaulaYahuwah eelyo nacikonzya
kujanwa, komwiita Walo eelyo nacili afwaafwi: uusofweede kaleka micito yakwe,
alimwi ooyo uutaluleme awalo aleke mizeezo yakwe: nkabela ajokele kuli Yahuwah,
mpoonya Walo uyoomufwida luzyalo; alimwi kuli Simalelo wesu nkaambo walo
uyoomulekelela zinjaanji ncobeni. (Izaya 55:6, 7.)

Boonse aabo balibombya kumulilo wa Mufuzi bayookkomana
kukabe kutamani kabakkede akataa mililo yokwa Yahuwah. “Alimwi banji aabo
balede mubulongo bwaansi bayoosinsimuka, bamwi kubuumi butamani . . . Alimwi
aabo basungwaalide bayoomweka amumuni mbuli wamulengalenga; alimwi aabo
bacengulula banjaanji kuti baboole kubululami bayoobekema mbuli nyenyezi
kwalyoonse alyoonse.”  (Daniele 12:2 a 3.)

Bikkila maanu ncobeni atalaa kaambo aako kakuti
nokuba kuti baluleme batakonzyi kufwa, bayookkala akukkomana akataa mililo
yokwa Yahuwah aawo munsaa mpabede, ooyu mulilo unooli ngomulilo wuumpa akuyaka,
“mulilo uutamani” nkaambo babisyi aabo bakonzya kufwa bakonzya buyo kukkala
kaindi kasyoonto aawo mpuubeede mulilo ooyo.

Kolanga atumpango tutobela aawa, oomo mokwaambwa munzila
iisalala kuti, aawo Yahuwah mpabede ncobeni ali mulilo uutamani, iwuumpisya
akunyesya citasalali cili coonse:

 “Lino ndilaimikila, mbwaamba
Yahuwah; lino ndilalumbaizyigwa, lino ndilamutondezya nguzu zyangu. Nywebo [nobasofweede] nzyomuyeeya zyoonse
anzyomucita nzyabuyo, ziyooba twe. Muuya wangu uli mbuli mulilo uusyukuta.
Bantu bayoopya kusikila bakabe mbuli malambo bayootentwa mbuli ziteyo zyamamvwa
mbozitentwa mumulilo.” Amuswiilile nywebo nomuli kulaale, amumvwe
ncindacita kuno; nywebo nomuli afwiifwi amusyome kuti ndaanguzu. Basizibi mu
Ziyoni baliyoowede akukankama; bukandu bwabanyandya aabo batalemeki Yahuwah
basikuupaupa ameso. Nguni akati kesu
uukonzya kukkala amulilo uusyukuta? Nguni akati kesu uukonzya kukkala amulilo
uuyaka lyoonse kuteeli? Nguyooyo weenda cakululama akucita zilondokede, ooyo
uukaka mpindu iizwida mukulida bantu, uutayandi kutambula masinkamulomo, ooyo
uutavwelani abaabo bakanza kujaya bantunyina, uufwinya meso aakwe katayandi
kubona bubi pe; Ngomuntu ooyo uuyookkala mujulu, uuli aacitijilo
cikwabilidwe amilwi yamakakala aamabwe. Unooyoopegwa zyakulya, maanzi
taakamumanini pe. (Izaya 33 :10-16)

Mozesi wakalomba kuti amubone Yahuwah:

“Mpoonya walo [Mozesi] wakati, Ime
ndakukomba webo, nditondezye bulemu bwako.” (Kulonga 33:18)

Yahuwah wakamwiingula munzila ngubauba, akwaambila Mozesi
kuti kunyina muntu uunga walanga ali Nguwe akuya kumbele kupona.

“Alimwi Walo [Yahuwah] wakati, Webo
tokonzyi kububona busyu Bwangu: nkaambo kunyina muntu pe uunga wabona busyu
Bwangu, akuya kumbele kupona.” (Kulonga 33:20)

“Nkaambo Ime ndime Yahuwah, Ime nsyecinci pe;
aboobo inywe nobana ba Jakobe tamukonzyi kufwidilila.” (Malakayi 3:6)

Yahushua kumatalikilo wakalaa bulemu buyaka akuumpisya mbweenya
mbuli bulemu bwa Taata Wakwe, pele Walo wakasala kuti akkulule akuyaamika
bulemu Bwakwe ambali kutegwa abe muntu mutuba, mbuli ndiswe, alimwi akonzye
kukkala akataa babisyi kakwiina kubanyonyoona. Nokuba boobo, ciyooba cintu
ciimpene aKuboola Kwakwe
:

“Nkaambo eelyo nobaamba kuti, akube
Luumuno akukkala kakwiina ntenda; mpeenya aawo kuyoobasikila kunyonyoonwa,
mbuli kumyongwa mwida kwamukaintu ooyo uumitide nayanda kutumbuka; alimwi balo
tabakakonzyi akutija pe.” (1 Batesalonika 5:3)

“Mpoonya ooyo Uusofweede
uyooyubununwa, ooyo Yahushua ngwayoonyonyoona amuya wamulomo Wakwe, alimwi
uyoomujailizya akumweka kwa Kuboola Kwakwe.” (2 Batesalonika 2:8)

“Kumweka” kwakuboola Kwakwe, ooko kuyoonyonyoona
basofweede ayooyo Uusofweede – muntu wacibi [1 Batesalonika 5:3, 2 Batesalonika
2:8], ngomulilo wini uuli kufumbwa mpabede aawo Yahushua; Unooli muciimo Cakwe cakumatalikilo eelyo
naakalaa bulemu kakamantene a Taata Wakwe Kujulu, kweendelanya bulembedwe
mumupailo Wakwe: “Alimwi lino, O Taata, kondipa bulemu mbuli bwako
omwini oobo Ime mbweekajisi Andiwe kiitanalengwa nyika.” (Johani 17:5) Oobo
“bulemu” bwakajosyelwa kuli Yahushua, mbobulemu oobo bwakoofwaazya
Saulu: ” Masyikati,  O Mwami, Ime
ndakabona munzila mumuni uuzwa kujulu, wiinda kumweka atalaa kumweka kwazuba,
kuumweka mumbali lyangu kuzinguluka ndime abaabo mbutwakali kweenda limwi.”
(Milimo 26:13)

Baluleme bayookonzya kupona kunembo lyabulemi bwa Yahushua
aciindi ca Kuboola Kwabili nkaambo buyo kakuti balipedwe buumi butamani
mukaindi kasyoonto: “Mukaindi kasyoonto, mukulaba kwaliso, waakulila mweembo wamamanino:
nkaambo mweembo uyoolila, alimwi bafwide bayoobusyigwa kabatacikonzyi kufwa
alimwi, alimwi swebo tuyoocincigwa.” (1 Bakolinto 15:52)

Kunyonyoonwa kwabasofweede (langilizya cipekupeku eeci
) aciindi ca Kuboola Kwakwe Kwabili ciyooba cijuzyo cakuumpa kuteeli ooko
Yahuwah nkwayoobelesya kusalazya nyika yoonse iitasandukide, ababisyi bateempwi,
acili coonse cikonzyana acinyonyoono.

Saatani wakatalikila Kujulu kulwana nkondo yakwe iigaminina
kulwana Yahuwah. Ooyo uuzingulukidwe kuumpa kuteeli, ngonguwe Walo uuyoomanizya
kunyonyoona zyoonse zyitasalali mbuli mbokulembedwe mubbuku lya Ciyubunuzyo.

“Nkaambo Eloah wesu mulilo wuumpa.”
(BaHebulayo 12:29)  

“Uyoobawisizya makala aamulilo uuyaka
wamabwe aasalufa, uyoobawida mbuli mvwula, uyoobasubula bweelede aluuwo lupya.”
(Intembauzyo11:16)

” Ubatande bamwaike mbobuunduluka busi
akumwaika kuti luuwo lwaunga, beenzemuke akulileka mbuli bunzuka buli munsi
aamulilo, babi abalobe kumbele lyako O Yahuwah. (Intembauzyo 68:2)

“Bakeenda
munyika yoonse akuzinguluka cilawo cabasalali amunzi uuyandika. Pele mulilo
wakaloka kuzwa kujulu kuli Yahuwah, wabasyukuta boonse.” (Ciyubunuzyo.
20:9)

Boonse bobile Yahushua a Yahuwah balayaka mbuli mulilo
uuvwilima kufumbwa aawo mpobabede alimwi bayooboola kuzyookkalila mumunzi wa
Jelusalema Mupya, oomo kumweka kwabo mokunooli kumweka kwiinda kubala kwa zuba
amwezi:

 “Zuba
talikabi mumuni wako ciindi casikati mubuzuba oobo, nuuba mumuni wamwezi
tuukakumunikili nkaambo Mwami Yahuwah nguuyooba mumuni wako uutakamani, Yahuwah
wako nguuyookuletela bulemu.” (Izaya 60:19)

“Nkabela munzi ooyu tiiwakabulide zuba nuuba mwezi,
nkaambo bulemu bwa Yahuwah mbobwakali kubalila mukati muli Nguwo, alimwi Mwanaa
mbelele ndelambe lyawo.” (Ciyubunuzyo. 21:23)

Azyimwi zijatikizya cibalo eeci: